Çingiz Qənizadənin də başı dərddə
Parlamentdirmi, lombarddırmı, auksiondurmu, bilən yox. Qalmaqal qalmaqal ardınca çıxır. Kim kimə borc verib, kim kimə pul “atıb”, kim kimə kələk gəlib, demək çətindir. Bircə aydın görünən odur ki, bu gedişlə parlamentdə bəzilərinin “kəlləsi gedəcək”. Ağlınıza başqa şey gəlməsin, söhbət daha bir neçə deputatın mandatını əlindən alıb, parlamentə legitimlik donu geyindirmək cəhdindən gedir. Rafaeli belə asanlıqla istefaya məcbur edən qüvvə başqalarını niyə etməsin? Yayılan xəbərlərə görə, indi də deputat Çingiz Qənizadənin başı dərddə. Deputatın qardaşlarının və yaxın qohumlarının banka bir xeyli borcu olduğu ortaya çıxıb. Sən demə, “Accessbank” deputatın qardaşları Feyruz Qənizadə, Gündüz Qənizadə, yaxın qohumları M.Qəniyeva, Rövşən Əfəndiyev və Ruslan Həşimova qarşı Ağdaş Rayon Məhkəməsində iddia qaldırıb. Keçən ilin sonundan başlanan məhkəmə işi bu ilin iyun ayınadək davam edib. Yumşaq dillə desək, məhkəmə yekunda qərarı ertələyib, ərizənin baxılmamış saxlanılması barədə qərar qəbul edib. Kreditin biznes məqsədi ilə götürüldüyü və böyük miqdarda olduğu bildirilir.
“Təmiz reputasiyalı” deputatın adı həm də bir qətl işində keçir
Millət vəkili Çingiz Qənizadə məsələ ilə bağlı yayılmış məlumatlara münasibət bildirib. O deyib ki, qardaşı Gündüz Qənizadə uzun illərdir Ağdaş rayonunda diş həkimi işləyir, 60 yaşı var. O, “Accessbank”dan bir neçə dəfə kiçik məbləğdə kredit götürüb və vaxtında qaytarıb. Mətbuatda adı gedən qohumları isə kredit götürülərkən zamin duran şəxslərdir. “Axırıncı kredit 17 min manat dəyərindədir və qardaşım kredit şərtlərinə uyğun olaraq, buna görə evini girov qoyub. Məndə olan məlumata görə, o, kreditin bir hissəsini axırıncı inflyasiyaya qədər ödəyib. Sonrakı dövrdə bankla onun arasında fikir ayrılığı yaranıb. Daha sonra bank qardaşım Gündüz Qənizadəni və zamin durmuş digər şəxsləri mülki qaydada məhkəməyə verib…” Qənizadə məlumatın mediaya sızdırılmasını bədxahların məqsədyönlü işi adlandırıb və bildirib ki, bu onun təmiz reputasiyasına kölgə salmaq istəyənlərin işidir. Bu açıqlama məsələyə müəyyən qədər aydınlıq gətirdi, amma deputatın “təmiz reputasiya” söhbəti bir az qaranlıq oldu. Axı Qənizadənin o parlamentə hansı yollarla gedib çıxdığını ölkədə bilməyən yoxdur. O krediti deputatın öz biznesi üçün götürdüyünü anlamaq çoxmu çətindir? Üstəlik, onun adı xeyli vaxtdır Rusiyada öldürülən ağdaşlı iş adamının qətlində hallanır. İstintaq nəticəsində onun həmin qatil ilə əlaqələri olan adamlarla bir qovluq telefon danışıqları, yazışmaları çıxıb ortaya. Hansı təmiz reputasiyadan, hansı məsumluqdan danışır indi cənab deputat? Aldatmaq da bir yerə qədər. Artıq xalq hər şeyi yaxşı bilir və hər kəsi də yaxşı tanıyır. Hamı bilir ki, ölkədə qanunlar işləsəydi, Çingiz Qənizadələr çoxdan məhkəmə qarşısında dayanmışdı.
Rövnəqə nə vaxt növbə çatacaq?
Bəli, parlamentdə yarpaq tökümü başlayıb. Hökumət ömrünü uzatmaq üçün birilərini qurban verməyə məcburdur. Amma hələ ki, qurbanlıq üçün ən zəif fiqurlar seçilir. Belə olmasaydı, parlamentdə istefaya göndəriləcək adamların sırasına birinci Rövnəq Abdullayevi qoyardılar. Oğlunun 2, 5 milyonluq saat qalmaqalından, xaricdə çıxardığı hoqqalardan sonra belə adama güldən ağır söz deyən olmadı. Hətta hakimiyyətin əlində oyuncağa çevrilmiş media vasitələri belə Rövnəqin üstünə gedib, kəskin bir şey yazmağa cürət etmədi. Adamın nədən bu qədər qorxulu və toxunulmaz olduğu məlum. SOCAR-da neftdən gələn bütün milyardları onun əliylə ofşorlara ötürüb həzm-rabedən keçiriblər. O üzdən hələ ki, bu sirr dağarcığına dəyib toxunan yoxdur. Lakin bu heç də növbənin ona gəlib çatmayacağı anlamına gəlməz. Orda hamıya növbə çatacaq, ya bir az tez, ya bir az gec…
Azad