ایراني رسنیو راپور ورکړی چې د عراق لومړی وزیر، علي فالح الزیدي، د یوه لوړپوړي پلاوي په مشرۍ په رسمي سفر تهران ته رسېدلی دی.
د ایران د دولتي راډیو او ټلوېزیون د راپور له مخې، نوموړی د رسېدو پر مهال د ایران د ولسمشر مسعود پزشکیان له لوري هرکلی شوی دی.
د عراق لومړي وزیر تهران ته له روانېدو مخکې په خپله اېکس کې لیکلي، چې د ایران له لوړپوړو چارواکو سره به د دواړو هېوادونو د ګډو ګټو، دوهاړخیزو همکاریو، سیمهییزو بدلونونو او په سیمه کې د امنیت او ثبات د ټینګښت لپاره د روانو هڅو په اړه خبرې وکړي.
هغه زیاته کړې: «عراق او ایران د تاریخي او تمدني اړیکو، ګډو پولو او ګډو ګټو له لارې سره تړلي دي.»
د الزیدي په وینا، دغه دوامدارې اړیکې د خبرو، همکارۍ او متقابل درناوي پر بنسټ پرلهپسې تعامل ته اړتیا لري، څو د دواړو هېوادونو د خلکو لپاره دوامداره پرمختګ او هوساینه رامنځته کړي او همداراز په سیمهییزه او نړیواله کچه د امنیت او ثبات په ټینګښت کې مرسته وکړي.
دا ایران ته د علي فالح الزیدي لومړنی سفر دی، چې د عراق د لومړي وزیر په توګه یې ترسره کوي او دا سفر امریکا ته د هغه له سفر او د امریکا له ولسمشر ډونالډ ټرمپ سره تر لیدنې وروسته ترسره شوی دی.
واشنګټن ته د الزیدي له سفر وروسته، ځینو نړیوالو رسنیو راپور ورکړی و چې امریکايي چارواکو په عراق کې د ایران پلوه شیعه وسلهوالو ډلو د کنټرول او بېوسلې کولو غوښتنه کړې ده.
کارپوهانو د دغو وسلهوالو ډلو د مدیریت او چلند څرنګوالی د الزیدي د حکومت له مهمو ننګونو څخه بللی دی.
الزیدي له واک ته رسېدو وروسته په عراق کې د فساد پر ضد پراخ کمپاین پیل کړی، چې د همدې هڅو په ترڅ کې تر اوسه له ۴۰ څخه زیات پخواني چارواکي او د پارلمان غړي نیول شوي دي.
