Qənimət Zahid
Son günlər Ermənistanın siyasi elitasını təşkil edən rəsmilər, eləcə də eks prezidentlər bir qədər fərqli terminlərdən istifadə etməyə başlayıblar. Münaqişənin ilk günlərində ermənilər «vurarıq, dağıdarıq, sökərik » kimi terminlərdən istifadə edirdilər, xarici vasitəçilər və vasitəçilik ruhuna köklənənlər isə «münaqişənin hərbi həlli yoxdur » deyirdilər. Münaqişənin hərbi həllinin olmadığını deyənlər sülh yolunu da tapa bilmirdilər. Ya da onların nəzərdə tutduqları sülh Azərbaycanın status- kvonu qəbul etməsini, imzalamasını, Qarabağın itirilməsinə siyasi və hüquqi razılıq verməsini gözləyirdilər. Həmin variantlar üzrə münaqişənin siyasi həlli də yox idi, amma hər halda onların hamısı belə hesab edirdi ki, müddət uzandıqca işğal edilmiş ərazilər üzərində azərbaycanlıların mənəvi bağlılığı da zəifləyəcək və günün birində ermənipərəst sülh üçün zəmin yaranacaq.
Bu, olmadı və göründüyü kimi azərbaycanlıların Qarabağa mənəvi bağları qətiyyən zəifləmədi, əksinə, işğal faktı uzandıqca bu mənəvi bağlar həm də bir mənəvi öhdəliyə çevrilirdi ki, Azərbaycan cəmiyyətini birləşdirən ən böyük dəyər, elə Qarabağın azadlığıdır.
Bu, həmin mərhələ idi ki, ermənilər öz silahlarının gücünə, ermənipərəst vasitəçilər isə diplomatik labirintlərinin məkrinə güvənirdilər. İndi ermənilərin ritorikası və istifadə etdikləri leksika dəyişib. İndi onlar özləri də «bu münaqişənin hərbi həlli yoxdur » ifadəsinə üstünlük verirlər. Vasitəçilər isə hərbi əməliyyatların nəticələrini gözləməyə üstünlük verirlər və həvəssiz bəyanatlardan uzağa getmirlər.
Ermənistanın siyasi elitasının «münaqişənin hərbi həlli yoxdur » ifadəsindən yapışması isə o ərəfəyə düşür ki, Ermənistanın hərbi potensialı tükənmiş kimidir və baxımdan onları da başa düşmək çətin deyil. Ermənilər sülh istəyirlər, amma bunu qeyd- şərtsiz sülh kimi istəməmək üçün dirənirlər. Yəni, ötəri bir qürur məsələsində ilişib qalıblar. Qubadlı və Kəlbəcər azad edildikdən sonra bu qürur məsələsi də arxa planlarda görünməz olacaq : təslim aktı imzalanacaq. Təslim aktında Ermənistan Azərbaycanın ərazi bütövlüyünü tanıyacaq, əks təqdirdə Naxçıvandan gələn quru yoluna, ən azı, Azərbaycanın da iddiası faktı ilə qarşılaşmalı olacaq.
1997- ci ildə Levon Ter- Petrosyan doğru qənaətdə idi.