Rəna Muradova: “Kənd soveti gətirib qapımıza bayraq asanda dedi ki…”
Xaçmaz rayonunun Xudat qəsəbəsində yaşayan Muradovlar ailəsi sentyabrın 21-də oğulları Cümşüdün Qarabağ döyüşlərində həlak olması xəbərini alıb. Qohum-qonşu, dost-tanış onlara gəlib, bir sutkadan çox meyitin gətirilməsini gözləyiblər. Və xəbər gəlib ki, Cümşüd sağdır…
“Nə vəziyyətə düşdüyümüzü bir Allah bilir”
Anası Rəna Muradova Meydan TV-yə danışır ki, sentyabrın 21-də gətirib qapılarına Azərbaycan bayrağı asanda övladının həlak olduğunu xəbər veriblər:
“Kənd soveti gətirib bayrağı asanda dedi ki, xəbər gəlib, şəhid olub. Nə vəziyyətə düşdüyümüzü bir Allah bilir. Ayın 21-də üstümüzə şəhid adı gəldi, amma özünü gətirmədilər. Nə qədər adam yığılmışdı bizə, hamı gözləyirdi. Ayın 22-də axşamüstü saat 5-də xəbər çıxdı ki, yalan imiş, sağdır”.
![](https://i1.wp.com/www.meydan.tv/wp-content/uploads/photo-2023-09-30-14-18-40.jpg)
27 yaşlı Cümşüd Muradov müddətdən artıq xidmət edən (MAXE) hərbi qulluqçudur. Məlum olub ki, o, ayaqlarından yaralanıb, yıxılıb qalıb və hərbçi yoldaşlarından ayrı düşüb. Üç gün belə qalandan sonra sentyabrın 22-də Cümşüd Muradovu bu vəziyyətdə tapıblar. Onu hospitala çatdırıblar.
“Hələ bir evimə gəlsin…”
Anası deyir ki, oğlunun sağ olması xəbərini alandan dərhal sonra onunla telefonla görüntülü danışıb, gözüylə görəndən sonra inanıb:
“Mənə dedilər ki, həkimin yanındadır, yaralıdır. Elə həmin həkimin vasitəsilə danışdıq, görüntülü. Həmin gün vəziyyəti yaxşı deyildi. Sistem vururdular. Dedi ki, ayaqlarımdan yaralanmışam, gəzə bilmirəm. Amma mən ayaqlarını görmədim”.
![](https://i1.wp.com/www.meydan.tv/wp-content/uploads/photo-2023-09-30-14-18-53-1-651x821.jpg)
Rəna Muradovanın sözlərinə görə, oğlunun sağ olduğunu biləndən sonra da onlara gözaydınlığı vermək üçün evlərinə gəlib-gedənlərin ardı-arası kəsilmir. Deyir ki, yaşadığı hissi sözlə ifadə eləmək mümkün deyil.
“Hələ bir sağalıb evə gəlsin, mütləq qurban kəsəcəm, konfet paylayacam. Həyətimə, evimə sağ-salamat girsin, gücüm nəyə çatır, paylayacam. Necə ki, indi eləyirəm, onda da eləyəcəm. Mən möcüzə yaşamışam…”.