“Son həftələrdə koronavirus onun əlində müxalifətə və müstəqil mediaya təzyiqlər üçün yeni vasitəyə çevrilib”
ABŞ-ın nüfuzlu Washignton Post qəzetində İlham Əliyevin koronavirus pandemiyasından sui-istifadə edərək siyasi rəqiblərini təqib etməsinə və ölkədə repressiv atmosferi gücləndirməsinə dair iki məqalə dərc edilib.
Qəzetin redaksiya məqaləsində pandemiya dönəmində avtoritar rejimlərin həbsxanalarda saxladıqları siyasi məhbusların həyatını risk qarşısında qoymasından bəhs edilir.
“İnsanların yaxın təmasa olduğu, kirli və gigiyena baxımından yararsız olan qapalı şəraitdə saxlanması ilə yaylan pandemiya onlar üçün ölüm hökmü ola bilər. Məhbuslar humanitar əsasda virusdan qorunmalı, siyasi məhbuslar söz və əqidələrinə görə ölməmələri üçün azad edilməlidir”, – deyə yazıda qeyd olunur.
Məqalədə bir müddət əvvəl həbsdən azad edilərək birbaşa Almaniyaya deportasiya olunan jurnlaist Əfqan Muxtarlının fikirlərinə də yer verilib: “İlham Əliyevin öz rejimini tənqid edənləri sistematik şəkildə həbs etdiyi Azərbaycanda həbsxanadan bir müddət əvvəl azad edilmiş jurnalist Əfqan Muxtarlı Jurnalistləri Müdafiə Komitəsinə məhbusların köhnə kazarmalarda saxlandığını, isti su olmadığını, onların yeganə ərzaq və dərman mənbəyi olan ailə ziyarətlərinin qeyri-müəyyən müddətə təxirə salındığını deyib. Muxtarlı epidemiyanın xəstəxanalarda yayıldığı təqdirdə məhbusların ölümlə üzləşəcəyindən qorxduğunu bildirib”.
Məqalədə daha sonra qeyd edilir: “Həbsdə olan müxalif nümayəndələri, hüquq müdafiəçiləri və jurnalistlər həqiqətən cəsarət göstərdikləri üçün həbsxanalardakı virusun təsirinə məruz qalmamalıdır.”
İkinci məqalənin müəllifi olan təhlilçi Coşua Kurlantzik isə diktaturaların böhranlardan siyasi məqsədlər üçün istifadə etməsinə dair yazısına İlham Əliyevin nümunəsindən başlayıb:
“Azərbaycan diktatoru İlham Əliyev hiyləgərliklə hakimiyyətini qoruyub saxlayır. Avropa demokratiyalarına neft ixracı ilə xidmət göstərir, Avroviziya mahnı müsabiqəsi keçirir, ABŞ-dan 100 milyon dollarlıq hərbi yardım təklifləri alır. Onun siyasətçiləri və müxbirləri mütəmadi qaydada həbsə atması fonunda bu nailiyyətlər daha çox diqqət cəlb edir. Hazırda isə o, hakimiyyətini cəmləşdirmək üçün yeni fürsət görür. Son həftələrdə koronavirus onun əlində müxalifətə və müstəqil mediaya təzyiqlər üçün yeni vasitəyə çevrilib.”
Müəllif bu xüsusda Əliyevin tənha olmadığını, onun kimi Türkiyədə, Rusiya və Kambocada da avtoritar liderlərin pandemiyadan istifadə edərək əllərində səlahiyyətlər cəmləşdirdiyini yazır.
“Avtoritar liderlər tez-tez fövqəladə hallardan – müharibələr, terror hücumları, yanğınlar və təbii fəlakətlərdən istifadə edərək əldə hakimiyyət cəmləşdirirlər”, – deyə Kurlantzik yazır.
Kurlantzik tarixin də belə nümunələrlə zəngin oluduğunu qeyd edir. Bu sırada o, İndoneziya despotu Suharto və Almaniya diktatoru Adolf Hitlerdən nümunələr gətirir.
“Avtokratların ələ keçirdiyi fövqəladə səlahiyyətləri geri almaq əksər hallarda çətin olur. Tarix göstərir ki, böhranlar başa çatdıqdan sonra belə çox vaxt avtoritar liderlər bu səlahiyyətləri əllərində saxlayır və onları idarəçiliyin normasına çevirir.”
Amerikanın səsi
