ထက်ဘုန်းခေါင်၊ ဒီဇင်ဘာ-၂၁
၂၀၁၈-၂၀၁၉ အခွန်စည်းကြပ်နှစ်အတွက် မန္တလေးတိုင်းဒေသကြီးအတွင်း ဝင်ငွေခွန်နှင့် ကုန်သွယ်လုပ်ငန်းခွန် အများဆုံး ထမ်းဆောင်ခဲ့သည့် လုပ်ငန်းရှင် (၅၀)ဦးစီ စာရင်းကို ပြည်တွင်းအခွန်များ ဦးစီးဌာနက ဒီဇင်ဘာ(၁၈)ရက်တွင် သတင်းထုတ်ပြန်သည်။
အဆိုပါ ထုတ်ပြန်ချက်အရ Best Oil Co..,ltd သည် ဝင်ငွေခွန် ကျပ်သန်း(၃၀၀၀)ကျော်နှင့် ကုန်သွယ်လုပ်ငန်းခွန် ကျပ်သန်း(၃၀၀၀)ကျော် ထမ်းဆောင်ခဲ့ပြီး မန္တလေးတိုင်း ဒေသကြီးအတွင်း အခွန်အများဆုံး ပေးဆောင်သူအဖြစ် အဆင့်(၁)နေရာ၌ ရပ်တည်နေသည်။
လွန်ခဲ့သည့် ၂၀၁၇-၂၀၁၈ အခွန်စည်းကြပ်နှစ်နှင့် နှိုင်းယှဉ်ပါက ယခု ၂၀၁၈-၂၀၁၉ အခွန်စည်းကြပ်နှစ်တွင် မန္တလေးတိုင်းဒေသကြီးအတွင်းရှိ လုပ်ငန်းရှင်များ၏ အခွန်ထမ်းဆောင်မှု ပမာဏ မြင့်တက်လာကြောင်း ပြည်တွင်းအခွန်များ ဦးစီးဌာန၊ မန္တလေးတိုင်းဒေသကြီး ညွှန်ကြားရေးမှူး ဦးထွန်းထွန်းအောင်က Mandalay In-depth News အား ပြောသည်။
ပြည်တွင်းအခွန်များ ဦးစီးဌာနအနေဖြင့် အခွန်ခုနှိမ်ခွင့်ပုံစံများ ထုတ်ပေးခဲ့ရာ အခွန်ထမ်းဆောင်ရသည့် ပမာဏ လျော့နည်းသွားခြင်းကြောင့် ယခုကဲ့သို့ အခွန်ဆောင်မှု ပမာဏ မြင့်တက်လာခြင်းဖြစ်သည်ဟု ၎င်းက ဆိုသည်။
“အခွန်ထမ်းတွေရဲ့ လိုက်နာမှု အားကောင်းလာတယ်။ ဘာလို့လဲဆိုတော့ ဥပမာ ကုန်သွယ်လုပ်ငန်းခွန်မှာဆို ခုနှိမ်ခွင့်တွေ ပေးထားတယ်။ ရုံးတွေကနေ ခုနှိမ်ခွင့်ပုံစံတွေ ထုတ်ယူတယ်။ သက်ဆိုင်ရာ သူတို့ဆီက ဝယ်တဲ့သူတွေကို ပေးတယ်။ အဲဒီကနေ အခွန်ခုနှိမ်ခွင့်တွေ ရတော့ သူတို့ အခွန်ဆောင်ရတာက နှိမ်နှိမ်ပြီး ပေးရတယ်။ တင်သွင်းတဲ့သူက သက်ဆိုင်ရာ အခွန်ဆောင်ပြီးပြီ၊ အခွန်ခုနှိမ်ခွင့် ပုံစံနဲ့ကျတော့ ပေးရမယ့် အခွန်ကိုမှ အရင်လူဆောင်ထားတဲ့ အခွန်ကသက်သာခွင့် ရတယ်၊ သူတင်တဲ့ အမြတ်ကိုပဲ အခွန်ပေးရမှာ။ အဲဒီတော့ အခွန်ပေးရတာ သက်သာလာတော့ သူတို့ အခွန်ပိုဆောင်လာတယ်။ ကုန်သွယ်လုပ်ငန်းခွန်ကို မှန်မှန်တင်တော့ ဝင်ငွေခွန်ကိုလည်း စည်းကြပ်နိုင်တယ်။ ဝင်ငွေခွန်ကို စည်းကြပ်နိုင်လို့ ဝင်ငွေခွန် ပမာဏက များလာတယ်”ဟု ဦးထွန်းထွန်းအောင်က ပြောသည်။
