ကချင်ပြည်နယ် တနိုင်းမြို့နယ် လီဒီုလမ်းပိုင်းသို့ စစ်ကောင်စီတပ်က ခြေလျင်စစ်ကြောင်းအပြင် စစ်ယာဉ်တန်းများဖြင့် စစ်အင်အားတိုးချဲ့နေပြီး လက်နက်ခဲယမ်းဖြည့်တင်းမှုနှင့် ရိက္ခာသယ်ဆောင်မှုများ ဆက်တိုက်ပြုလုပ်နေ၍ ကချင်လွတ်လပ် ရေးတပ်မတော်(KIA)တပ်နှင့် ထိတွေ့မှုများရှိနေကြောင်း KIA သတင်းပြန်ကြားရေးဌာနက ဖော်ပြသည်။
နိုဝင်ဘာ ၈ရက်က KIA အမှတ်(၂)တပ်မဟာ၊ အမှတ်(၄၃)တပ်ရင်းနယ်မြေ တနိုင်းမြို့နယ် လီဒီလမ်းမပေါ်ရှိ နမ်ဖျန့် ကျေးရွာနှင့် တိမ်ကောက်ကျေးရွာကြား တိုက်ပွဲဖြစ်ပွားခဲ့သည်ဟု ဆိုသည်။
စစ်ကောင်စီတပ် ခလရ(၂၉၇)တပ်က အင်အား ၃၀ဖြင့် တနိုင်းမြို့က ထွက်ခွာလာစဉ် နမ်ဖျန့် ကျေးရွာနှင့် တိမ်ကောက်ကျေးရွာကြားတွင် KIA တပ်က စောင့်ကြိုတိုက်ခိုက်ခဲ့သည်ဟု ဖော်ပြသည်။
အပြန်အလှန် ပစ်ခတ်မှု မိနစ် ၂၀ကြာမြင့်ခဲ့ကြောင်းဖော်ပြခဲ့သော်လည်း တိုက်ပွဲ၌ ထိခိုက်ကျဆုံးမှု ရှိမရှိကို ဖော်ပြမထားပေ။
အဆိုပါဒေသရှိ ကချင်ဒေသခံတစ်ဦးကမူ ယမန်နေ့တိုက်ပွဲ၌ စစ်ကောင်စီတပ်မှ သေဆုံးထိခိုက်ရှိနိုင်ကြောင်း ပြောကြားသည်။ ရဟတ်ယာဉ်ဖြင့် တနိုင်းသို့ လာရောက်ရာ လူနာလာသယ်ခြင်းဖြစ်နိုင်သည်ဟု ဆိုသည်။
တိုက်ခိုက်ခံရသည့် စစ်ကောင်စီတပ်သည် ပရင်းမှော်များ ရှိရာ နမ်ဗျူဒေသမှ လီဒိုလမ်းရှိ ရှဒူးဇွပ်တပ်စခန်းသို့ ပြန်ဝင်လာသည့် စစ်ကြောင်း ဖြစ်သည်ဟု KIAက သတင်းဖော်ပြသည်။
