Türkel Oğuz
Təəssüf ki, müharibə dövrünün öz qanunları var. Populistlərin səsi gur gəlir, kimi vəzifə qazanır, kimi layıhə, boğula-boğula susursan, amma…
Hər şey öncədən yanlış idi.
…Bir normal ölkə qurmalı idik. Güclü nizami ordumuz olmalı idi. 30 milyard həcmində müdafiə xərci offşorlara və 4 mərtəbəli villalara yox, ordu quruculuğuna, müasir silahlara xərclənməli idi. Olsaydı, minlərlə gəncimiz indi qara torpağın altında yatmazdı…
…normal, azad, ədalətli cəmiyyət qurmalı idik. İşgəncəsiz, siyasi məhbussuz, azad mətbuatı, ədalətli seçkisi, müstəqil məhkəməsi olan cəmiyyət. Dünyaya açılardıq. Diplomatiyamızı gücləndirib 7 rayonun sülh yolu ilə azad olunmasına çalışardıq. Bacarardıq, bacarmazdıq, deyə bilmərəm, ancaq şanslarımız az olmazdı. Xüsusilə də, iki yüz milyardlıq neft sərvətilə güclü iqtisadiyyat, üstün sosial rifah və qüdrətli ordu qursaydıq ermənilərin spekulyasiya imkanlarını xeyli daralda bilərdik…
…Sosial ədalət olsaydı, məmurun övladı da kasıb balası ilə eynihüquqlu olsaydı həmin o məmur müharibəyə başqa gözlə baxardı. İndiki kimi laqeyd olmazdı. Çünki, öz balası da səngərdə olardı. O zaman hər bir əsgər ölümünə öz faciəsi kimi yanaşardı, gizlədilməli statistika kimi yox…
…Utopiyadır, tarix şərt şəklini tanımır deyəcəksiniz, haqsız da deyilsiniz…
…amma bütün bunlar əl çatan idi. Gerçək idi. Bu şanslar əlimizdə idi…hamısını qaçırdıq…
Bir hakimiyyət hikkəsi, hırsı uğruna…bir də izahını tapa bilmədiyim biganəliyimizdən dolayı…
Və bu gün Fransa Senatının iyrənc qərarı ilə üz-üzəyik. Məhz iyrənc. Çünku, həmin ermənilər Xocalıda soyqırımı törədəndə də, 7 rayonumuzu işğal edib etnik təmizləmə həyata keçirındə də, indi soydaşlarımızın içində 25 il yaşadıqları evlərini və meşələrimizi yandırıb Kəlbəcərdən çıxanda da o senatorlar susmuşdular…
və Allah betərindən saxlasın…
…amma nə yazıq ki, kənardan baxanda biz də onlardan yaxşı görünmürük. Gürcünün, ukraynalının, moldovanın torpağını, elə öz Qarabağımızı işğal etmiş işğalçının üzünə-gözünə ənlik-kirşan yaxıb “sülhməramlı” adı ilə dünyaya sırıdığımız üçün…
…Rus bayrağı ilə yürüş edənlər, necəsiniz?! Bir zəhmət, gələn dəfə erməni bayrağını da unutmayın, çünki Qarabağda qoşa dalğanırlar, böyük qardaşın xoşuna gələr…manqurt yığını…