တရုတ်နယ်စပ်တွင် ဖရဲ၊သခွား စံချိန်တင်ဈေးကောင်းရ၊ တရုတ်နှစ်ကူးမတိုင်မီအထိ ဈေးကောင်းနိုင်ဟုဆို

ဘုန်းနေ၊ ဇန်နဝါရီ ၁၆

တရုတ်-မြန်မာ နယ်စပ် မူဆယ်ဈေးကွက်တွင် ဖရဲ၊သခွားများ ဈေးကောင်းရနေပြီး ငါးနှစ်အတွင်း အမြင့်ဆုံးဈေးဖြင့် ရောင်းချနေရကြောင်း မူဆယ်ဒေသ သစ်သီးကုန်သည်များက ပြောသည်။

တရုတ်နှစ်သစ်ကူးကာလ မတိုင်မီ မူဆယ်နယ်စပ်သို့ မြန်မာ့ဖရဲ၊သခွားများ ဝင်ရောက်လာမှု လျှော့နည်းခြင်းနှင့် ရာသီဥတုအခြေအနေအရ တရုတ်နိုင်ငံတွင်း ဖရဲ၊သခွား စိုက်ပျိုးထွက်ရှိမှု နည်းပါးခဲ့ခြင်းကြောင့် ယခုကဲ့သို့ ဈေးကောင်းရခြင်းဖြစ်ကြောင်း သစ်သီးဝလံကုန်သည်များက ဆိုသည်။

“တရုတ်နှစ်သစ်ကူးနဲ့ ကြုံနေသလို၊ တရုတ်ဘက်ကလည်း အသီး လိုအပ်ချက် ရှိနေတယ်။ နှစ်သစ်ကူး မတိုင်မီ နှစ်ရက်လောက်အထိ ရောက်လာတဲ့ ကားတွေက ဈေးကောင်းရနိုင်သေးတယ်။ နှစ်သစ်ကူူး အပြီး မှာတော့ ချက်ချင်း ဈေးကွက် ပြန်မကောင်းနိုင်သေးဘူး” ဟု မူဆယ်၊ နယ်စပ် ကုန်သွယ်ရေးဇုံ  အတွင်းရှိ ခွာညို သစ်သီး ပွဲရုံပိုင်ရှင် ဦးစိုင်းခင်မောင် က Mandalay In-depth News အား ပြောသည်။

Photo – ခွာညိုသစ်သီးပွဲရုံ

တရုတ်နိုင်ငံတွင် ရာသီဥတုကြောင့် ဖရဲသီး အထွက်နှုန်း (၁၀)ရခြိုင်နှုန်းဝန်းကျင် လျော့ကျခဲ့သောကြောင့် မြန်မာ့ဖရဲများ ဝယ်လိုအား မြင့်တက်လာခဲ့သလို မြန်မာပြည်တွင်းတွင်လည်း ဖရဲစိုက်ဧက လျှော့ကျပြီး   အထွက်နည်းခဲ့သောကြောင့် လတ်တလော မူဆယ်နယ်စပ်ဈေးကွက်အတွင်း စံချိန်တင် ဈေးကောင်းနေခြင်းဖြစ်သည်ဟု ဦးစိုင်းခင်မောင်က သုံးသပ်သည်။

မြန်မာ့ ဖရဲ၊သခွားစိုက် တောင်သူများအနေဖြင့်လည်း ပြီးခဲ့သည့် သြဂုတ်လအတွင်းက စိုက်ပျိုးခဲ့သည့် ဖရဲ၊သခွားများ အထွက်နှုန်းနှင့် ဈေးကွက်အခြေအနေကြောင့် ရံှုးနိမ့်ခဲ့ရာ နောက်တစ်သီး ဆက်လက်စိုက်ပျိုးရန် ငွေကြေးအခက်အခဲများ ရှိခဲ့ပြီး ဖရဲစိုက်ပျိုးမှု လျော့ကျခဲ့ကြောင်း၊ ထို့အတွက် ဖရဲအထွက်နှုန်း လျော့ကျပြီး ယခုကဲ့သို့ ဈေးကောင်းရခြင်း ဖြစ်နိုင်ကြောင်း မုံရွာဒေသမှ ဖရဲစိုက်တောင်သူ ဦးသစ္စာက ပြောသည်။

