ဘုံကမ္ဘာထွန်း ၊ အောက်တိုဘာ-၁၈
ရန်ကုန်-မန္တလေး အမြန်လမ်းပေါ် သွားလာနေသည့် ခရီးသည်တင်ယာဉ်များအား လေးဂွဖြင့် ပစ်ခတ်သည့် လူငယ်ငါးဦးကို နောက်နောင် ထိုကဲ့သို့ မပြုလုပ်ရန် ဝန်ခံလက်မှတ်ထိုးကာ မိဘများထံအပ်နှံခဲ့ကြောင်း အမြန်လမ်းမကြီး ရဲတပ်ဖွဲ့မှူးရုံးမှ ရဲမှူးဇာနည်မောင်က ပြောသည်။
အောက်တိုဘာ(၁၇)ရက် ညနေပိုင်းက ရန်ကုန်- နေပြည်တော်- မန္တလေး အမြန်လမ်းပိုင်း ပဲခူးတိုင်းဒေသကြီး ကျောက်တံခါးမြို့နယ်၊ မိုင်တိုင်အမှတ် ၉၀အနီးတွင် ခရီးသည်တင်ယာဉ်တစ်စီး လေးဂွဖြင့် ပစ်ခတ်ခံရခြင်းဖြစ်ပြီး ထိုသို့ လေးဂါဖြင့်ပစ်သည့် လူငယ်ငါးဦးကို ဖမ်းဆီးရမိခြင်းဖြစ်သည်။
အမြန်လမ်းမကြီးပေါ်တွင် သွားလာ နေသောကားများအား လေးဂွဖြင့် ပစ်ခတ်ခဲ့သူ လူငယ်ငါးဦးတို့သည့် ပညာသင်ကြားနေသော အရွယ်မရောက်သေးသူ ကလေးငယ်များ ဖြစ်သည့်အတွက် နောက်နောင် ခရီးသွားယာဉ်များကို ယခုကဲ့သို့ လေးဂွဖြင့် ပစ်ခတ်နှောင့်ယှက်ခြင်း မပြုလုပ်ရန် သတိပေးဆုံးမပြီး ကျေးရွာအုပ်ချူပ်ရေး အဖွဲ့များရှေ့တွင် ဝန်ခံလက်မှတ် ရေးထိုးစေကာ မိဘအုပ်ထိန်းသူများထံ ပြန်လည်အပ်နှံခဲ့ခြင်းဖြစ်ကြောင်း အမြန်လမ်းမကြီးရဲတပ်ဖွဲ့မှ သတင်းထုတ်ပြန်သည်။
အဆိုပါဖြစ်စဉ်မျိုးသည် အသက်ငယ်ရွယ်သူများမှ လက်ဆော့သည့်သဘောဖြင့် ပြုလုပ်တတ်ကြပြီး ဥပဒေအကြောင်း နားမလည်ခြင်း၊ မိဘအုပ်ထိန်းမှု နည်းပါးခြင်းတို့ကြောင့် ဖြစ်ကြောင်း၊ ယခုဖြစ်ပွားမှုတွင် လေးဂွဖြင့် ပစ်ခတ်သူများသည် ကျောင်းသားများဖြစ်ခြင်းနှင့် ကာယကံရှင်မှ အမှုဖွင့် တိုင်တန်းခြင်းမျိုး မဟုတ်သည့်အတွက် ဝန်ခံလက်မှတ် ထိုးခိုင်း၍သာ မိဘအုပ်ထိန်းသူထံ ပြန်လည်အပ်နှံခဲ့ခြင်းဖြစ်သည်ဟု အမြန်လမ်း ရဲတပ်ဖွဲ့မှူးရုံးမှ ရဲမှူးဇာနည်မောင်က ပြောသည်။
