မေ ၁၉၊၂၀၂၅။ထားမြတ်/People’s Spring
အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာန ကွပ်ကဲမှုအောက်ရှိအမှတ်(၂)စစ်ဆင်ရေးနယ်မြေ၊ ဧရာဝတီတိုင်းစစ်ဌာနအမှတ် (၂၉)ဗျူဟာ(AYA PDF)၏ အပတ်စဥ် (၇)စစ်သင်တန်းအတွက် သင်တန်းသားများခေါ်ယူနေကြောင်း AYA PDFက ထုတ်ပြန်သည်။
AYA PDF အနေဖြင့် လက်ရှိတွင် အပတ်စဉ်(၆) အခြေခံစစ်ပညာသင်တန်းကို စတင်နေပြီဖြစ်ပြီး မေလ ၁၈ရက်တွင် သင်တန်းသားသစ်များ ဖိတ်ခေါ်ခဲ့ခြင်းဖြစ်သည်။
AYA PDFအပတ်စဉ်(၅) ရဲဘော်များ၏လေ့ကျင့်မှု ရုပ်သံကိုလည်း ပြည်သူများသိရှိနိုင်ရေး ထုတ်ပြန်ခဲ့ရာ ယင်းရုပ်သံကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနကလည်း ထပ်မံဖော်ပြခဲ့သည်။
Public Service Announcement
ယခု ဖိတ်ခေါ်သည့် အပတ်စဉ်(၇)အခြေခံစစ်ပညာ သင်တန်း အသင်တန်းသားသစ်များအတွက် သတ်မှတ်ထားသည့် စည်းကမ်းများကိုလည်း ထုတ်ပြန်ခဲ့သည်။
အခြေခံစစ်သင်တန်း တက်ရောက်လိုသူများသည် အသက်(၁၈)နှစ်မှ (၄၀)အတွင်းရှိရမည်ဖြစ်ပြီး ကျန်းမာရေး ကောင်းမွန်သူဖြစ်ရမည်၊ စိတ်ဓာတ်ကြံ့ခိုင်ပြီး ပြင်းထန်သောစစ်ရေးလေ့ကျင့်မှုများနှင့် ပင်ပန်းဆင်းရဲမှုများကြုံတွေ့ရမည်ကို ကြိုတင်သိရှိထားပြီး အပြည့်အဝလိုက်ပါဆောင်ရွက်နိုင်ရမည်ဟု ဖော်ပြသည်။
ထို့ပြင် စစ်မှုတာဝန်အားတော်လှန်ရေးအောင်မြင်ပြီးဆုံးသည်အထိ ကျေပွန်စွာထမ်းဆောင်နိုင်ရမည်၊ ဗျူဟာမှချမှတ်ထားသော စည်းကမ်းချက်များနှင့် အမိန့်ညွှန်ကြားချက်များအား တိကျစွာလိုက်နာ ဆောင်ရွက်ရမည်ဟု စည်းကမ်းသတ်မှတ်ချက်၌ ပါရှိသည်။
အခြေခံစစ်ပညာသင်တန်းပြီးဆုံးသည့်အခါ ပညာအရည်အချင်းနှင့် စိတ်ပါဝင်စားမှု၊ လုပ်ဆောင် နိုင်စွမ်းအပေါ်မှုတည်၍ ချေမှုန်းရေး၊ စနိုက်ဘာ၊ ဒရုန်း၊ ထုတ်လုပ်ရေး၊ ဆေးတပ်ဖွဲ၊ ထောက်ပို၊ ဆက်သွယ်ရေး၊ ရုံးလုပ်ငန်းစသည့် ကဏ္ဍအသီးသီးတွင် ပေးအပ်သောတာဝန်ကို ထမ်းဆောင်ရမည်ဟု ဆိုသည်။
ဗျူဟာအနေဖြင့် တပ်ဖွဲဝင်များ၏ကျန်းမာရေးစောင့်ရှောက်မှု၊ နေထိုင်မှု၊ လေ့ကျင့်မှုနှင့် စစ်အသုံးအဆောင်ပစ္စည်းများတပ်ဆင်မှုစသည့် တပ်ဖွဲဝင်တို့ရသင့်သည့်အခွင့်အရေးများကိုတာဝန် ယူဆောင်ရွက်ပေးမည်ဟု အသိပေးသည်။
