မောင်မင်းမော်၊ ဒီဇင်ဘာ-၁၉
မန္တလေးမြို့တွင် လမ်းမီးတိုင်နှင့် လမ်းညွှန်ဆိုင်းဘုတ် အသစ်များ စိုက်ထူရန်အတွက် အများပြည်သူများမှ ထည့်ဝင်လှူဒါန်းငွေ ကျပ်သိန်းနှစ်သောင်းကျော် ရရှိထားကြောင်း မန္တလေးမြို့တော် စည်ပင်သာယာရေး ကော်မတီ တာဝန်ရှိသူများက ပြောသည်။
မန္တလေးမြို့တော် စည်ပင်သာယာ အနေဖြင့် လာမည့် ၂၀၂၀ အောက်တိုဘာတွင် မန္တလေးမြို့အနှံ့ မီးလင်းစေရန် စည်ပင်ဘဏ္ဍာငွေအပြင် အလှူရှင်များ၏ လှူဒါန်းမှုဖြင့် လမ်းမီးတိုင်ပေါင်း တစ်သောင်းကျော် စိုက်ထူမည် ဖြစ်သည်။
ထို့အပြင် မန္တလေးမြို့ပေါ်ရှိ လမ်းအမည်များ စနစ်တကျ ဖြစ်စေရန်အတွက် နံပါတ်စဉ်ဖြင့် လမ်းအမည်ပေးမည်ဖြစ်ပြီး မှားယွင်းပျက်စီးနေသည့် လမ်းညွှန်ဆိုင်းဘုတ်များ နေရာတွင် လမ်းညွှန်ဆိုင်းဘုတ် အသစ်များကို မကြာမီရက်ပိုင်းအတွင်း ပြောင်းလဲ စိုက်ထူးတော့မည်ဖြစ်ကြောင်း စည်ပင်သာယာ တာဝန်ရှိသူများက ဆိုသည်။
မန္တလေးမြို့ မီးလင်းရေးအတွက် လမ်းမီးတိုင်စိုက်ထူရန် အလှူရှင်များ၏ လှူဒါန်းငွေ ကျပ်သိန်း တစ်သောင်းကျော်ရှိကြောင်း မန္တလေးမြို့တော် စည်ပင်သာယာရေး ကော်မတီဝင် ဦးကျော်ဆန်းမြင့်က ပြောသည်။
“အလှူရှင်တွေရဲ့ အလှူကလည်း တော်တော်များပါတယ်။ သိန်းပေါင်းကို သောင်းနဲ့ချီနေတာပါ။ အလှူရှင်တွေ မပါဘဲနဲ့ မြို့တော်စည်ပင်ရဲ့ ဘတ်ဂျက်နဲ ထွန်းမယ်ဆိုရင် ဒီလောက် မြန်မြန်ဆန်ဆန် လွယ်လွယ်ကူကူ ပြီးမှာ မဟုတ်ပါဘူး”ဟု လမ်းမီးတိုင်အတွက် လှူဒါန်းမှုများနှင့် ပတ်သက်၍ ဦးကျော်ဆန်းမြင့်က ပြောသည်။
လမ်းမီးတိုင်အသစ်များ စိုက်ထူရာတွင် ယခင်ရှိနှင့်ပြီးသော မီးတိုင်အဟောင်းများကို ဖြုတ်သိမ်းကာ လိုအပ်သည့် လမ်းသွယ်များတွင် ပြန်လည် အသုံးပြုမည်ဟု စည်ပင်တာဝန်ရှိသူများက ပြောသည်။
အသစ်စိုက်ထူမည့် လမ်းမီးတိုင်များသည် မီးလုံးနှစ်ဖက်ပါသည့် မီးတိုင်တစ်တိုင်လျင် ကျပ်(၁၀)သိန်းနှင့် မီးလုံးတစ်ဖက်သာ ပါသည့် မီးတိုင်တစ်တိုင်လျှင် ကျပ်(၇၅၀၀၀၀) တန်ကြေးရှိသည်။
ထို့အပြင် လမ်းညွှန်ဆိုင်းဘုတ် အသစ်များ စိုက်ထူရန်အတွက် တစ်တိုင်လျှင် ကျပ် ခြောက်သောင်း ကုန်ကျမည်ဖြစ်ပြီး အလှူရှင်များမှ လမ်းညွှန်ဆိုင်းဘုတ် တိုင်းပေါင်း တစ်သောင်းခုနှစ်ထောင် နီးပါးအတွက် အလှူငွေများ လှူဒါန်းထားသည်ဟု မန္တလေးမြို့တော် စည်ပင်သာယာရေးကော်မတီ မြို့ပြစီမံကိန်းနှင့် မြေစီမံခန့်ခွဲမှုဌာနမှ ဌာနစုမှူး ဒေါက်တာစုလွင်ဝေက Mandalay In-depth News အား ပြောသည်။
“မန္တလေးမြို့ထဲမှာ လမ်းဆိုင်းဘုတ် စိုက်လို့ရတဲ့ နေရာကတော့ တစ်သောင်းရှစ်ထောင်ကျော် ရှိပါတယ်။ ကုမ္ပဏီတွေကနေမှ လာပြီး လှူဒါန်းတာကတော့ တစ်သောင်းခုနှစ်ထောင်နီးပါး ရှိပါတယ်” ဟု ဒေါက်တာစုလွင်ဝေက ပြောသည်။
လမ်းညွှန်ဆိုင်းဘုတ် အသစ်စိုက်ထူရာတွင် သိပ္ပံလမ်းကို (၁၀၁)လမ်းအဖြစ် သတ်မှတ်၍ ၎င်းလမ်းမှစတင်ကာ ပန်းပဲမင်းကြီးလမ်း (၁၄၃)အထိ အဓိကလမ်းမကြီးများကို နံပါတ်စဉ်အလိုက် သတ်မှတ်မည် ဖြစ်သည်။ လမ်းသွယ်များကိုမူ နံပါတ်စဉ်နှင့်တွဲကာ Aလမ်း၊ Bလမ်းများအဖြစ် သတ်မှတ်မည်ဖြစ်ကြောင်း မန္တလေး မြို့တော်ဝန် ဒေါက်တာရဲလွင်က သူ၏ ဖေ့စ်ဘွတ်ခ် စာမျက်နှာတွင် ရေးသားဖော်ပြထားသည်။
နံပါတ်စဉ်များပေး၍ လမ်းအမည်များ သတ်မှတ်သော်လည်း ယခင်ရှိနှင့်ပြီးသော လမ်းအမည်ကို ပြောင်းလဲမည်မဟုတ်ဘဲ နံပါတ်၏ အောက်တွင် ယခင်လမ်းအမည်ပါ ရေးထိုးထားမည်ဟု ဆိုသည်။
လမ်းညွှန်ဆိုင်းဘုတ် စိုက်ထူရန် လှူဒါန်းသည့် ကုမ္ပဏီနှင့် လုပ်ငန်းရှင်များအတွက်လည်း ၎င်း ဆိုင်းဘုတ် အောက်ခြေတွင် လုပ်ငန်းကြော်ငြာဘုတ်များ တပ်ဆင်ကာ (၂)နှစ်အထိ အခမဲ့ကြော်ငြာခွင့် ပြုမည်ဖြစ်ကြောင်း မန္တလေးမြို့တော် စည်ပင်သာယာရေးကော်မတီ တာဝန်ရှိသူများက ပြောသည်။