“ဒါမျိုးတွေက ကလေးတွေပဲ အဖြစ်များတယ်။ တခါတလေတော့လည်း ကလေးတွေဆိုတော့ ဘာရည်ရွယ်ချက် ရယ်တော့ မရှိဘဲနဲ့ လက်တည့်စမ်းကြတဲ့ သဘောမျိုးပေါ့။ ဒါလုပ်ရင် အပြစ်ဖြစ်တယ်ဆိုတာလည်း မသိတဲ့ အနေအထားမျိုးလည်း ရှိချင်ရှိမှာပေါ့။ တမင်သက်သက် ရည်ရွယ်ချက်ရှိရှိ လုပ်တာဆိုရင်တော့ ပုဒ်မ ၂၇၉-(က)လိုဟာမျိုးနဲ့ အမှုဖွင့်ဖမ်းဆီး အရေးယူတာတွေ ရှိပါတယ်”ဟု ရဲမှူးဇာနည်မောင်က ပြောသည်။
အောက်တိုဘာ(၁၇)ရက် ညပိုင်းက ရန်ကုန်- နေပြည်တော်- မန္တလေး အမြန်လမ်းပိုင်း ကျောက်တံခါးမြို့နယ်၊ မိုင်တိုင်အမှတ် ၉၀အနီးတွင် ခရီးသည်တင်ယာဉ်တစ်စီး လေးဂွဖြင့် ပစ်ခတ်ခံရကြောင်း အမြန်လမ်းမကြီးရဲတပ်ဖွဲ့သို့ ဖုန်ဆက် အကြောင်းကြားသဖြင့် မြို့ချောင်းစခန်းမှ တပ်ဖွဲ့ဝင်များသည် အခင်းဖြစ်နေရာသို့ သွားရောက်စုံစမ်းခဲ့ရာ အမြန်လမ်းမကြီးဘေးတွင် ကျွဲကျောင်းနေသည့် ကျောက်တံခါးမြို့နယ် ရေအေးကျေးရွာနေသူ အသက်(၁၃)နှစ်၊ (၁၇)နှစ်၊ (၁၄)နှစ် အရွယ် လူငယ်အမျိုးသားလးဦးကို လွယ်အိတ်တစ်လုံး၊ လေးဂွတစ်လက်နှင့်အတူ တွေ့ရှိခဲ့သည်။
၎င်းလူငယ်သုံးဦးကို စစ်မေးခဲ့ရာ တရွာတည်းနေ အခြားလူငယ်နှစ်ဦး အပါအဝင် ၎င်းတို့ ငါးဦးသည် နေပြည်တော်-ရန်ကုန် မိုင်တိုင် ၉၂ အနီးတွင် ကျွဲကျောင်းနေစဉ် နေပြည်တော်ဘက်မှ ရန်ကုန်ဘက်သို့ မောင်းနှင်လာသည့် ကာများအား လေးခွဖြင့် ပစ်ခတ်ခဲ့ကြောင်း ဝန်ခံထွက်ဆိုခဲ့သည်ဟု အမြန်လမ်းမကြီး ရဲတပ်ဖွဲ့မှူးရုံးမှ သတင်းထုတ်ပြန်သည်။
အမြန်းလမ်းမကြီးတွင် သွားလာနေကြသည့် ယာဉ်များအား ခဲ၊လေးဂွများဖြင့် ပစ်ပေါက်ခြင်းများ မဖြစ်ပေါ်စေရန် အမြန်လမ်း ရဲတပ်ဖွဲ့အနေဖြင့် လမ်းဘေးတစ်လျှောက်ရှိ မြို့ရွာများသို့ အသိပညာပေးခြင်းများ၊ ကင်းလှည့်ခြင်းများ ဆောင်ရွက်နေသည်ဟု ဆိုသည်။ ယခုဖြစ်စဉ်သည် ၂၀၁၉တွင် ပထမဆုံးအကြိမ် ဖြစ်ပွားခြင်းဖြစ်ကာ ပြီးခဲ့သည့် ၂၀၁၈တွင် ခရီးသည်တင်ယာဉ်အား လေးဂွဖြင့် ပစ်ခတ်သည့် ယခုကဲ့သို့ ဖြစ်စဉ်မျိုး နှစ်မှုဖြစ်ပွားခဲ့ပြီး ပြစ်မှုကျွန်းလွန်သူများကို ဖမ်းဆီးအရေးယူခဲ့ကြောင်း၊ ရဲမှူးဇာနည်မောင်က ပြောသည်။