ကိုနေကို၊ သြဂုတ်-၁၉
မိုင်းခွဲဖျက်ဆီးခံရသည့် ဂုတ်တွင်းတံတားနေရာတွင် နှစ်လမ်းသွားဘေလီတံတား အစားထိုးတည်ဆောက်လျှက်ရှိရာ မကြာမီပြီးစီးမည်ဖြစ်၍ မနက်ဖန်(သြဂုတ်၂၀)တွင် ပုံမှန်အတိုင်း ဖြတ်သန်းသွားလာနိုင်တော့မည်ဖြစ်ကြောင်း ဆောက်လုပ်ရေးဝန်ကြီးဌာန၊ လမ်းဦးစီးဌာနမှ အင်ဂျင်နီယာချုပ်(မြို့ပြ) ဦးအောင်မြင့်ထွန်းက ပြောသည်။
“ကြမ်းခင်းတွေခင်းပြီးတာနဲ့ ချင်းကပ်လမ်းတွေ လုပ်မယ်။ ကျွန်တော်တို့ မှန်းထားတာကတော့ ဒီနေ့ည ကိုးနာရီလောက်မှာ ခင်းဖြစ်မယ် ထင်ပါတယ်။ ပြီးရင် မနက်ဖြန် မနက်ပိုင်းမှာ စမ်းသပ်မောင်းနှင်မှုတွေ လုပ်မယ်။ စိတ်ချရပြီဆိုရင် ပြည်သူတွေကို ဖြတ်သန်းမောင်းနှင်ခွင့် ပြုမှာပါ”ဟု ၎င်းက ပြောသည်။
မန္တလေး-မူဆယ် ပြည်ထောင်စုလမ်းမကြီး နောင်ချိုနှင့် ကျောက်မဲမြို့အကြားရှိ ဂုတ်တွင်းတံတားမှာ သြဂုတ်(၁၅)ရက် နံနက်ပိုင်းက မိုင်းခွဲဖျက်ဆီးခံခဲ့ရသည်။ အဆိုပါ တံတားပျက်စီးခဲ့သည့်အတွက် လမ်းပန်းဆက်သွယ်ရေး ပြတ်တောက်ခဲ့ပြီး မန္တလေး-မူဆယ်အကြား ကုန်စည်စီးဆင်းမူ ရပ်တန့်နေသည်မှာ လေးရက်ကြာပြီဖြစ်သည်။
ထို့အတွက် မော်တော်ယာဉ်များ ဖြတ်သန်းသွားလာနိုင်ရန် ဆောက်လုပ်ရေးဝန်ကြီးဌာန၊ လမ်းဦးစီးဌာနမှ နှစ်လမ်းသွားဘေလီတံတား အစားထိုးတည်ဆောက်ခဲ့ခြင်း ဖြစ်သည်။
ပျက်စီးသွားသည့် ဂုတ်တွင်းတံတားကို ငုံကာ (၃)လွှာ တစ်ထပ်၊ အရှည်ပေ (၂၁၀)ရှိ နှစ်လမ်းသွား ဘေလီတံတား တပ်ဆင်တည်ဆောက်ခဲ့ခြင်း ဖြစ်ပြီး လမ်း၊တံတား အထူးအဖွဲ့ အင်ဂျင်နီယာများမှ အမြန်ဆုံး ပြီးစီးနိုင်ရေး ကြိုးစားဆောင်ရွက်ခဲ့ခြင်းဖြစ်ကြောင်း ဆောက်လုပ်ရေးဝန်ကြီးဌာန၊ တံတားဦးစီးဌာနမှ ညွှန်ကြားရေးမှူးချုပ် ဦးရွှေလေးက ပြောသည်။
တချိန်တည်းမှာပင် အဆိုပါ တံတားပျက်စီးခဲ့ပြီးနောက် လားရှိုးနှင့် သီပေါမြို့များတွင် ပိတ်မိနေသည့် ကမ္ဘာလှည့်ခရီးသွားများ အဆင်ပြေစေရန် အထူးလေယာဉ်ခရီးစဉ်များ ပြေးဆွဲပေးခဲ့ရာ လေယာဉ်လက်မှတ်များ ဈေးတင်ရောင်းချနေ၍ အရေးယူမည်ဖြစ်ကြောင်း Air KBZ လေကြောင်းလိုင်းက သတိပေးကြေညာသည်။
Air KBZ (ကမ္ဘောဇ လေကြောင်းလိုင်း)မှ ထပ်တိုး ပျံသန်းပြေးဆွဲလျက်ရှိသည့် လားရှိုး-ရန်ကုန်၊ လားရှိုး-မန္တလေးနှင့် လားရှိုး-ဟဲဟိုး ခရီးစဉ်များတွင် လေယာဉ်လက်မှတ်များကို သတ်မှတ်ဈေးနှုန်းထက် ဈေးနှုန်း မြင့်မားစွာ ရောင်းချမှုများ တွေ့ရှိရသည့်အတွက် ထိုသို့ လက်မှတ်ဈေးတင် ရောင်းချသူများကို အရေးယူမည်ဖြစ်ကြောင်း Air KBZ က လူမှုကွန်ရက် စာမျက်နှာတွင် ထုတ်ပြန်ကြေညာထားသည်။
လေကြောင်းခရီးစဉ်များ ထပ်တိုးပျံသန်းခြင်းမှာ ခရီးသွားပြည်သူများသွားလာရေး အဆင်ပြေလွယ်ကူစေရန် ဝန်ဆောင်မှုပေးခြင်းဖြစ်၍ ဈေးတင်ရောင်းချခြင်း မပြုရန် Air KBZ က သတိပေးထားသည်။
Air KBZ အနေဖြင့် သြဂုတ်(၁၇)မှ (၂၅)အထိ လားရှိုးလေဆိပ်မှတဆင့် လေကြောင်းခရီးစဉ်များ ထပ်တိုးပြေးဆွဲနေပြီး နေ့စဉ် လားရှိုး မှ ရန်ကုန်သို့ တစ်ကြိမ်၊ လားရှိုး မှ မန္တလေးသို့ နှစ်ကြိမ်နှင့် လားရှိုး မှ ဟဲဟိုးသို့ တစ်ကြိမ် ပျံသန်းပေးလျှက်ရှိသည်။
အဆိုပါ ခရီးစဉ်များအတွက် Air KBZ မှ တရားဝင် သတ်မှတ်ထားသော လေယာဉ်လက်မှတ်ဈေးနှုန်းများမှာ လားရှိုး မှ ရန်ကုန်သို့ (၇၇-၉၅)ဒေါ်လာ၊ လားရှိုး မှ မန္တလေးသို့ (၅၀-၆၀)ဒေါ်လာ၊ လားရှိုး မှ ဟဲဟိုးသို့ (၄၅-၅၀)ဒေါ်လာ ဖြစ်သည်။
ဂုတ်တွင်းတွင် နှစ်လမ်းသွား ဘေလီတံတား အစားထိုးတပ်ဆင်နေစဉ်။ ဓါတ်ပုံ – နေကို