အခြေခံစစ်ပညာသင်တန်းပြီးဆုံးပါက ရှေ့တန်းအတွေ့အကြုံယူဆောင်ရွက်ခြင်းနှင့် လိုအပ် သည့်စစ်ရေးမွမ်းမံပြင်ဆင်မှုများကိုလည်း တပ်ဖွဲဝင်များအတွက် ဆောင်ရွက်ပေးမည်ဟု ဆိုသည်။
တပ်ဖွဲဝင်များအား ခေတ်နှင့်လျှော်ညီသော နည်းပညာကိစ္စရပ်များကိုလည်း ဖွံဖြိုးတိုးတက်အောင် ကဏ္ဍအလိုက်အလေးထားဆောင်ရွက်ပေးမည်ဖြစ်ကြောင်း ဖော်ပြပြီး အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၏ကွပ်ကဲမှုအောက်ရှိတပ်ဖြစ်သည့်အတွက် ကာကွယ်ရေးဝန်ကြီးဌာနမှထုတ်ပြန်သော အမိန့်၊ ညွှန်ကြားချက်များအား တိကျစွာလိုက်နာ ဆောင်ရွက်ရမည် အသိပေးသည်။
အမျိုးသမီး(စစ်မေ)များကို အထူးအလေးထားဖိတ်ခေါ်ကြောင်းနှင့် အခြေခံစစ်ပညာသင်တန်းပြီးဆုံးပါက အရည်အချင်းနှင့် စိတ်ပါဝင်စားမှု၊ လုပ်နိုင်စွမ်းအပေါ်မူတည်၍ ချေမှုန်းရေးအပြင် ဗျူဟာ၏ ဆေးဌာန၊ ဆက်သွယ်ရေး၊ စက်ချုပ်ဌာနနှင့် ရုံးလုပ်ငန်းများတွင် တာဝန်များထမ်းဆောင်ရန် ဂုဏ်ယူဝမ်း မြောက်စွာကြိုဆိုလက်ခံလျှက်ရှိဟု အသိပေးသည်။
AYA PDF သည် စစ်အာဏာရှင်အမြစ်ဖြတ်ချေမှုန်းရန်ရည်ရွယ်၍ တိုင်းရင်းသားမဟာမိတ်နယ်မြေ အသီးသီး တွင်ကျရာအခန်းကဏ္ဍမှနေ၍ ပါဝင်ဆင်နွဲလျှက်ရှိရာ ယခုအခါမဟာမိတ်များနှင့်အတူ ခြေသံလုံလုံဖြင့် စစ်ရေးအတွေ့အကြုံများကို လေ့ကျင့်သင်ယူရင်း ဧရာဝတီတိုင်းအတွင်း တိုက်ပွဲများဆင်နွှဲနေပြီဟု အသိပေးသည်။
စစ်ရေးအခြေအနေနှင့် သင်တန်းသားသစ် ဖိတ်ခေါ်မှု အခြေအနေများ မေးမြန်းရန် AYA PDF ထံသို့ ဆက်သွယ်ထားဆဲဖြစ်သည်။ ကာကွယ်ရေးဝန်ကြီးဌာန ဦးရည်မွန်က ပြည်သူများအနေဖြင့် ဧရာ၀တီတိုင်း လွတ်မြောက်ရေးအတွက် တိုက်ပွဲဝင်နေသည့် ရဲဘော်များနှင့် အတူ တကွ ဆက်ရှိပေးကြရန် မေလ ၁၆ရက်က ကျင်းပသည့် ပေါင်းစုရုန်းညီ အောင်ပွဲဆီ၊ ဒို့ပြန်လာပြီ ဧရာ၀တီ ကမ်ပိန်း ဖွင့်ပွဲ အခမ်းအနား၌ ပြောကြားခဲ့သည်။
“အခုအချိန်မှာ လူငယ်တွေက PDFအဖြစ်ခံယူရင်း အသက်နဲ့ဘ၀ကို ရင်းပြီး တိုက်ပွဲဝင်နေတဲ့အချိန် တော်လှန်ပြည်သူတွေကလည်း ကိုယ့်ရဲ့ ချွေးနည်းစာထဲက ဖြစ်နိုင်သမျှ ထောက်ပံ့လှူဒါန်းရင်း တော်လှန်ရေးခရီးကို အတူတကွ ဖြတ်သန်းနေကြတာဖြစ်ပါတယ်”ဟု ဝန်ကြီး ဦးရည်မွန်က ပြောကြားပြီး တော်လှန်ရေးအောင်ပွဲသည် နိုင်ငံ၏ ခေတ်သစ် စနစ်သစ် ကို ဖန်တီးနေသည့် တော်လှန်ရေးဖြစ်သည်ဟု ပြောသည်။
