Milli Şuranın sədri Cəmil Həsənli
Bu gün tanınmış ziyalı, fədakar alim Yadigar Türkelin ölüm xəbərini eşidib çox kədərləndim. Covid cəmiyyətdə bir çox mənəvi dəyərlərin yadigarı olan Yadigar bəyi də apardı. İdeyalı, ardıcıl, səmimi və fədakar bir Rəsulzadəçi idi Yadigar bəy. Lap bu yaxınlarda onun 70 illiyi ilə bağlı bu yazını yazmışdım.
Yadigar Türkel fədakar bir ziyalıdır. 70-i haqladı, amma bu 70 ildə heç haqdan uzaq düşmədi. Milli-mənəvi irsin öyrənilməsində və təbliğində böyük əməyi var. Şəxsi örnəklər verib bununla bağlı. XX əsrin əvvəlində millətləşmə düşüncəsinin xalaqın, daha çox gəncələrin ruhuna hopmasında fədakarlıq edib. Rəsulzadə sevdalısıdır. Böyük öndərin əsərləri, ideyaları ilə nəfəs alır. Az imkanla Məhəmməd Əmin bəyin milli diriliyə xidmət edən əsərlərin demək olar ki, hamısını yenidən nəşr edib. Təmənnasız, minnətsiz. Bütün etdiklərinə görə heç kimdən mükafat gözləməyib. Heç gözləntisi də olmayıb. Gördüyü işlərin mükafatını vicdanından almağa çalışıb.
Yadigar bəy filosofdur. Amma onu Fəlsəfə İnstitutunda çoxdan işdən çıxarıblar. Özü də işdə yol verdiyi “ciddi nöqsanlara” görə. Nədir bu “ciddi nöqsanlar”? Elmə, vətənə, millətə xidmət bu ölkədə artıq çoxdandır ki, ciddi nöqsan hesab edilir. Yadigar Türkel də vətəni sevməyin, layiqli vətəndaş olmağın, haqqa tapınmağın cəzasını çəkilr. Milli-fəlsəfi fikrin inkişafında əməyi olan bir alimi hələ təqaüd yaşana çatmazdan xeyli əvvəl işdən çıxardılar. Amma o “işsiz” qalmadı, Rəsulzadənin irsinə tapındı, XX əsrin əvvəllərinin düşüncə xəzinəsini xalqın malı etdi. Bir neçə il əvvəl böyük mütəfəkkirin “Azərbaycan şairi Nizami” əsərinin sadələşdirilmiş nəşrini oxuculara çatdırdı.
Yadigar bəy həm də peşəkar idmançıdır. 70-ində belə gümrah qalmasının səbəbi də idmandır. Çox yarışlarda iştirak edib, yüksək yerlər tutub. Fiziki cəhətdən sağlam olması onun ruhunu da həmişə saz saxlayıb. Dili təmiz (çağdaş oxucu üçün bir az da axarlı), fikri aydın, qayəsi bəlli, düşüncəsi milli, əməlpərvər bir ziyalıdır Yadigar Türkel. 70 yaşın ucalığına zülmə böyün əymədən yetişib Yadigar bəy. İçində olan azadlıq ruhudur ona güc verən, yaşadan və onu sabaha aparan. Sabaha doğru Yadigar bəy!