မန္တလေးတိုင်းအတွင်း ဝင်ငွေခွန် အများဆုံး ထမ်းဆောင်သူစာရင်းတွင် (၂)နှစ်ဆက်တိုက် အဆင့်(၁)နေရာ ရှိခဲ့သည့် Best Oil Co..,ltd ၏ အခွန်ထမ်းဆောင်သည့် ပမာဏမှာ တစ်နှစ်အတွင်း နှစ်ဆကျော် မြင့်တက်ခဲ့သည်။
Best Oil Co..,ltd သည် ၂၀၁၈-၂၀၁၉ အခွန်စည်းကြပ်နှစ်အတွက် ဝင်ငွေခွန် ကျပ်သန်း (၃၀၀၀)ကျော် ထမ်းဆောင်ခဲ့ပြီး ၂၀၁၇-၂၀၁၈က ဝင်ငွေခွန် ထမ်းဆောင်မှု ကျပ်သန်း(၁၂၀၀)ကျော် ရှိခဲ့သည်ဟု မန္တလေးတိုင်း ပြည်တွင်းအခွန်များဦးစီးဌာနမှ သတင်းရရှိသည်။
၂၀၁၈-၂၀၁၉ အခွန်စည်းကြပ်နှစ်အတွက် မန္တလေးတိုင်းဒေသကြီးအတွင်း ဝင်ငွေခွန် အများဆုံးထမ်းဆောင်သူများ စာရင်းတွင် Best Oil Co..,ltd က ကျပ်သန်း(၃၀၀၀)ကျော်ဖြင့် အဆင့်(၁) (တစ်နိုင်ငံလုံးတွင် အဆင့် ၁၈)၊ Hlyan Lone ကုမ္ပဏီက ကျပ်သန်း(၇၀၀)ကျော်ဖြင့် အဆင့်(၂) (တစ်နိုင်ငံလုံးတွင် အဆင့်၁၁၆)နှင့် Kyaw Nyo Myat Trading ကုမ္ပဏီက ကျပ်သန်း(၅၀၀)ကျော်ဖြင့် အဆင့်(၃) (တစ်နိုင်ငံလုံးတွင် အဆင့် ၁၅၈) ဖြစ်သည်။
Hlyan Lone ကုမ္မဏီသည် လွန်ခဲ့သည့် ၂၀၁၇-၂၀၁၈ အခွန်စည်းကြပ်နှစ်က မန္တလေးတိုင်းအတွင်း ဝင်ငွေခွန် အများဆုံးထမ်းဆောင်သူ စာရင်းတွင် အဆင့်(၃)သာ ရှိခဲ့ရာမှ ၂၀၁၈-၂၀၁၉တွင် အခွန်ထမ်းဆောင်မှု အဆင့်(၂)နေရာသို့ မြင့်တက်လာခြင်းဖြစ်သည်။ ၂၀၁၇-၂၀၁၈ က မန္တလေးတိုင်းအတိုင်း ဝင်ငွေခွန် ထမ်းဆောင်မှု အဆင့်(၂)နေရာတွင် ရှိခဲ့သော New Star Light ဆောက်လုပ်ရေးကုမ္မဏီမှာမှု ၂၀၁၈-၂၀၁၉တွင် အဆင့်(၅)နေရာအထိ ကျဆင်းခဲ့သည်။
ထို့အပြင် ၂၀၁၈-၂၀၁၉ အခွန်စည်းကြပ်နှစ်အတွက် မန္တလေးတိုင်းအတွင်း ကုန်သွယ်လုပ်ငန်းခွန် အများဆုံးထမ်းဆောင်သည့် လုပ်ငန်းရှင်များ စာရင်းတွင်လည်း Best Oil Co..,ltd ကုမ္ပဏီကပင် အဆင့်(၁)နေရာ၌ ရပ်တည်နေပြီး ကျပ်သန်း(၃၀၀၀)ကျော် အခွန်ထမ်းဆောင်ခဲ့ကြောင်း ပြည်တွင်းအခွန်များ ဦးစီးဌာနမှ သတင်းရရှိသည်။
