O, Türkiyədəki seçkilərin xalqın iradəsini əks etdirmədiyini deyib
Xalqların Demokratik Partiyasının (HDP) sabiq həmsədri, hazırda həbsdə olan Selahattin Demirtaş aktiv siyasətdən müvəqqəti getdiyini açıqlayıb.
Bunu S.Dəmirtaş həm yazdığı məqalədə qeyd edib, həm də “Artı Gerçek”ə müsahibəsində İrfan Aktanın suallarına cavabında deyib.
O, aktiv siyasi fəaliyyətlə bağlı bir neçə ay əvvəl partiya üzvlərini məlumatlandırdığını bildirib:
“Demişdim ki, seçkilərdən sonra nəticələrdən asılı olmayaraq aktiv siyasi işlə məşğul olmayacağam. Hələ də eyni fikirdəyəm. Kənarda canla-başla mübarizə aparan bütün yoldaşların bu prosesi özlərinə inam və müvəffəqiyyətlə başa vuracaqlarına inanıram və bu baxımdan onların hamısına güvənirəm”.
S.Demirtaı üzr istəməyə borclu olduğunu vurğulayıb:
“Mən də daxil olmaqla hamımız fədakar, veteran və vətənpərvər xalqımızdan üzr istəməyi borcluyuq. Xalqımız əlindən gələni etdi, təsirli siyasət və taktika hazırlaya bilmədik”.
S.Demirtaş son seçkilərdən dərs çıxarmağın vacibliyini qeyd edib:
“Seçkilərdə əsas problem şüarçılıq və kadr çatışmazlığıdır. Ona görə dərslər çıxarılmalıdır və qurultaya gedilməlidir, yenilənməyə ehtiyac var. Şüarçılıqla bundan o tərəfə getmək olmaz. Mənim partiyamızla bağlı tənqid və təkliflərim sırf xoş niyyət, konstruktiv və töhfə vermək məqsədi daşıyır. Heç kim tənqidlərimdən HDP-ni yıxmaq üçün istifadə etməyə çalışmasın”.
“Seçkinin nəticələri bəlli olmağa başlayanda özünüzü necə hiss etdiniz və nə düşündünüz?” sualına S.Demirtaş belə cavab verib:
“Mən bu nəticələri tam gözləmirdim. Həm Yaşıl Sol Partiyasının, həm də Kılıçdaroğlunun daha yüksək səs alacağın gözləyirdim. Ona görə həm kədərləndim, həm də müxalifətin seçki gecəsi qeyri-mütəşəkkil görünməsi məni qəzəbləndirdi”.
“Nəticə çox da təəccüblü deyildi. Kılıçdaroğlu əslində seçkini qazandı. Ancaq əvvəlcə saxtakarlıq, əcnəbi səslər, sonradan vətəndaşlığa çevrilənlərin səsləri kimi faktorlar əlavə edildikdə Ərdoğan bu tarixi seçkini rəsmən qazandı. Baş verənlərin seçkilərə, demokratiyaya, xalqın iradəsinin nəticələrdə əks olunmasına heç bir aidiyyatı yoxdur. Çünki hamısı əməliyyat idi”, – deyə Demirtaş əlavə edib.
Onun sözlərinə görə, taktiki gedişlərdəki çatışmazlıqları və səhvləri müzakirə etməzdən əvvəl aşağıdakılara aydınlıq gətirmək lazımdır:
“Kürd siyasi hərəkatı intensiv həbslər, sürgünlər və təzyiqlər səbəbindən ciddi kadr aşınmasına məruz qalıb. Əyalət və rayon təşkilatlarından tutmuş Qərargah, Qadınlar və Gənclər məclislərinə qədər bütün sahələrdə ciddi keyfiyyət zəifləməsi müşahidə olunurdu. Fədakar, lakin təcrübəsiz dostlar əllərindən gələni etsələr də, bu kifayət etmədi. Başqa sözlə, nə etmək lazım olduğu göz qabağındadır, lakin bizdə bunu etmək üçün ixtisaslı kadr strukturu çatışmır”.
“Kürd hərəkatı ortalığa üstünlük verən üslubdan əl çəkməli və minlərlə ixtisaslı insanı vəzifəyə dəvət edən bir model həyata keçirməlidir. Çünki bütün təbəqələrin, o cümlədən gənclərin, qadınların, fəhlələrin, kəndlilərin, işsizlərin, tələbələrin, orta təbəqənin ixtisaslı iştirakı olmadan, hərəkətə keçmək, mübarizəni yeniləmək asan olmayacaq. Cəsur və bacarıqlı siyasi kadrlarımızla əldə edə bilməyəcəyimiz heç nə yoxdur. Məncə, HDP-nin əsas çatışmazlığı da budur”, – bunu da həbsdə olan partiya həmsədri deyib.
Mayın 28-də Türkiyədə prezident seçkilərinin II turu keçirilib.
İyunun 1-də YSK sədri Ahməd Yener yekun nəticələri açıqlayıb.
A.Yener Rəcəb Tayyib Ərdoğanın 52,18 faiz, Kamal Kılıçdaroğlunun isə 47,82 faiz səs topladığını bildirib.
S.Demirtaş 1973-cü ildə Elazığda doğulub.
Ankara Universitetinin Hüquq fakültəsini bitirən S.Dəmirtaş siyasi fəaliyyətdən əvvəl müstəqil hüquqşünas, İHD (İnsan Haqları Dərnəyi) Diyarbəkir şöbəsində çalışıb.
O, Beynəlxalq Amnistiya Təşkilatının Diyarbəkir bölməsinin və Türkiyənin İnsan Haqları Vəqfinin qurucularından olub.
O, 2014-cü ildə Xalqların Demokratik Partiyasının həmsədri seçilib və 2018-ci il fevralın 11-dək bu vəzifədə olub.
S.Demirtaş 2016-cı il noyabrın 4-dən həbsdədir.
2020-ci ilin dekabrında Avropa İnsan Haqları Məhkəməsinin qərarına görə, Selahattin Demirtaşın həbs müddətinin davam etməsi siyasi məqsədlidir.
