اطلاعات روز: په ملګرو ملتونو کې د امریکا د استازي مرستیالې ډروټي شي د امنیت شورا په غونډه کې وویل، چې متحده ایالات په افغانستان او پاکستان کې د داعش خراسان څانګې له لوري د جنګیالیو جلب و جذب ته اندېښمن دي.
هغې تېره شپه (دوشنبه، ۲۲ د سلواغې) په دې غونډه کې وویل، چې متحده ایالات دغه راز د داعش خراسان څانګې د بریدونو پلان کولو او ترسره کولو وړتیا په اړه هم اندیښمن دي.
د امریکا د استازي مرستیاله زیاتوي، چې په منځنۍ اسیا کې د داعش ملاتړي په ځانګړې توګه د داعش خراسان څانګه، یو مهم نړیوال ګواښ دی.
په دې غونډه کې د پاکستان استازي منیر اکرم هم د داعش د ګواښونو په اړه خبرې وکړې او د دې ډلې پر وړاندې یې د موثر نړیوال اقدام غوښتنه وکړه.
هغه وویل، چې د القاعده اصلي هسته د پاکستان د هڅو په پایله کې په افغانستان کې له منځه تللې، خو داعش لاهم په دې هېواد کې حضور لري.
د پاکستان استازي همداراز زیاته کړه، چې یوازې افغانستان د داعش خراسان څانګې لپاره د جنګیالیو د جذب مرکز دی، نه پاکستان.
د یو شمېر نورو هېوادونو استازو هم په افغانستان کې د داعش خراسان څانګې د حضور په اړه اندېښنه څرګنده کړه او دا یې د افغانستان، سیمې او نړۍ د سولې او امنیت لپاره جدي ګواښ وباله.
خو، طالبان وايي چې دوی داعش په افغانستان کې ځپلی او دا ډله په هېواد کې حضور نه لري.
دا ډله ادعا کوي، چې داعش د دوی تر ځپلو وروسته خپل مرکزونه او پټنځایونه پاکستان ته انتقال کړي او له هغه ځایه په افغانستان کې بریدونه ترسره کوي.