“Çudo Peçka” və “ÇP Aqro” MMC-lərinin təsisçisi Çingiz Cəlilovun qardaşı Pərviz Cəlilov vəkil J.Bağırovanın suallarını cavablandıran zaman söyləyib ki, “Bank Standard”a, ümumilikdə, 15 milyon manat kredit ödəyiblər: “Biz şirkəti onlara təhvil verəndə hər şey dağılmışdı. İşçilərin maaşlarını belə vermirdilər. Hətta işçilərin əməkhaqqısını pul əvəzinə mobil telefonla ödəyirdilər. Sonra mənə Səbail Rayon Məhkəməsindən banka 23 milyon manatlıq borcla bağlı bildiriş gəldi. Bu barədə Səlim Kirmanla əlaqə saxladım ki, “biz belə danışmadıq, indi niyə belə oldu?” Səlim Kirman da mənə “bu, rəhbərliyin göstərişidir” dedi. Bildiyim qədəri ilə bankın rəhbəri Heydər Babayevdir. Səlim Kirman da Heydər Babayevi və onun həyat yoldaşını nəzərdə tuturdu. Axı mən Heydər Babayevi deyil, Səlim Kirmanı tanıyırdım”.
O dindirilən zaman bildirib ki, ləğv edilmiş Milli Təhlükəsizlik Nazirliyinin (MTN) əməkdaşları 2010-cu ildə şirkətə gəlib onu həbs edib: “MTN-də məndən 2 milyon manat pul istədilər. Mən də 1 milyon 200 min manatla razılaşdım. Çünki oradan canımı qurtarmaq istəyirdim.
Lakin “MTN işi”ndə zərərçəkmiş kimi tanınmamışam”.
P.Cəlilovun sözlərinə görə, “Bank Standard”dan, ümumilikdə, 18 milyon manat kredit götürüblər, həmin pullardan isə 15 milyon manatını ödəyiblər.
Məhkəmənin növbəti iclası yanvarın 25-nə təyin edilib.
*** 14:45
Sonra prosesdə təqsirləndirilən şəxsin vəkili Janna Bağırova zərərçəkmişin nümayəndəsinə suallar verib.
Zərərçəkmişin nümayəndəsi sualları cavablandırarkən bildirib ki, təqsirləndirilən Ç.Cəlilov 13 milyon 962 min manat pul vəsaitini məsimsəyib.
Prosesdə şahid qismində Ç.Cəlilovun qardaşı Pərviz Cəlilov dindirilib. O, 2001-ci ildən “Çudo Peçka” şirkətində baş direktor vəzifəsində işlədiyini söyləyib: “İlk mağazanı da həmin ildə açdıq. Orta hesabla ildə 2-3 mağaza açırdıq. “Bank Standard”dan 2006-cı ildən kredit götürməyə başladıq. Biz hər ay banka 600 min manat pul qaytarırdıq. 2011-ci ildə bankın sabiq sədri Səlim Kirman bizə birgə işləməyi təklif etdi. Biz əvvəl razı olmadıq. Məcbur olduq, onlar deyən şərtlərlə razılaşdıq. Çünkü banka borcumuz var idi. Sonra bizi şirkətə yaxın buraxmadılar. Məhkəməyə müraciət etdik. 2016-cı ildə isə Binəqədi Rayon Məhkəməsinin qərarı ilə şirkət bizə qaytarıldı”.
O, ifadəsində aldadıldıqlarını qeyd edib: “2009-cu ildə köhnə borcları bağladıq, sonra yenidən kredit götürdük. Bundan sonra banka borcumuz yarandı. Biz onların dedikləri ilə hərəkət edirdik. Bankın sabiq rəhbəri Səlim Kirmanla birbaşa mən əlaqə saxlayırdım”.
***
Bu gün Bakı Ağır Cinayətlər Məhkəməsində “Çudo Peçka” və “ÇP Aqro” MMC-lərinin təsisçisi Çingiz Cəlilovun cinayət işi üzrə məhkəmə iclası davam etdirilib.
