ထက်ဘုန်းခေါင်၊ နိုဝင်ဘာ-၂၄
စိန်တလုံး သရက်သီးအနှစ်နှင့် အေးခဲ သရက်သီးအတုံးများကို ပြီးခဲ့သည့် အောက်တိုဘာက မလေးရှားနိုင်ငံသို့ စမ်းသပ်တင်ပို့ခဲ့ရာ အောင်မြင်သည့်အတွက် လာမည့်ရာသီတွင် အလုံးအရင်းဖြင့် တင်ပို့တော့မည် ဖြစ်ကြောင်း သဇင်နွယ်ကုမ္ပဏီမှ ဒေါ်သန်းသန်းဆွေက Mandalay In-depth news သို့ ပြောသည်။
ကီလို (၃၃၀)ရှိ သရက်သီးအနှစ်နှင့် အေးခဲ သရက်သီးအတုံးများကို သဇင်နွယ်ကုမ္မဏီက မလေးရှားနိုင်ငံသို့ အောက်တိုဘာလ အတွင်းက စမ်းသပ်တင်ပို့ခဲ့ရာ ပျက်စီးမှု မရှိဘဲ အောင်မြင်ခဲ့သည်ဟု ယင်းကုမ္မဏီပိုင်ရှင် ဒေါ်သန်းသန်းဆွေက ပြောသည်။
“ပထမဆုံး စမ်းသပ်တင်ပို့တာ အောင်မြင်ပြီဆိုတော့ သိပ်မကြာခင် လေယာဉ်ပျံနဲ့ပဲ ဆက်ပြီးပို့ပါမယ်။ တစ်တန်ချင်း ပို့မယ်။ သိပ်များလာရင် ကွန်တိန်နာနဲ့ ပို့ဖို့လည်း စီစဉ်ထားပါတယ်” ဟု ၎င်းက ပြောသည်။
လတ်တလောတွင် စိန်တလုံးသရက်သီး အနှစ်နှင့် အေးခဲသရက်သီးအတုံးများ တင်ပို့ရန် မလေးရှားနိုင်ငံက ဝယ်ယူမည့် ကုမ္မဏီနှင့် သဘောတူထားပြီး နောက်ပိုင်းတွင် အခြား အမျိုးအစား သရက်သီးများ၊ သရက်သီး အမျှင်ခြောက်၊ သရက်သီး ရေခဲချောင်း စသည့် သရက်သီးတန်ဖိုးမြင့် ထုတ်ကုန်များကိုပါ တင်ပို့နိုင်ရန် ကြိုးစားနေသည်ဟု ၎င်းက ဆိုသည်။
“တကယ်လို့သာ ဒီဈေးကွက်ကောင်းရင် လွှင့်ပစ်ရမယ့် သရက်သီးများသည် ဥပမာ ပထမတန်းစားပဲ လူစိတ်ဝင်စားတာ။ ဒုတိယတန်း၊ တတိယတန်းစားတွေကို လူစိတ်ဝင်စားမှု နည်းတယ်။ အရည်အသွေးပြည့်ပေမယ့် အလုံးသေးရင် export ထုတ်မရဘူး။ အဲဒါတွေကို value added (တန်းဖိုးမြင့် ထုတ်ကုန်) လုပ်လိုက်ရင် တောင်သူတွေ အားလုံး အကျိုးရှိမှာပဲ” ဟု ဒေါ်သန်းသန်းဆွေက ပြောသည်။
မြန်မာနိုင်ငံတွင် စိုက်ပျိုးထွက်ရှိသည့် သရက်သီးများကို တရုတ်နိုင်ငံသို့ အများဆုံးတင်ပို့ပြီး စိန်တလုံး သရက်သီးများကို စင်ကာပူနှင့် ထိုင်ဝမ်သို့လည်း အနည်းငယ် တင်ပို့မှုရှိသည်။