AXCP Rəyasət Heyətinin üzvü Fuad Qəhrəmanlı
Bu gün onun doğum günüdür.
İllərlə yanında olduğum, ən mürəkkəb situasiyalarda hərəkətlərinə, düşüncələrinə şahidlik etdiyim Əli bəy haqqında deyəcəklərim sadəcə xoş sözlər deyil, müşahidələrim nəticəsində gəldiyim qənaətlərdir.
O, uzun illərdir ki, şərin ölçüsüz zorakılığı, xəyanətə təşviq edən pulları, kəmfürsət zərbələri, heç bir əxlaqa sığmayan yalan və iftiraları, hər an pusquda duran fürsətcil əlaltıları qarşısında mətanətlə duruş gətirərək xalqın nəzərində mənəvi dəyər, inam və sevgi qazanıb. Məhz buna görədir ki, rejimin onun hər addımını nəzarətdə saxlasa da, internetin kəssə də, fəaliyyətini məhdudlaşdırmaq üçün ən ağla gəlməz üsullara əl atsa da, xalqın inam ünvanı olan Əli Kərimli təhlükəsi Demokl qılıncı kimi rejimə rahatlıq vermir.
Əli bəy illərdir ki, hakim rejimin saxtakarlıq, korrupsiya, zorakılıq siyasətinə qarşı çağdaş demokratik düşüncəni, xalqın istəklərini qorumaqda və cəmiyyətə fərqli bir siyasi əxlaq, azad gələcəyə inam aşılamaqdadır. O bir lider kimi xalqı təkcə hakim rejimin qoyduğu qadağalara, yaratdığı problemlərə qarşı çıxmağa çağırmır, həm də bu yolda hər kəs üçün fədakarlıq və cəsarət örnəyi yaradır.
Kiçiltmək istədikləri hər cəhddə, məğlub etmək istədikləri hər qarşıdurmada o, öz haqlı mövqeyi ilə xalqın nəzərində daha da böyüyür, mənəvi qələbələrlə onu yenilmiş görmək istəyənləri məyus edir.
Onun siyasi lider kimi özünəməxsus bacarığı ondadır ki, rəqiblərinin hiddəti, ona qarşı amansız davranışları nə qədər paradoksal görünsə də, Əli Kərimlinin xeyrinə işləyir. Çünki mövqeyinin haqlı olması, insanlarla dürüst davranışı, hər zaman xalqının istəklərini dilə gətirdiyi üçün hədəfə çevrilməsi, Əli Kərimliyə olan basqıların, təzyiqlərin haqqa, demokratik dəyərlərə olan təzyiqlər kimi görünməsinə səbəb olur. Buna görə də onu əzmək, zəiflətmək istəkləri əks nəticələr verir. Bu üzdən də ona düşmənçilik edələrin hikkə alovu, aqressiv nifrəti zaman- zaman heç bir hüquq, əxlaq sərhəddi gözləmədən açığa vurur, cəmiyyətin nəzərində tünd sirkə kimi öz qabını çatladır.
Əli bəyin bir lider kimi üstünlüyü, onun siyasətçi kimi yüksək peşəkarlıqla, insanlarda ona inam, güvən yaradan səmimiyyət və ədalət hissini bir arada tuta bilməsidir. O öz mübarizəsinin həm ideoloqu, həm bacarıqlı təşkilatçısı, həm də geniş kütlələrin qəlbinə xitab edə bilən mahir natiqidir. Bu səbəbdəndir ki, hakimiyyətin yaxın ətrafını həbs edərək Əli bəyi, AXCP-ni zəiflətmək istəkləri hər dəfə boşa çıxır.
O demokratiya, azadlıq uğrunda mübarizənin təkcə lideri deyil, həm də ən çox qurban verən, bədəl ödəyən fədakarlıq nümunəsidir.
O, bu gün, təkcə partiya lideri deyil. İllərdir xalq üçün apardığı mübarizəsində, xalqın da yerinə bədəl ödəyərək, bunu heç kimə, heç kəsə minnət qoymadan, təvazökarlıqla öz tərəfdarları üçün də mübarizə yoluna çevirərək, yüz minlərlə insanın sevgisini, rəğbətini qazanıb.
Əli Kərimli insanlara heç bir maddi təminat, imtiyaz vəd etmir, əksinə, demokratiya uğrunda mübarizəyə görə təqib-təzyiq, həbs edilmək riski olduğunu dilə gətirir. Bu şərtlərdə onun insanları öz ətrafında toplamağı bacarması və onları böyük fədakarlıqlara sövq edə bilməsi, lider kimi onun harizmasının gücünü göstərir. Məhz buna görədir ki, onun təqdiri, onun etimadı, insanlar üçün bir stimul, fəaliyyət motivasiyası hesab olunur. Belə bir şəraitdə onun liderliyinin cazibəsi ilə siyasi mübarizəyə qoşulanların sayının artması və Xalq Cəbhəsinin bütün təzyiqlərə rəğmən böyüməsi, Əli Kərimli fenomeninin nəticəsidir.
