ဘုန်းနေ၊ မောင်မင်းမော်၊ နိုဝင်ဘာ-၂၂
မန္တလေးမြို့ ဈေးချိုပလာဇာ ညဈေးဖွင့်ရန် စီစဉ်နေပြီး လာမည့်နှစ်ဆန်းတွင် စတင်ဖွင့်လှစ်နိုင်ဖွယ် ရှိကြောင်း ညဈေး ဖြစ်မြောက်ရေး စီမံကိန်း တာဝန်ခံ ဒေါက်တာအောင်စိုးမြင့် က Mandalay In-depth News သို့ ပြောသည်။
ညဈေးဖွင့်မည့် မန္တလေး ဈေးချို ပလာဇာ ဒုတိယထပ်နှင့် တတိယထပ်တွင် မြန်မာမှု ပန်းဆယ်မျိုး အနုပညာ လက်ရာ ပစ္စည်းများ ပြသရာင်းချမည် ဖြစ်ပြီး အပေါ်ဆုံးထပ်တွင် မြန်မာ့ရိုးရာ အစားအစာများ အဓိက ရောင်းချသည့် အစားအသောက် ဈေးဆိုင်ခန်းများ ပါဝင်မည်ဖြစ်ကြောင်း ၎င်းက ဆိုသည်။
“အဓိကတော့ မြန်မာ့လက်မှု အနုပညာကို ကမ္ဘာက သိအောင်ပါ။ ဒီနား (ဈေးချိုတော်) တဝိုက်ကိုလည်း ပြန်ပြီး စည်ပင်စည်ကား လာအောင်လို့ပါ။ မြန်မာ့ အနုပညာကို ချပြနိုင်သလို အလုပ်အကိုင် အခွင့်အလမ်းတွေလည်း ရလာအောင်ပါ။ နိုင်ငံတကာ ခရီးသွားတွေအတွက် ရည်ရွယ် ဖွင့်လှစ်တာပေါ့။ ဈေးဆိုင်ခန်းတွေကို သက်သာစွာ ငှားရမ်းနိုင်အောင် စီစဉ်မှာပါ။ ဈေးနှုန်း အတိအကျတော့ မပြောနိုင်သေးဘူး” ဟု ဒေါက်တာအောင်စိုးမြင့်က ပြောသည်။
လာမည့် ဇန်နဝါရီတွင် စတင်ဖွင့်လှစ်မည့် ဈေးချိုပလာဇာ ညဈေးတွင် ပေ(၂၀)ပတ်လည်ရှိ ဈေးဆိုင်ခန်း အရေအတွက်(၇၀)ကျော် ပါဝင်မည်ဟု ဆိုသည်။
ယင်း ညဈေးသည် နိုင်ငံတကာ ခရီးသွားများအတွက် အဓိကရည်ရွယ်သော်လည်း မည်သူမဆို လာရောက်လေ့လာဝယ်ယူနိုင်ပြီး မြန်မာအစားအစာ ရောင်းချမည့် စားသောက်ဆိုင်ဈေးတန်းတွင် မြန်မာ့ခြင်းလုံး အလှပြခတ်ကစားသည့် အစီအစဉ်များ ထည့်သွင်းပြသနိုင်ရန်လည်း စီစဉ်ထားသည်ဟု ဒေါက်တာ အောင်စိုးမြင့် က ပြောသည်။
ဈေးချိုပလာဇာတွင် ညဈေးဖွင့်မည့် အစီအစဉ်သည် စည်ပင်သာယာက လုပ်ဆောင်ခြင်းမရှိဘဲ ပုဂ္ဂလိက အစီအစဉ်အနေဖြင့် ဆောင်ရွက်ခြင်း ဖြစ်နိုင်ကြောင်း မန္တလေးမြိုတော်စည်ပင် တာဝန်ရှိသူများက ပြောသည်။
ဈေးချို ပလာဇာသည် Five Ocean ကုမ္ပဏီက ပိုင်ဆိုင်သော အဆောက်အဦးဖြစ်ရာ စီမံခန့်ခွဲမှုနှင့် ပတ်သက်၍ စည်ပင်သာယာ ကော်မတီ၏ တိုက်ရိုက် အုပ်ချုပ်မှု အောက်တွင် မရှိကြောင်း မန္တလေးမြို့တော် စည်ပင်သာယာရေး ကော်မတီဝင် ဦးကျော်ဆန်းမြင့်က Mandalay In-depth News သို့ ပြောသည်။
