O, “Niyazi” adına Dövlət Simfonik Orkestrinin bədii rəhbəri təyin edilib
Xalq artisti Yalçın Adıgözəlov Heydər Əliyev Sarayının tabeliyində fəaliyyət göstərən “Niyazi” adına Dövlət Simfonik Orkestrinin bədii rəhbər-baş dirijoru vəzifəsinə təyin olunub.
Mədəniyyət naziri Adil Kərimli bununla bağlı müvafiq sənəd imzalayıb.
Yalçın Adıgözəlov 1959-cu ildə Bakıda, bəstəkar, Xalq artisti Vasif Adıgözəlovun ailəsində doğulub.
1982-ci ildə Azərbaycan Dövlət Konservatoriyasını (indiki Bakı Musiqi Akademiyası) piano ixtisası üzrə (professor R.Atakişiyevin sinfi) bitirib.
1984–1989-cu illərdə Rimski-Korsakov adına Leninqrad (Sankt-Peterburq) Konservatoriyasında professor İlya Musinin sinfində opera və simfonik orkestr dirijorluğu ixtisası üzrə təhsil alıb.
1990-1992 illərdə Vyana Musiqi Akademiyasınln aspiranturasın bitirib, 1989-cu ildən Üzeyir Hacıbəyli adına Azərbaycan Dövlət Simfonik Orkestrinin dirijoru, 1991 – 1998-ci illərdə bədii rəhbər və baş dirijoru vəzifəsində çalışıb.
2000-ci ildən Azərbaycan Dövlət Akademik Opera və Balet Teatrının dirijorudur.
O, eyni zamanda uzun illərdir Üzeyir Hacıbəyli adına Bakı Musiqi Akademiyasında pedaqoji fəaliyyətlə məşğul olur.
Dirijorluq kafedrasının professorudur.
2007 -ci ildə Əməkdar incəsənət xadimi, 2012-ci ildə Xalq artisti adına layiq görülüb.
