တေဇ၊ အောက်တိုဘာ-၃၀
ပြင်ဦးလွင်မြို့တွင် ခရီးသည်တင် မှန်လုံကားတစ်စီးပေါ်မှ ကျောက်စိမ်းလက်ကောက်၊ ကျောက်စိမ်းတုံးနှင့် သစ်များ ဖမ်းဆီးရမိခဲ့မှုနှင့်ပတ်သက်၍ ယာဉ်မောင်းနှင့် ယာဉ်တာဝန်ခံဆိုသူ အမျိုးသားနှစ်ဦးကို ပုဒ်မသုံးခုဖြင့် အမူဖွင့်ထားကြောင်း မန္တလေးတိုင်း ရဲတပ်ဖွဲ့မှ သတင်းရရှိသည်။
အောက်တိုဘာ (၂၈)ရက် ညနေပိုင်းက မန္တလေး-လားရှိူးသွား ကားလမ်း၊ ပြင်ဦးလွင်မြို့နယ်၊ မြိုင်ကြီးကျေးရွာအနီးရှိ စားသောက်ဆိုင်တစ်ဆိုင်ရှေ့တွင် ရပ်နားထားသော ခရီးသည်တင် မှန်လုံယာဉ်တစ်စီးကို မသင်္ကာသဖြင့် ရှာဖွေစစ်ဆေးခဲ့ရာ ယာဉ်ပေါ်တွင် သိုဝှက်သယ်ဆောင်လာသည့် ကျောက်စိမ်းလက်ကောက်၊ ကျောက်စိမ်းတုံးနှင့် သစ်များ ဖမ်းဆီးရမိခြင်းဖြစ်သည်ဟု မန္တလေးတိုင်း ရဲတပ်ဖွဲ့က သတင်းထုတ်ပြန်သည်။
အဆိုပါ ခရီးသည်တင်ယာဉ်မှာ မန္တလေး-လားရှိုး-မူဆယ် ပြေးဆွဲနေသည့် အဝေးပြေး ယာဉ်လိုင်းတစ်လိုင်းမှဖြစ်ပြီး မန္တလေးမှ ထွက်ခွာလာချိန် တရားမဝင် ကုန်စည်အချို့ တင်ဆောင်လာကြောင်း သတင်းအရ ရှာဖွေဖမ်းဆီးခဲ့ခြင်းဖြစ်သည်ဟု မန္တလေးတိုင်းရဲတပ်ဖွဲ့ တာဝန်ရှိသူတစ်ဦးက Mandalay In-depth News သို့ ပြောသည်။
အဆိုပါ ခရီးသည်တင်ယာဉ်ပေါ်မှ ကျောက်စိမ်းလက်ကောက် (၁၇၅၀)ကွင်း၊ ကျောက်စိမ်းတုံး (ဖြတ်သား) အရွယ်အစားဆိုဒ်စုံ (၂၅၈)တုံး၊ သံဖြတ်စက် တစ်လုံးတို့ကို ကနဦး တွေ့ရှိသဖြင့် ယာဉ်မောင်းနှင့် ယာဉ်တာဝန်ခံဆိုသူ အမျိုးသားနှစ်ဦးကို ပြင်ဦးလွင်မြို့နယ် ပိတ်ချင်းမြောင်နယ်မြေရဲစခန်းတွင် ကျောက်မျက်ဥပဒေ ပုဒ်မ ၄၇ ဖြင့် အမူဖွင့်ခဲ့သည်။ ထို့နောက် အဆိုပါ ခရီးသည်တင် မှန်လုံယာဉ်အား မြို့နယ်သစ်တောဦးစီးဌာန တာဝန်ရှိသူများမှ ဆက်လက်စစ်ဆေးရာ ယာဉ်ရှေ့ပိုင်းနှင့် နောက်ပိုင်း ကိုယ်ထည် အံခွက်များအတွင်း ထည့်သွင်းသယ်ဆောင်လာသည့် ပိတောက်နှင့် တမလန်းသစ်များ ထပ်မံတွေ့ရှိခဲ့သည်ဟု ဆိုသည်။
ထိုသို့ ဖမ်းဆီးရမိမူနှင့်ပတ်သက်၍ ယာဉ်မောင်းနှင့် ယာဉ်တာဝန်ခံ အမျိုးသားနှစ်ဦးကို ကျောက်စိမ်းနှင့် သစ်များ တရားမဝင် သယ်ဆောင်သည်ဟုဆိုကာ ပိတ်ချင်းမြောင်ရဲစခန်းတွင် ကျောက်မျက်ဥပဒေ ပုဒ်မ ၄၇ ၊ သစ်တောဥပဒေပုဒ်မ ၄၂(က)နှင့် ဇီဝမျိုးစုံမျိုးကွဲနှင့် သဘာဝထိန်းသိမ်းရေး နယ်မြေများ ကာကွယ် စောင့်ရှောက်ခြင်း ဆိုင်ရာ ဥပဒေပုဒ်မ ၄၁(ခ) တို့ဖြင့် အမူဖွင့်ထားသည်ဟု တိုင်းရဲတပ်ဖွဲ့က သတင်းထုတ်ပြန်သည်။
မန္တလေး-လားရှိုး-မူဆယ်ကားလမ်းတွင် ယခုကဲ့သို့ ကျောက်စိမ်းနှင့် သစ်များ တရားမဝင် သယ်ဆောင်လာသည်ကို မကြာခနဆိုသလို ဖမ်းဆီးရမိလေ့ရှိသည်ဟု ပြင်ဦးလွင်မြို့နယ် ရဲတပ်ဖွဲ့ တာဝန်ရှိသူတစ်ဦးက ဆိုသည်။
ခရီးသည်တင်ယာဉ်ပေါ်မှ ကျောက်စိမ်းနှင့် သစ်များ ဖမ်းဆီးရမိမှုနှင့်ပတ်သက်၍ ယာဉ်ပိုင်ရှင်ကို စုံစမ်းစစ်ဆေးနေဆဲဖြစ်သည်ဟု အထက်ပါ တာဝန်ရှိသူက ဆိုသည်။