O, təkcə idarəçilikdə, rəhbərlikdə lider deyil, həm də cəsarət örnəyi olmaqla, mübarizənin ən ağır yükünü öz üzərinə götürməklə öncüldür. Əvvəllər də dəfələrlə olub, 19 oktyabrda da növbəti dəfə sıravi cəbhəçilərlə qol-qola polis dəyənəyinin üstünə getməklə və ağır işkəncəyə məruz qalmaqla, bir daha göstərdi ki, Əli bəy öz göstərmədiyi cəsarəti, etmədiyi fədakarlığı kimsədən tələb etmir.
Əli Kərimlinin parlaq zəkası və dəmir məntiqi, qılınc kimi kəsərli natiqlik məharəti ilə səsləndirdiyi tənqidi fikirlər, hakimiyyətiin üzünə oxunan ittiham hökmü kimi səslənir, rejimin oğru, talançı mahiyyətini ifşa edir.
Ona görə də iqtidarın ona qarşı aqressiyası, qəzəbi səngimək bilmir. Çünki, bu çıxışların qarşısında qarşı qoyulacaq əks-arqument, mübahisə doğuracaq bir məqam, gizlədiləcək bir yalan saxlamaq mümkün olmur. Ona görə də, onunla debat aparmaq, polemikaya girmək yerinə, təcrid etməkdə, ətrafındakıları repressiyalara məruz qoymaqda görürlər çarəni.
Əli bəyin hakimiyyətin repressiya və təzyiqləri qarşısında heç vaxt təklənməməsinin ən əsas səbəbi də, məhz insanlarla özü arasında dərin mənəvi bağ qura bilməsində, öz şəxsiyyətinə, prinsiplərinə qarşı ehtiram və sevgi yarada bilməsindədir.
O, heç vaxt partiya daxiili müzakirələrdə intellektual üstünlüyündən, əksər vaxtlarda haqlı çıxan məntiqinin gücündən sui-istifadə etmir, Elçibəydən gələn mənəvi mirasın davamçısı kimi, fərqli fikirlərə şərait yaratmaqla, təvazökar davranışa və siyasi əxlaqın prinsiplərinə riayət etməklə, gerçək bir demokrat, xoşgörülü siyasətçi kimi davranır.
Əli Kərimli təkcə öz cəsarətli çıxışları ilə rejimin qorxu kabusunun insanların iradəsinə vurduğu zəncirləri sökmür, təkcə yanlışları, səhvləri tənqid etmir, həm də yol göstərir, hədəf qoyur. Hər kəs yolundan bəlli olur deyiblər. Əli bəy avtotitar zehniyətin yaratdığı, insan ümidlərinin hakimiyyət ehtiraslarının doymaz azğınlığı ilə zorlandığı, haqqın yalan dirəklərində Məsih kimi çarmıxa çəkildiy, ədalətin hər gün məhkəmələrdə qətl edildiiyi, azadlıq tələbinin az qala bidət sayılıb, inkivizisiya qaydaları ilə yarğılandığı məmləkətdə, fərqlqi, ləyaqətli ömür vəd edən azad gələcək adlı bir yolun bələdçisidir. O bu yolda aydın göstərdiyi hədəfləri ilə insanlara xoşbəxt həyat, maddi rifah, ləyaqətli ömür, azad seçim, halal qazanc, dövlət adlı xidmətçinin qayğısını təklif edir.
O, inandırır, ruhlandırır, hər kəsə dinindən, sosial mənsubluğundan, şəxsi seçimindən asılı olmayaraq qucaq açıb birliyə, xalqın qanını vampir kimi soran, içindən qurd kimi yeyən, insanların arzularını bataqlıq kimi qəhr edən, azadlığını boğan, rifahını oğurlayan şər rejiminə qarşı birliyə çağrış edir.
Onun bütün siyasi fəaliyyəti bütün ideoloji fərqləri, şəxsi intriqaları, siyasi maraqları bir kənara qoyub böyük bəladan qurtulmağa və bərabərcə yeni bir dönəm, yeni bir başlanğıc, yeni bir gələcək inşa etməyə dəvət üzərində qurulub .
Bu gün Əli bəyin doğum günüdür. Əslində bu gün ona tutduğu yolda uğurlar arzulamaq, təkcə ona yönəlik fərdi arzu deyil, həm də xalqımıza xoş gələcək, şər rejimindən qurtuluş diləməkdir. Odur ki, oz həyatını xalqının arzuları, acıları və sevinci ilə eyniləşdirmiş, onun azadlıq ümidini yaşadan Əli bəyə bu şərəfli mübarizə yolunda uğurlar diləyirik. Uca Allah mübarizənin qələbəsini – xalqımızın nicatını tezləşdirsin. Doğum günün mübarək Əli bəy.
Xalqın azadlıq ümidini yaşadan lider