Zəlzələ Çində də müşahidə olunub, itkilər barədə məlumat yoxdur
Fevralın 23-də, səhər saatlarında Tacikistanın şərqində təxminən 6,8 bal gücündə zəlzələ baş verib.
Zəlzələ bu ayın əvvəlində bir sıra ölümcül uçqunlara məruz qalmış dağlıq Bədəxşan muxtar bölgəsində qeydə alınıb.
Bura əhalinin az yaşadığı bölgə sayılır, lakin böyük Sarez gölü də həmin ərazidədir.
Bu göldə daşqın olarsa, bu, bir neçə ölkəni əhatə edən geniş ərazinin su altında qalmasına səbəb ola bilər.
Tacikistan rəsmiləri hələlik zəlzələ nəticəsində göldə hər hansı dəyişiklik olub-olmadığı ilə bağlı açıqlama verməyib.
Zəlzələnin episentri Çinlə ən yaxın sərhəddən təxminən 82 km (50,95 mil) aralıda olub.
Zəlzələ Çinin qərbindəki Sincan bölgəsinin bəzi yerlərində, o cümlədən Kaşqar və Artuxda güclü hiss edilib.
Çin dövlət televiziyası CCTV zəlzələnin 7.2 bal gücündə olduğunu bildirib.
Nə Tacikistanda, nə də Çində itkilər barədə məlumat var.
CCTV bildirib ki, yerli hakimiyyət orqanları körpüləri, tunelləri və siqnal avadanlıqlarını yoxlayır.
