İlham Hüseyn
Eşitdiniz də, əzəmətli hökumətimiz 27 ildən sonra Əli Kərimliylə bağlı Himalay dağı boyda “kompromat” tapıb. Bu “kompromat”dan o qədər sevincək olublar ki, təkrar-təkrar tirajlamaqdan doymurlar.
Amma həmişəki kimi akula ovuna gedib, kilkəsiz qayıdıblar.
Əli Kərimlinin vatsapla İradə Nərimana dedikləri RH-nin qərarıdı. Yəni, Aydın Əliyevlə bağlı RH-də müzakirə olub və partiyadan xaric olunmasıyla bağlı qərar verilib. Amma rejimin tələsinə düşən Aydın məhkəməyə baş vurmaq qərarına gəlib və bu barədə Əli bəyə bir gün əvvəl məlumat verilib. Əli bəy də İradə xanıma bununla bağlı tapşırıq verib ki, lazım olan sənədləri hazırlasın.
Mən sizə daha böyük bir sirrimizi açım. Bizim əksər iclaslarımızın protokolu yoxdur. İclaslardan kiçik qeydlər götürülüb, leyhinə-əleyhinə olmaqla, səsverməylə qərar qəbul edilib. Çünki illərdi normal iclas keçirmək imkanımız yoxdur, ayaqüstə, parklarda, kafelərdə iclas keçiririk, qərargahımız partladılıb, kərgüzarlıq işlərin normal apara bilmirik. Yəni, biz illərdi döyüşdə olduğumuza görə, silahımızın gülləsin buraxıb, ayaqqabımızın bağıyla məşğul ola bilməmişik.
Aydına gəlincə, mətbuatdan da bilinir ki, adam yoluna xəyanət edib, əqidəsinə xilaf çıxıb və buna görə də partiyadan kənarlaşdırılıb. Amma onunla dəfələrlə söhbət olunub, RH-də müzakirə aparılıb. Tam məsuliyyətimlə deyirəm ki, RH-nin qərarı olmasa Əli Kərimli bu adamı partiyadan uzaqlaşdıra bilməzdi. Bu boyda rejimdən qorxmayan cəbhəçilər, Əli Kərimliyə heç bir qeyri-qanuni addımı güzəştə getməz. Sadəcə olaraq həmin iclasın protokolu da, yuxarıda qeyd etdiyim kimi kiçik qeydlə yekunlaşıb, səsvermədə əksəriyyət partiyadan çıxarılmasının tərəfdarı olub. Məhkəmə bərpasıyla bağlı qərar versə, biz yenidən çıxaracağıq və burda qeyri-qanuni heç nə yoxdur.
Amma məsələnin daha maraqlı tərəfi var.
Əvvəla, bioqrafiyası korrupsiya, saxtakarlıq, şər-böhtan, qanunsuz müqavilələr, icra olunmayan sərəncamlar, “atkat”larla zəngin olan bir hökumətin, Əli Kərimlinin üzərinə “qısır” səs yazısıyla gəlməsi, analoqsuz həyasızlıqdı.
İkincisi, illərdi Əli Kərimlini Rusiyanın agenti olmaqda, İrana xidmət etməkdə, Qərbin maraqların güdməkdə, Sorosdan maliyyələşməkdə ittiham edib, axırda süfrəyə adi bir səsyazısı qoymaq, Əli Kərimlinin qələbəsidi.
Görünür, insan xəyanətsiz, prinsiplərinə sədaqətlə yaşayanda, ona qarşı tapılan kompromat da rəqibin zərərinə işləyir.