Hakim Əhməd Quliyevin sədrliyi ilə keçirilən prosesdə dövlət ittihamçısı ittiham aktını elan edib. Çingiz Cəlilov ittihamla özünü qətiyyən təqsirli bilməyib.
Hazırda proses davam etdirilir.
Qeyd edək ki, Baş Prokurorluğun yaydığı məlumata əsasən, müxtəlif hüquqi və fiziki şəxslərin adından bankdan kredit kimi aldığı külli miqdarda vəsaiti bankın vəzifəli şəxsi ilə birgə qulluq mövqeyindən istifadə etməklə təyinatından yayındıraraq şəxsi ehtiyacları üçün mənimsəyən şirkət rəhbərinin qanunsuz əməlləri barədə Baş prokuror yanında Korrupsiyaya qarşı Mübarizə Baş İdarəsində araşdırma aparılıb.
Keçirilmiş istintaq-əməliyyat tədbirləri ilə müəyyən edilib ki, “Çudo Peçka” və “ÇP Aqro” MMC-lərinin təsisçisi Cəlilov Çingiz Asim oğlu “Bank Standard” QSC Kommersiya Bankının İdarə Heyətinin sədri olmuş Kriman Səlim Eldaroviçlə qabaqcadan razılaşmaqla əlbir olaraq həmin dövrdə banka müxtəlif mənbələrdən, o cümlədən xarici və daxili investorlardan və depozitlərdən daxil olmuş külli miqdarda pul vəsaitləri hesabına 21 milyon 874 min manat məbləğində krediti bankın Müşahidə Şurasının razılığı olmadan dəyəri süni olaraq artıq qiymətləndirilmiş əmlakları girov qoymaqla özünün, yaxın qohumlarının və qohumluq münasibətində olduğu, eləcə də rəhbərlik etdiyi cəmiyyətlərdə işləyən ayrı-ayrı şəxslərin adlarına guya bağ evinin alınması, mənzil təmiri, torpaq alınması və bu kimi digər təyinatlarla rəsmiləşdirilməsinə nail olmuş, daha sonra qeyd olunan kredit müqavilələri əsasında banka guya külli miqdarda kredit borcu olduğu görüntüsünü yaradaraq bir neçə dəfə restrukturizasiya (kreditin və ya onun ödənilməsi şərtlərinin dəyişdirilməsi) etdirməklə mənimsədiyi 13 milyon 962 min manat pul vəsaitini Səlim Krimanla öz aralarında bölüb.
Ç.Cəlilovun qeyd edilən kredit məbləğlərini bankın vəzifəli şəxsləri ilə əlbir olaraq öz qulluq mövqeyindən istifadə etməklə təyinatından yayındırmaqla şəxsi ehtiyaclarına xərcləməsinə şübhələr üçün əsaslar yarandığından ona Cinayət Məcəlləsinin 179.3.2 (külli miqdarda mənimsəmə və ya israf etmə, yəni təqsirkara etibar edilmiş özgə əmlakını talama) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə ittiham elan olunmaqla barəsində məhkəmənin qərarı ilə həbs qətimkan tədbiri seçilib.
Hazırda Ç.Cəlilovun cinayət işinə Bakı Ağır Cinayətlər Məhkəməsində baxılır. Təqsirləndirilən şəxsin və övladlarının əmlaklarının ümumi dəyəri 7 milyon 300 min manat kimi qiymətləndirilib və bütün əmlaklarına həbs qoyulub.
Xatırladaq ki, 2016-cı ilin sentyabr ayının 28-də S.Krimanın cinayət işinə təqsirləndirilən şəxs qismində cəlb olunmasına dair qərar qəbul edilib. Lakin o, istintaqdan gizləndiyi üçün barəsində axtarış elan olunub. Binəqədi Rayon Məhkəməsinin 5 oktyabr 2016-cı il tarixində çıxardığı qərarla S.Krimanın barəsində həbs qətimkan tədbiri seçilib. Eyni zamanda o, “İnterpol” xətti ilə axtarışa verilib.
(report)
Oxunub: 260
