ဘုန်းနေ၊ ဖေဖေါ်ဝါရီ-၂၉
မန္တလေးမြို့တွင် ၂၀၁၇မှ ၂၀၁၉ သုံးနှစ်အတွင်း သောက်ဆုံးရန် မသင့်တော်သော ဆေးဝါးများ တွဲစပ်ရောင်းချသည့် ဆေးဆိုင်(၁၃)ဆိုင်ကို ယာယီပိတ်သိမ်း အရေးယူခဲ့ကြောင်း အစားအသောက်နှင့် ဆေးဝါးကွပ်ကဲမှု ဦးစီးဌာနခွဲ – FDA (မန္တလေး) တိုင်းဦးစီးမှူး ဒေါက်တာ နီနီအေး က Mandalay In-depth News အား ပြောသည်။
၂၀၁၇တွင် ဆေးဆိုင် ကိုးဆိုင်၊ ၂၀၁၈တွင် တစ်ဆိုင်နှင့် ၂၀၁၉တွင် သုံးဆိုင်၊ သုံးနှစ်အတွင်း ဆေးဆိုင် (၁၃)ဆိုင်ကို စီမံခန့်ခွဲမှု နည်းလမ်းများအရ သုံးလ ယာယီပိတ်သိမ်း အရေးယူခဲ့သည်ဟု ဒေါက်တာ နီနီအေးက ရှင်းပြသည်။
FDA (မန္တလေး)၏ မှတ်တမ်းများအရ သောက်သုံးရန် မသင့်တော်သော စပ်ဆေးရောင်း ချမှုဖြင့် အရေးယူခဲ့သော ဆေးဆိုင်အများစုသည် မန္တလေးမြို့ပေါ်ရှိ ဆေးဆိုင်များဖြစ်သည်။
“တွေ့ရင် ဆိုင်ပိတ်တယ်။ စီမံခန့်ခွဲမှု နည်းလမ်းများအရ သုံးလ ပိတ်တယ်။ နယ်က တစ်ဆိုင်လောက်ပဲပါတယ်။ ပညာပေးရတယ်။ တောရောမြို့ပါ မကျန် အသိပညာပေးရတယ်။ စပ်ဆေး ဆိုးကျိုးတွေကို။ စပ်ဆေးတွေကို လူတွေက ယဉ်ပါးနေကြတယ်။ သက်တမ်းလွန်ဆေး၊ လိုင်းဆေး (တရားဝင် မှတ်ပုံတင်ထားခြင်း မရှိသောဆေး) တွေ၊ စပ်ဆေးတွေကိုတော့ မန္တလေးတိုင်းမှာ တောက်လျှောက်စစ်နေတယ်” ဟု ဒေါက်တာ နီနိအေးက ဆိုသည်။
စပ်ဆေးရောင်းချသည့် ဆေးဆိုင်များကို FDA တာဝန်ရှိသူများက စစ်ဆေးခဲ့ရာ သက်တမ်းကုန်လွန် ဆေးဝါးများ၊ မှတ်ပုံတင်မထားသော ဆေးဝါးများ၊ ရောဂါအတွက် သုံးစွဲရန်မသင့်သော ဆေးဝါးများ ပါဝင်နေသလို အကိုက်အခဲပျောက်ဆေး၊ ချောင်းဆိုးပျောက်ဆေး၊ စတီးရိုက်(Steroid)ဆေးနှင့် ပဋိဇီဝဆေးများကို မလိုအပ်ဘဲ နှစ်မျိုးသုံးမျိုး စိတ်ထင်ရာ ပမာဏအမျိုးမျိုးဖြင့် ရောစပ်ပြီး အမှုန့်ကြိတ်ရောင်းချခြင်း အပါအဝင် ပုံသဏ္ဍာန် အမျိုးမျိုးပြုလုပ်ကာ စပ်ဆေးအဖြစ် ရောင်းချနေသည်ကို တွေ့ရသည်ဟု ကျန်းမာရေးနှင့် အားကစားဝန်ကြီးဌာနက ထုတ်ပြန်ထားသည်။
စပ်ဆေးများ သောက်သုံးခြင်းသည် ရောဂါလက္ခဏာကို ခေတ္တ သက်သာနိုင်သော်လည်း ရောဂါအမြစ်ပြတ် ပျောက်ကင်းစေရန် ကုသမှုခံယူခြင်း မဟုတ်သည့်အတွက် ရောဂါအခြေအနေ ပိုမိုဆိုးရွားစေနိုင်သလို အသက်အန္တရာယ်ရှိသည်အထိ ဖြစ်ပေါ်နိုင်သည်ဟု ဝန်ကြီးဌာနက သတိပေးသည်။
စပ်ဆေးများ ရောင်းချခြင်း မပြုရန် သတိပေးတားမြစ်ထားသလို စပ်ဆေးရောင်းချသည့် ဆေးဆိုင်များကို အမျိုးသားဆေးဝါး ဥပဒေအရ စစ်ဆေးအရေးယူလျှက် ရှိသော်လည်း ဆေးဆိုင်အများအပြားသည် စပ်ဆေးများ ဆက်လက် ရောင်းချလျှက်ရှိကြောင်း၊ ဆေးဆိုင်များအနေဖြင့် လူ့ကျင့်ဝတ်အရ စပ်ဆေးရောင်းချခြင်းကို လုံးဝ(လုံးဝ) ရှောင်ကြဉ်ကြရန်နှင့် အများပြည်သူ အနေဖြင့်လည်း စပ်ဆေးများ ဝယ်ယူ သုံးစွဲခြင်းမှ ရှောင်ရှားကြပါရန် ဝန်ကြီးဌာနက သတိပေး ထုတ်ပြန်ထားသည်။
သောက်သုံးရန် မသင့်တော်သည့် ဆေးဝါးများပါဝင်သည့် စပ်ဆေးများ/Photo – FDA
#Mandalay_Indepth_News
#Mandalay_News #FDA #ဆေး #စပ်ဆေး
.