ကိုနေကို၊ အောက်တိုဘာ-၁၉
အိန္ဒိယနိုင်ငံ၏ ဝယ်ယူမှု မြင့်တက်လာခြင်းကြောင့် သီတင်းကျွတ်ကာလအပြီး တစ်ပတ်အတွင်း မတ်ပဲသုံးတင်းဝင် တစ်အိတ်လျှင် ကျပ်တစ်သောင်းကျော် ဈေးမြင့်တက်လာကြောင်း မန္တလေး ပဲ၊ နှမ်း ကုန်စည်ဒိုင်တွင် အရောင်းအဝယ်လုပ်ကိုင်နေသည့် ကုန်သည်များက ပြောသည်။
သီတင်းကျွန် မတိုင်မီ အောက်တိုဘာလဆန်းပိုင်းက မတ်ပဲ သုံးတင်းဝင် တစ်အိတ်လျင် ပဲအရည်အသွေးပေါ် မူတည်၍ ကျပ်(၇၅၀၀၀)ကျပ် မှ (၈၀၀၀၀)အထိသာ ပေါက်ဈေး ရှိခဲ့ရာမှ လက်ရှိတွင် မတ်ပဲ သုံးတင်းဝင်တစ်အိတ်လျှင် ကျပ်(၈၅၀၀၀)မှ (၉၀၀၀၀)အထိ ဈေးပေါက်နေကြောင်း မြင့်မားစံ ကုမ္ပဏီ၊ မိုးသစ္စာ ပဲ၊ နှမ်း ရောင်းဝယ်ရေး ပိုင်ရှင် ဦးတင်အောင်မိုး က ပြောသည်။
“ဘာကြောင့်တက်တာလဲ ဆိုတော့ အိန္ဒိယက လိုအပ်ချက်ရှိတယ်။ အိန္ဒိယမှာ မိုးများလို့ မတ်ပဲစိုက်ခင်းတွေ ပျက်တယ်။ ပြည်တွင်းမှာလည်း မတ်ပဲ က စိုက်ချိန် ဖြစ်တော့ မတ်ပဲ လက်ကျန်လည်း နည်းသွားပြီ။ ဆက်တက်ဖို့ မတက်ဖို့ကတော့ တဖက်က လိုအပ်ချက် အပေါ်မူတည်တယ်” ဟု ၎င်းက ဆိုသည်။
အိန္ဒိယသည် မတ်ပဲ တန်ချိန် တစ်သိန်းခွဲ နှင့် ပဲစင်းငုံ တန်ချိန် လေးသိန်းကို ဝေစု(Quota) စနစ်ဖြင့် မြန်မာနိုင်ငံမှ ဝယ်ယူမည် ဖြစ်ပြီး အောက်တိုဘာ(၃၁)ရက် နောက်ဆုံးထားကာ တင်သွင်းရမည်ဖြစ်ရာ ယင်းအတွက် ပဲဈေးနှုန်းများ မြင့်တက်ခြင်းဖြစ်သည်ဟု ပဲ၊နှမ်းကုန်သည်များက ဆိုသည်။
အိန္ဒိယနိုင်ငံသို့ တင်သွင်းရမည့် နောက်ဆုံးရက်မတိုင်မီ ပြည်တွင်းကုန်သည်များမှ ပဲ ဝယ်ယူမူ များပြားခြင်းကြောင့် လတ်တလော ပဲဈေးနှုန်း မြင့်တက်နေခြင်းဖြစ်ပြီး အောက်တိုဘာလနောက်ပိုင်းတွင် ပြည်တွင်း ပဲဈေး ဆက်လက်မြင့်တက်နိုင်ခြေ ရှိ၊မရှိကိုမူ စောင့်ကြည့်ရဦးမည် ဖြစ်ကြောင်း ၎င်းတို့က ဆိုသည်။
လက်ရှိတွင် အိန္ဒိယနိုင်ငံ၏ ဝယ်ယူမှုကြောင့် မတ်ပဲဈေး မြင့်တက်သလို ပဲစင်းငုံဈေးနှုန်းသည်လည်း မြင့်တက်လာပြီး သီတင်းကျွတ်ကာလ အပြီးတွင် ပဲစင်းငုံ သုံးတင်းဝင်တစ်အိတ်လျှင် ငွေကျပ်ငါးထောင် ဝန်းကျင် ဈေးမြင့်လာကြောင်း ဦးတင်အောင်မိုးက ပြောသည်။
မန္တလေး ကုန်စည်ဒိုင်၏ အောက်တိုဘာ(၁၉)ရက် ထုတ်ပြန်ချက်အရ ပဲ၊နှမ်းဈေးနှုန်းများမှာ မတ်ပဲ သုံးတင်းဝင် တစ်အိတ်လျင် ကျပ် (၉၀၀၀၀)မှ (၉၅၀၀၀)၊ ပဲစင်းငုံ သုံးတင်းဝင်တစ်အိတ်လျှင် ကျပ် (၈၀၀၀၀)မှ (၈၇၀၀၀) ဖြစ်သည်။
မန္တလေး ပဲ၊နှမ်းကုန်စည်ဒိုင်တွင် အရောင်းအဝယ်လုပ်ကိုင်နေစဉ်။ ဓါတ်ပုံ – နေကို။