ထို့အတွက် ဈေးချိုပလာဇာတွင် ပြုလုပ်မည့် အကြောင်းအရာများကို စည်ပင်သာယာထံ တင်ပြခွင့်တောင်းရန်သာ လိုအပ်ပြီး ညဈေးဖွင့်မည့် အစီအစဉ်နှင့်ပတ်သက်၍မူ လာရောက် အကြောင်းကြားခြင်း မရှိသေးကြောင်း ၎င်းက ဆိုသည်။
“ဆိုင်ခန်းလေးတွေ ဖွင့်ချင်ပါတယ်။ ပြီးတော့ မီးလေးတွေနဲ့ အလှဆင်ပြီး ကြော်ငြာ ချင်တာလေးတွေကို လာပြီး ခွင့်တောင်းရုံပါပဲ။ ဒီလို ဈေးဖွင့်လှစ်မှာကို ကြိုဆိုပါတယ်။ ခွင့်မပြု စရာ အကြောင်းလည်း မရှိဘူး။ လက်ရှိ အချိန်ထိတော့ စည်ပင်သာယာရေး ကော်မတီကို လာအကြောင်းကြားတာ၊ ခွင့်တောင်းတာ မရှိသေးဘူး။ ဈေးချိုပတ်ဝန်းကျင် စည်ကားအောင် တိုးတက်အောင် လုပ်တဲ့အပေါ် နှစ်သက်တယ်။ သဘောကျတယ်” ဟု ဦးကျော်ဆန်းမြင့်က ပြောသည်။
ဈေးချိုပလာဇာ ညဈေး ဖွင့်လှစ်ပြီးပါက ဝင်ကြေး ကောက်ခံမည် မဟုတ်ဘဲ သာမန်ဈေးဆိုင်များကဲ့သို့ ဝင်ထွက်နိုင်ပြီး ပစ္စည်းဝယ်ယူခြင်းနှင့် စားသောက်ခြင်းများအတွက် မြန်မာကျပ်ငွေသာမက အဆင်ပြေသည့် ငွေကြေးဖြင့် ပေးချေနိုင်ရန် စီစဉ်ထားကြောင်း ဒေါက်တာ အောင်စိုးမြင့်က ဆိုသည်။
မန္တလေးဈေးချို ပလာဇာသည် မန္တလေးမြို့ ချမ်းအေးသာစံမြို့နယ် ၂၆လမ်းနှင့် ၈၆လမ်းထောင့်တွင် တည်ရှိသည်။
လက်ရှိတွင် မန္တလေးမြို့၌ ညဈေး(၄)ဈေး ရှိသော်လည်း ၈၄ လမ်း၊ ၂၆ လမ်းနှင့် လမ်း ၃၀ ကြားရှိ ဈေးချိုတော် ညဈေးတန်းတွင်သာ အဝတ်အထည်၊ လူသုံးကုန်နှင့် စားသောက်ဆိုင်တန်းများ ရှိပြီး အခြားညဈေးများမှာ ကုန်စိမ်းဈေး၊ ပန်းဈေးနှင့် တရုတ်တန်းညဈေးတို့ ဖြစ်သည်။
မန္တလေးမြို့တော် စည်ပင်သာယာရေး ကော်မတီအနေဖြင့်လည်း မန္တလေးမြို့ အောင်မြေသာစံမြို့နယ် ကျုံးအရှေ့ဖက် (၁၄)လမ်းတွင် ပြည်တွင်းပြည်ပ ခရီးသွားဧည့်သည်များအတွက် အဓိကရည်ရွယ်သည့် ညဈေးတစ်ခု ဖွင့်လှစ်နိုင်ရန် စီစဉ်နေသည်။
ညဈေးဖွင့်မည့် ဈေးချိုပလာဇာ/ Photo – Mg Min Maw (Mandalay In-depth News).