အဆိုပါစာရင်းတွင် Kyaw Nyo Myat Trading ကုမ္ပဏီက သန်း(၁၀၀၀)ကျော်ဖြင့် အဆင့်(၂)နှင့် New Ever Light လျှပ်စစ်ဓါတ်အား ဖြန့်ဖြူးရောင်းချခြင်း ကုမ္ပဏီက ကျပ်သန်း(၅၀၀)ကျော်ဖြင့် အဆင့်(၃)နေရာတွင် ရပ်တည်ခဲ့သည်။
တစ်နိုင်ငံလုံးအတိုင်းအတာဖြင့် ကုန်သွယ်လုပ်ငန်းခွန်အများဆုံး ထမ်းဆောင်ခဲ့သူများ စာရင်းတွင် Best Oil Co..,ltd က အဆင့် (၄၅) ၊ Kyaw Nyo Myat Trading ကုမ္ပဏီက အဆင့်(၁၁၆)နှင့် New Ever Light ကုမ္ပဏီက အဆင့်(၂၁၀)တွင် ရပ်တည်သည်။ BOC ကုမ္ပဏီသည် ၂၀၁၇-၂၀၁၈ အခွန်စည်းကြပ်နှစ်က မန္တလေးတိုင်းတွင် ကုန်သွယ်လုပ်ငန်းခွန် အများဆုံးထမ်းဆောင်သူစာရင်းတွင် အဆင့်(၆)၊ တစ်နိုင်ငံလုံးတွင် အဆင့်(၁၅၁)သာ ရှိခဲ့သည်။
၂၀၁၇-၂၀၁၈ အခွန်စည်းကြပ်နှစ်တွင် မန္တလေးတိုင်းဒေသကြီးအတွင်း ကုန်သွယ်လုပ်ငန်းခွန် အများဆုံးထမ်းဆောင်ခဲ့သူများ စာရင်းတွင် အဆင့်(၁)နေရာ ရှိခဲ့သည့် ဒေါ်သန္တာဦး၊ အဆင့်(၂)နေရာ ရှိခဲ့သည့် Arr Thit Man ကုမ္ပဏီနှင့် အဆင့်(၃)နေရာ ရှိခဲ့သည့် New Star Light ဆောက်လုပ်ရေး ကုမ္ပဏီတို့မှာ ၂၀၁၈-၂၀၁၉ အခွန်စည်းကြပ်နှစ် မန္တလေးတိုင်းအတွင်း ကုန်သွယ်လုပ်ငန်းခွန် အများဆုံးထမ်းဆောင်ခဲ့သည့် လုပ်ငန်းရှင် (၅၀)ဦးစာရင်းတွင် ပါဝင်လာခြင်း မရှိတော့သည်ကို တွေ့ရသည်။
၂၀၁၈-၂၀၁၉ အခွန်စည်းကြပ်နှစ်အတွက် ဝင်ငွေခွန်နှင့် ကုန်သွယ်လုပ်ငန်းခွန် အများဆုံးထမ်းဆောင်ခဲ့သည့် လုပ်ငန်းရှင်များကို ဂုဏ်ပြုပွဲ ကျင်းပပေးမည်ဖြစ်ပြီး မန္တလေးတိုင်း ဝန်ကြီးချုပ်ထံ တင်ပြကာ နေ့ရက်သတ်မှတ်မည် ဖြစ်ကြောင်း စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ပြည်တွင်းအခွန်များ ဦးစီးဌာန၊ မန္တလေးတိုင်းဒေသကြီး ညွှန်ကြားရေးမှူး ဦးထွန်းထွန်းအောင်က ပြောသည်။
.