Onun Massaçussets Milli Qvardiyasının kəşfiyyatçısı olduğu bildirilir
ABŞ Federal Təhqiqatlar Bürosu (FTB) Pentaqonun çox sayda mühüm məxfi sənədlərini sızdıran şəxsin həbs edildiyini açıqlayıb.
Onun Massaçussets ştatı Milli Qvardiyası hərbi hava qüvvələrinin kəşfiyyat bölümünün hərbi qulluqçusu, 21 yaşlı Cek Duqlas Teyşeyra olduğu bildirilir.
Açıqlanan ilkin bilgilərə görə, o, Pentaqonun məxfi sənədlərini qapalı internet çatında dostları ilə paylaşıb.
Bundan sonra da sənədlər internetdə yayılıb.
Cek Teyşeyranın Bostondan təxminən 80 km cənubda olan Massaçusets ştatının Dighton şəhərindəki evində axtarış edilib.
Bu, internetə son sızan sənədlərdən bir həftə sonra baş verib.
Şübhəli şəxs əlləri qandallı vəziyyətdə saxlanılıb.
2023-cü ilin əvvəlindən internetdə Ukrayna ilə bağlı hərbi, məxfi sənədlər yayılır.
Daha öncə ABŞ-ın Ukraynaya hərbi yardımının detalları yayılmışdı.
Son sızan sənədlərdə isə Ukraynanın yazda əks hücum planları əks olunub.
Burada Ukraynanın hərbi zəifliklərindən bəhs edilir.
Əsasən sosial media saytlarında yayımlanan sənədlərin sızması 2010-cu ildə “WikiLeaks” saytında 700.000-dən çox sənəd, video və diplomatik kabellərin görünməsindən bəri ən ciddi təhlükəsizlik pozuntusu hesab edilir.
Sənədlərin internetə sızmasına səbəb olan şəxsin Massaçusetsdəki Otis Milli Mühafizə Bazasında 1-ci dərəcəli təyyarəçi olduğu bildirilir.
O, 2019-cu ildə Milli Hava Qvardiyasına qoşulub. Həmçinin Kiber Nəqliyyat Sistemləri üzrə IT mütəxəssisi kimi çalışıb.
Baş prokuror Merrik Qarland jurnalistlərə açıqlamasında bildirib ki, Teyşeyra məxfi milli müdafiə məlumatlarının icazəsiz çıxarılması, saxlanması və ötürülməsi ilə bağlı istintaqla əlaqədar saxlanılıb.
Qarland deyib ki, o, “insidentsiz” nəzarətə götürülüb.
Ədliyyə Departamenti Teyşeyranın hansı ittihamlarla üzləşəcəyini açıqlamayıb, baxmayaraq ki, onlar milli müdafiə məlumatlarını qəsdən saxlamaq və ötürmək üçün cinayət ittihamlarını ehtiva edəcəklər.
Müdafiə naziri Lloyd Austin verdiyi açıqlamada Pentaqonun işçi qrupunun zərəri qiymətləndirmək və azaltmaq üçün gecə-gündüz işlədiyini söyləyib.
ABŞ Prokurorluğunun Bostondakı sözçüsü Teyşeyranın aprelin 14-də məhkəmə qarşısına çıxmasının gözlənildiyini söyləyib.
“Reuters” “Gizli” və “Tam məxfi” etiketli 50-dən çox sənədi nəzərdən keçirib, lakin onların həqiqiliyini müstəqil şəkildə təsdiq edə bilməyib.
Sızdırılan sənədlərin sayının 100-dən çox olacağı ehtimal edilir.
Bir sıra ölkələr sızdırılan bəzi sənədlərin doğruluğuna şübhə ilə yanaşıb, o cümlədən Britaniya məlumatda “ciddi dərəcədə qeyri-dəqiqlik” olduğunu bildirib.
Sızdırılan məlumatlar müttəfiqlər, o cümlədən İsrail, Cənubi Koreya və Türkiyə ilə bağlı məlumatları üzə çıxarıb.
ABŞ rəsmiləri materialların əksəriyyətinin orijinal olduğuna inanır. Bununla belə, bəzilərində şişirdilmiş, azaldılmış və ya dəyişdirilmiş rəqəmlər olduğunu açıqlayıb.
