Müsəlman Birliyi Hərəkatının sədri, ilahiyyatçı Tale Bağırzadənin xanımı Leyla İsmayılzadə haqqında cinayət işi başlanıb. Sentyabrın 26-da Leyla İsmayılzadə ilə əlaqə saxlayan Ədliyyə Nazirliyinin İstintaq İdarəsinin müstəntiqi bu barədə məlumat verib və ondan vəkilləri ilə birlikdə sentyabrın 26-da idarədə olmasını istəyib.
Leyla İsmayılzadə “Azadliq.info”ya bildirib ki, sentyabrın 27-də saat 11.30 radələrində istintaq idarəsində olacaq: “Ehtimal edirəm ki, məni təqsirləndirilən şəxs qismində cəlb edib, ittiham irəli sürəcəklər”.
Leyla İsmayılzadənin bildirdiyinə görə, bu cinayət işi martın 20-də üç övladı ilə birlikdə həyat yoldaşının yanına gedərkən üç yaşlı oğlu Abbasın çantasında oyuncaqların arasından tapılan köhnə telefonla bağlıdır. Leyla Bağırzadə həyat yoldaşına həbsxanada qadağan olunmuş əşya – mobil telefon keçirməkdə ittiham olunur. Cinayət işi CM-in 317-1.1 maddəsilə başlanıb. Bu maddədə cərimə cəzası və islah işləri ilə yanaşı, azadlıqdan məhrumetmə də nəzərdə tutulub.
Leyla İsmayılzadənin bildirdiyinə görə, müstəntiq istintaqın qısa müddətdə yekunlaşacağını və işin məhkəməyə göndəriləcəyini deyib.
Leyla İsmayılzadə baş verənlərin həyat yoldaşı Tale Bağırzadəyə təzyiq məqsədi güddüyünü bildirir. Onun sözlərinə görə, əks halda, məsələ bu qədər şişirdilməzdi: “Çünki özləri də yaxşı bilir ki, o telefon məqsədli şəkildə aparılmayıb. Köhnə telefondu. Abbas babasının o köhnə telefonuyla oynayırdı. Ona görə də oyuncaqların arasında olurdu. Uzunmüddətli görüş üçgünlük olur. Həbsxanaya iki aydan bir sovqat aparmaq mümkün olur. Ona görə də həbsxanaya getməmişdən əvvəl iki-üç gün hazırlıq işləri görürük, yeməklər bişirməyə, alış-verişə baş qarışır. Yaddan çıxıb, o telefon da oyuncaqların arasında qalıb. Bunu belə şişirməkdə məqsəd Hacıya təzyiq göstərməkdir. Amma nəzərə almalıdırlar ki, bu cür təzyiqlər Hacını əyə bilməz”.
Azadliq.info