Rafael getdi, amma parlamentdəki tək saxtakar odurmu?
Parlamentdə yarpaq tökümü başlanıb. Vəziyyətin gərgin olduğunu yuxarılar hamıdan yaxşı bilir. Deputat mandatını girov qoyub borc götürməklə gündəmi silkələyən Rafael Cəbrayılovun parlamentə bugünkü müraciəti də durumun ağır olmasından xəbər verir. Bu hakimiyyətin parlament tarixində mandatından imtina edən deputatmı görmüşdük? İlahi ədalət var və o, nəhayət, bizə bu günü də göstərdi. Bu gün R. Cəbrayılov mandatından imtina etməsi ilə bağlı parlamentə müraciət edərək istefa qərarını açıqlayıb. Deputatın müraciətini Hüquq siyasəti və dövlət quruculuğu komitəsinin sədri Əli Hüseynli oxuyub. Beləliklə, protokol qaydasında qərar Mərkəzi Seçki Komissiyasına göndəriləcək. Seçki Məcəlləsinə uyğun olaraq MSK deputatın mandatdan məhrum edilməsi ilə bağlı qərar verəcək. Dünən məsələyə İntizam Komissiyasında baxılması təklifini səsləndirən Siyavuş Novruzov da qeyd edib ki, məsələ hüquqi şəkildə həllini tapdığına görə də, bu məsələyə çıxışlarda toxunmağa ehtiyac yoxdur. Bax belə, bu da 3 milyona alınan, illərdir ən çirkin işlər üçün alver vasitəsinə çevrilən mandatın axırı. İllərdir xalqın səsini oğurlayıb, saxtakar şəkildə mandat paylayan MSK indi onu geri alır. Bu da bir şoudur, təbii. Parlamentə nifrət püskürən xalqın gözünü boyamaq üçün düşünülmüş bir ucuz şou. Amma bu işlər belə getməyəcək. O parlamentdə bircə halal mandat belə yoxdur. Rafaeli qurban verməklə, üstünüzdəki qara ləkəni yuyub, xalqın qəzəbindən yayınacağınızmı düşünürsünüz?
125 saxta mandatın hamısı geri alınmalı deyilmi?
Bu gün Azərbaycanda siyasi idarəetmə iflic olub. Ölkənin bu duruma düşməsində parlamentin böyük “xidməti” var. 125 deputatın arasında xalqı, ölkəni, gələcəyi düşünən 10-ca adam belə tapa bilməzsiniz. Bəlkə də, dünyada bütün deputat mandatlarının alınıb-satıldığı yeganə ölkəyik. Yeganə ölkəyik ki, parlament üzvü olmaq adama müstəsna imtiyazlar, toxunulmazlıq, ağır cinayətlərdən sığortalanmaq, qanundan yayınmaq, oğurluq sərvətlərə yiyələnmək imkanları verir. İki ulağın arpasını bölə bilməyən adamların 2-3 milyon manat verib mandat almaq arzusu da burdan qaynaqlanmırmı elə? Bu parlamentin üzərində böyük cinayətlər var. Spikerdən tutmuş elə o Rafaelin özünə qədər hamısı çirkab içindədir. Bu parlamentin 25 ildə ölkəyə vurduğu zərbəni heç qəddar düşmən də vura bilməzdi. İşğal olunan torpaqların bir qarışı geri alınmayıb, iqtisadiyyat çöküb, neft pulları ofşorlara daşınıb, təhsil, səhiyyə, əhalinin güzəranı bərbad duruma düşüb. Hansı xidmətdən, hansı dövlətilikdən danışır bu adamlar? Vəziyyət ağırdır, “kimisə, nəyisə qurban vermək lazımdır” deyə düşünürlər. Yanlış düşüncədir. Bu dəfə kimisə qurban verməklə iş bitməyəcək. Parlament tam tərkibdə istefaya getməlidir. Ölkə ölü canlardan xilas olmalıdır. Siz parlamentin iclaslarında o zala diqqət yetirin. Hər dəfə zalın ən azı yarısı boş qalmırmı? Hardadı bu adamlar, hansı vacib işlərin arxasınca gediblər? Belə bivec, tüfeyli və yarıtmaz adamlara dövlətin büdcəsindən o qədər pul ayırmağa dəyərmi?
Azərbaycan insanı yeni parlament istəyir
Bu gün Azərbaycanın hər şeydən çox xalqın iradəsi ilə formalaşan bir parlamentə ehtiyacı var. Ölkəyə belə bir parlament hava-su kimi lazımdır. Moskvada striptiz-bar açdırıb ermənilərə xidmət göstərən spikerdən bu xalqa fayda gəlməz. Oğlunun saat hobbisinə 25 milyon xərcləyən adamdan bu ölkəyə millət vəkili olmaz. Hər mövsüm başında maaş artımı davası aparıb, müəllimi bənnalıq etməyə çağıran deputatdan adamlıq gözləməyin. Bu ölkəyə yeni nəfəs, yeni ruh, yeni düşüncə lazımdır. Bu ölkəyə deputatların toxunulmazlığını qaldırıb, qanun qarşısında oturdan Zelenski qətiyyəti lazımdır. Bu ölkəyə yeni hakimiyyət və xalqa əfəndilik edən əsl millət vəkilləri lazımdır. O gün uzaqda deyil, o ölkəni qurmaq üçün əl-ələ vermək zamanıdır. O günün tez gəlməsi üçün on minlərin meydanlara çıxıb bu hökuməti istefaya göndərməsi zamanıdır.
Azad