“ဒီဈေးကတော့ ရောင်းသူ ဝယ်သူအကြား မျှတတဲ့ ဈေးနှုန်းပါ။ အကြံပြုချင်တာက အခုလို ကောင်းမွန်တဲ့ ဈေးကွက် တစ်ခုကို တောင်သူက ထိန်းသိမ်းရမှာ။ အစီးပြတ် (ကားတစ်စီးအပြတ်) ဆိုရင် အပေါ်မှာ ကောင်းတာပြထားပြီး အောက်မှာ အညံ့တွေပါလာတယ်။ အဲဒီတော့ ကောင်းမွန်တဲ့ အလားအလာကို တောင်သူက ဖျက်သလို ဖြစ်ဖြစ်နေတယ်” ဟု ၎င်းက ဆိုသည်။

Photo – ခွာညိုသစ်သီးပွဲရုံ

မူဆယ် နယ်စပ်ကုန်သွယ်ရေးဇုန်ရှိ ခွာညိုသစ်သီးပွဲရုံ၏ ဇန်နဝါရီ(၁၆)ရက် ထုတ်ပြန်ချက်များအရ ဖရဲသီးအမျိုးအစားပေါ် မူတည်၍ (၁၅)တန်ပါ ဖရဲသီးကားတစ်စီးလျှင် အမြင့်ဆုံးဈေး ကျပ်သိန်း(၁၀၀)ဝန်းကျင်နှင့် အနိမ့်ဆုံးဈေး ကျပ်သိန်း(၃၀)ကျော် ဖြစ်သည်။

သခွားသီး ဈေးနှုန်းများမှာလည်း သခွားအမျိုးအစားပေါ် မူတည်၍ တစ်ကီလိုလျင် (၁၃၅၀)ကျပ်မှ ကျပ်(၇၀၀)ကျော် ဖြစ်သည်။

ယခင်က မူဆယ်ကုန်သွယ်ရေးဇုန်သို့ တစ်ရက်လျင် ဖရဲသီးကား စီးရေ(၅၀၀)ခန့်နှင့် သခွားကား စီးရေ (၃၀၀)ခန့် ဝင်ရောက်မှု ရှိခဲ့သော်လည်း လက်ရှိတွင် ဖရဲ၊သခွားကားများ ဝင်ရောက်မှု ထက်ဝက်ကျော် လျှော့နည်းနေသည်ဟု ခွာညိုသစ်သီးပွဲရုံမှ ဦးစိုင်းခင်မောင်က ပြောသည်။

ဇန်နဝါရီ (၂၃)၊(၂၄)နှင့်(၂၅)ရက်များသည် တရုတ်နှစ်သစ်ကူးကာလ ရုံးပိတ်ရက်များဖြစ်ပြီး အဆိုပါ ရက်များတွင် တရုတ်နိုင်ငံဘက်ရှိ အကောက်ခွန်ဌာနရုံးများ ပိတ်ထားမည်ဖြစ်ရာ နယ်စပ်ကုန်သွယ်ရေးဇုန်တွင်လည်း ဖရဲ၊ သခွားရောင်းချမှု သုံးရက် ရပ်နားထားမည် ဖြစ်ကြောင်း မူဆယ်နယ်စပ်ကုန်သည်များက ပြောသည်။

Photo – ခွာညိုသစ်သီးပွဲရုံ

တရုတ်-မြန်မာနယ်စပ်တွင် ယနေ့ ငွေကြေးလဲလှယ်နှုန်းမှာ တစ်ယွမ်လျင် (၂၀၉)ကျပ် ဖြစ်သည်။

ပြန်စာထားခဲ့ပါ။

သင့် email လိပ်စာကို ဖော်ပြမည် မဟုတ်ပါ။ လိုအပ်သော ကွက်လပ်များကို * ဖြင့်မှတ်သားထားသည်