د پاکستان د اطلاعاتو او خپرونو وزارت د طالبانو د ویاند د وروستیو څرګندونو په غبرګون کې ویلي چې دا ډله د ښځو پر وړاندې د خپل چلند له امله حق نه لري چې نورو ته د حکومتولۍ او ښاري حقونو درس ورکړي.
دغه وزارت د دوشنبې په شپه (د تلې ۲۰مه) پر ایکس د یوې اعلامیې په خپرولو سره ویلي چې طالبان د افغانستان له خاورې د ترهګریزو ګواښونو د له منځه وړلو پر ځای، لفظي څرګندونو او د عامه افکارو اړولو ته مخه کړې ده.
د پاکستان د اطلاعاتو او خپرونو وزارت لیکلي: «نورو ته د حکومتولۍ او ښاري حقونو د درس ورکولو لپاره د دې رژیم هڅې، د هغه د خپل چلند، په ځانګړي ډول د نجونو پر زدهکړو د محدودیتونو د دوام او د بشري بنسټیزو حقونو د نقض په پام کې نیولو سره، بېمانا او بېبنسټه ښکاري.»
دغه وزارت زیاته کړې: «د افغانستان د طالبانو د رژیم ویاند یو ځل بیا د افغانستان له خاورې د ترهګریز ګواښ مستندې موضوع ته د رسېدنې پر ځای، لفظي څرګندونو او د عامه افکارو اړولو ته مخه کړې ده.»
د پاکستان حکومت طالبان تورن کړي چې له خپلې هغې ژمنې سره سم عمل نه کوي چې له مخې یې باید د افغانستان له خاورې د ترهګرو د استفادې مخه ونیسي.
د طالبانو ویاند ذبیحالله مجاهد پرون ویلي وو چې دا تورونه بېبنسټه دي او پاکستان باید د خپلو کورنیو ستونزو پړه پر طالبانو وانهچوي، بلکې «د خپلو سیاستوالو او خلکو نظرونو او حقونو ته درناوی وکړي».
د پاکستان د اطلاعاتو او خپرونو وزارت ویلي چې د پاکستان کورنیو چارو ته د خلکو د پام اړولو لپاره د طالبانو هڅې نه شي کولای د دې رژیم هغه ناکامي پټه کړي چې د افغانستان له خاورې د ترهګرو ډلو د استفادې او پر پاکستان د بریدونو د طرحې او ترسره کولو د مخنیوي په برخه کې یې لري.
دغه وزارت زیاته کړې چې پر پاکستان د بریدونو لپاره د افغانستان له خاورې د استفادې د پای ته رسولو بشپړ مسوولیت د طالبانو د رژیم پر غاړه دی.
د پاکستان د اطلاعاتو او خپرونو وزارت د ملګرو ملتونو د امنیت شورا د بندیزونو د څارنې او تحلیلي ملاتړ ډلې راپور ته په اشارې ویلي چې په افغانستان کې د پاکستاني طالبانو غورځنګ (ټيټيپي) د جنګیالیو شمېر شاوخوا شپږ زره اټکل شوی او د طالبانو ملاتړ ورسره دی.
پاکستان ټینګار کړی چې دا موندنې یوازې د «پاکستان تبلیغات» نه شي ګڼل کېدای او بېاعتباره نه شي بلل کېدای، بلکې طالبان باید د انکار پر ځای د عملي اقداماتو له لارې دې «مستند ګواښ» ته رسېدنه وکړي.
