اطلاعات روز: په خوست کې ځایي سرچینې وایي چې په دغه ولایت کې ناپېژانده وسله والو د تېر نظام د ځانګړو ځواکونو یو سرتیری په ډزو وژلی دی.
سرچینې ویلي چې دغه پخوانی نظامي ننګیالی نومېده، چې تېره ورځ (یکشنبه،۲۸د چنګاښ) د خوست ښار د ۱۲۰۰ فامیلیو اړوند د «ابدالي روغتون» مخې ته د ناپېژانده وسله والو له لوري د توفنګچې په ډز وژل شوی دی.
د سرچینې د مالوماتو له مخې، ننګیالی په اصل د خوست مرکز متون اړوند «خبشخېلو» اوسیدونکی و او د جمهوري حکومت له سقوط وروسته، امریکا ته تللی او شاوخوا دوه اوونۍ وړاندې هېواد ته راستون شوی وو.
بلخوا د خوست امنيه قومنداني مسوولان هم یاده پېښه تاییدوي او په وینا ، د تېر نظام د ځانګړو ځواکونو کارکوونکی ننګیالی د شخصي دښمنۍ له امله وژل شوی.
د خوست امنیې قومندانۍ نن دوشنبه یوه خبرپاڼه کې ویلي، ننګیالی تېره ورځ د ۱۲۰۰ فامیلیو اړوند ابدالي شفاخانې مخې ته داسې حال کې د خپلو دښمنانو له لور د توفنګچې په ډزو ووژل شو چې ابدالي شفاخانې ته د یو ناروغ پوښتنې ته ورغلی وو.
د خوست امنیې قومندانۍ زیاته کړې چې اړوندې ادارې د پېښې د څېړنې او د عاملینو د پېژندنې لپاره خپلې هڅې روانې ساتي.
پر افغانستان د طالبانو له بیا واکمنېدو راهیسې، د هېواد په بېلابېلو برخو کې د ناپېژانده وسله والو له لوي د پخواني حکومت د لسګونه پوځیانو د وژنې راپورونه ورکړل شوي دي.
