မောင်မင်းမော်၊ နိုဝင်ဘာ-၂၆
မန္တလေးမြို့တွင် ယခုဘဏ္ဍာနှစ် နှစ်လအတွင်း ယာဉ်အပ်နှံခ ပိုမိုကောက်ခံသူ နှစ်ဦးနှင့် စည်ပင်သာယာမှ လေလံချထားပေးခြင်း မရှိဘဲ ယာဉ်အပ်နှံနေရာ ပြုလုပ်ကာ ငွေကောက်ခံနေသည့် လမ်း(၃၀)ပေါ်ရှိ ပုဂ္ဂလိက ဆေးရုံတစ်ရုံတို့ကို ဒဏ်ရိုက်အရေးယူထားကြောင်း မန္တလေး မြို့တော် စည်ပင်သာယာရေး ကော်မတီမှ သတင်းရရှိသည်။
ပြီးခဲ့သည့် ကျောက်တော်ကြီးဘုရားပွဲ၌ ယာဉ်အပ်နှံခ ပိုမိုကောက်ခံသူ နှစ်ဦးနှင့် လေလံချထားခြင်း မရှိဘဲ ယာဉ်အပ်နေရာ ပြုလုပ်ကာ ငွေကြေးကောက်ခံသည့် ပုဂ္ဂလိကဆေးရုံတို့ကို ကျပ် နှစ်သိန်းစီ ဒဏ်ရိုက်အရေးယူခဲ့ခြင်း ဖြစ်သည်ဟု မန္တလေးမြို့တော် စည်ပင်သာယာရေး ကော်မတီဝင် ဦးကျော်ဇောအောင်က Mandalay In-depth news သို့ ပြောသည်။
ယာဉ်အပ်နှံခ ပိုမိုကောက်ခံနေသည်ကို စိစစ်တွေ့ရှိပါက ပထမအကြိမ်တွင် သတိပေးမည်ဖြစ်ပြီး ဒုတိယအကြိမ် ထပ်မံဖောက်ဖျက်ပါက ကျပ်နှစ်သိန်းနှင့် တတိယအကြိမ်တွင် ကျပ်ငါးသိန်း ဒဏ်ရိုက်အရေးယူမည်ဖြစ်ပြီး ထပ်မံဖောက်ဖျက်ပါက လိုင်စင်ပိတ်သိမ်းသည်အထိ အရေးယူမည်ဖြစ်ကြောင်း ၎င်းက ဆိုသည်။
“စည်ပင်သာယာကနေ တရားဝင် ခွင့်ပြုမထားဘဲနဲ့ မိဘပြည်သူတွေ အပေါ်မှာ တရားမဝင်ကောက်တာတွေ၊ အပ်နှံခ ပိုကောက်တာတွေ ရှိခဲ့ရင် စည်ပင်သာယာကို လာရောက်တိုင်ကြားနိုင်ပါတယ်။ စစ်ဆေးပြီး ဒဏ်ရိုက်အရေးယူမှာပါ” ဟု ဦးကျော်ဇောအောင်က ပြောသည်။
မန္တလေးမြို့တွင် အများနှင့်သက်ဆိုင်သည့် ဆေးရုံ၊ဈေး၊ကျောက်မျက်စခန်း စသည့် နေရာများတွင် စည်ပင်သာယာမှ လေလံချပေးထားသည့် ယာဉ်အပ်နှံရာ နေရာများရှိရာ ယာဉ်အပ်ခနှုန်းထားအနေဖြင့် ဆိုင်ကယ်တစ်စီးလျှင် ၂၀၀ကျပ်၊ ကားတစ်စီးလျှင် ၃၀၀ကျပ်ကောက်ခံရန် စည်ပင်သာယာမှ သတ်မှတ်ပေးထားသည်။
ယာဉ်အပ်ခပိုမိုကောက်ခံခြင်း၊ လေလံပေးထားခြင်းမရှိသည့် နေရာများတွင် ယာဉ်အပ်နှံနေရာ ပြုလုပ်၍ ငွေတောင်းခံခြင်းများ တွေ့ရှိပါက မန္တလေးမြို့တော် စည်ပင်သာယာရေးကော်မတီ အခွန်ဌာနခွဲမှူးဆီသို့ တိုင်ကြားနိုင်သည်ဟု ဆိုသည်။
ပြီးခဲ့သည့်ဘဏ္ဍာနှစ်ကလည်း ယာဉ်အပ်နှံခ ပိုမိုကောက်ခံသူ (၂၀)ကျော်ကို အရေးယူခဲ့ကြောင်း ဦးကျော်ဇောအောင်က ပြောသည်
မန္တလေးမြို့တော်စည်ပင်သာယာအနေဖြင့် ဈေး၊ ဆေးရုံ၊ မိုတယ်၊ ဟိုတယ်နှင့် စားသောက်ဆိုင် စသည့်နေရာများတွင် ယာဉ်ရပ်နားရာ နေရာများအဖြစ်သတ်မှတ်ကာ တစ်နှစ်လျှင် တစ်ကြိမ် လေလံချထားပေးပြီး အဆိုပါနေရာများတွင် ယာဉ်အပ်နှံရာနေရာအဖြစ် တစ်စတုရန်းပေကို တစ်လလျှင် ကျပ်သိန်း(၂၃၀)၊ အချို့သော စူပါမားကက်များကို တစ်လလျှင် ကျပ်သိန်း (၅၀၀)ဖြင့် လေလံချထားပေးကြောင်း စည်ပင်အခွန်ဌာနမှ ဌာနမှူး ဦးသက်နိုင်က ပြောသည်။
မန္တလေးမြို့တော်စည်ပင်သာယာမှ စည်ပင်နယ်နိမိတ်အတွင်း ချထားပေးခဲ့သည့် လေလံစုစုပေါင်း (၅၀၀)နီးပါးရှိကြောင်း စည်ပင်သာယာ အခွန်ဌာနမှ သတင်းရရှိသည်။