Milli Şuranın Koordinasiya Mərkəzinin üzvü Gültəkin Hacıbəyli
Dəqiq xatırlamıram. 2000-lərin əvvəlləri idi.
Xətrini çox istədiyim bir müxalifətçi deputat ilə dərdləşirdim.
Dedim ki, bunlar islahatlara söz veriblər, AŞPA qarşısında ciddi öhdəliklər götürüblər, cəmiyyətə, dünyaya böyük ümidlər veriblər, ancaq bu ümidləri doğruldacaq çox az iş görürlər. Bu, çox yanlış yoldur, sonunda xəyal qırıqlığı yaranacaq, ölkə inkişaf yoluna çıxa bilməyəcək. İslahatlar aparılmasa əhalinin sosial-iqtisadi durumu ağırlaşacaq və s.
Həmin müxalifətçi deputat məni səbirlə dinlədikdən sonra dedi ki, qızım, dediklərin hamısı doğrudur, ancaq sən belə şeyləri ürəyinə salma. Bir neçə ildən sonra ölkəyə böyük neft pulları axacaq, pul o qədər çox olacaq ki, yığıb-yığışdıra bilməyəcəklər və istər-istəməz qırıntılarından xalqa da pay düşəcək və xalq da onunla kifayətlənib uzun müddət susacaq.
Keçmiş həmkarımın dedikləri gerçək oldu. Ölkəyə 200 milyarddan çox neft gəliri daxil oldu, həmin pulun böyük hissəsi talandı, ofşorlara axıdıldı, bir ovuc görməmiş milyardlar sahibinə, Londonda, Parisdə, Dubayda, Moskvada dəyəri yüz milyonlarla ölçülən əmlak mülkiyyətçisinə çevrildi, sultanların belə ağlına gətirə bilmədiyi zənginliklər içində yaşadılar.
Həmin milyardların qırıntılarından xalqa da nəsə çatdı. Məsələn, oliqarxların tikintisində prorab, usta, fəhlə kimi çalışıb qəpik-quruş qazandılar, prezident təqaüdü aldılar… və bu qəpik-quruşa xatir susdular.
İndi isə vəziyyət dəyişib. Neft gəlirləri nisbətən azalıb, hakimiyyətin talamaq iştahası isə əsla və əsla azalmayıb ki, artıb. Və düşüblər zavallı millətin üstünə ki, sizə yedizdirdiyimiz o qırıntıları da qusun!
-I Qarabağ Savaşının qazilərinin müavinətini kəsirlər;
-II Qarabağ Savaşı qazilərinə müavinət vermirlər, noyabrdan bəri get-gələ salıblar, ən yaxşı halda I qrup əvəzinə III qrup verirlər;
-Gənc həyatını, əziz canını, gələcəyini, arzularını bu torpağa qurban vermiş Şəhidlərin ailələrinə 500 manat aylıq müavinət verilir, hakimiyyətə, prezidentə yaltaqlanan manıslara, zurnalistlərə, ziyanlılara isə 1500 manat təqaüd. Dəyərlərə, dəyərləndirməyə baxın, özünüz nəticə çıxarın. Belə dövlət ola bilməz, bunun adı nədirsə, kəsinliklə dövlət deyil!
- 130 mindən çox insanın pensiyası kəsilib. Guya saxta pensiya aldıqlarını deyirlər, ancaq bu günədək guya 130 min insana saxta pensiya verdiyinə görə bir fakt üzrə cinayət işi açılmayıb, bir məmur və rəsmi şəxs cinayət məsuliyyətinə cəlb olunmayıb;
-yaxın bir adamımın 12 yaşlı ürək problemli uşağının pensiyasını 5 aydan çoxdur vermirlər. Dövlət uşağa hər ay 200 manat pensiya kəsmişdi, ancaq valideynləri onu yaşatmaq üçün hər ay ən azı 1000 manatlıq dərman almaq məcburiyyətindədirlər. Özünüz fikirləşin, görün bu ölkədə nə qədər körpə korrupsioner dövlət idarəçiliyinin qurbanına çevrilərək həyatını itirir(((
- İnsanlara kütləvi şəkildə “pensiyanızı artıq vermişik, illər ərzində artıq ödədiyimiz pulu dövlət büdcəsinə qaytarmalısınız” tipli müraciətlər edilir, ardınca pensiyaları kəsilir;
- COVİD-19 pandemiyası zamanı bütün dünya ölkələri öz vətəndaşına yardım etdiyi halda, Azərbaycan hakimiyyəti yalnız öz şirkətlərinə, banklarına və otellərinə yardım etdi, vətəndaşlar isə hətta COVİD-19-a yoluxduqları halda belə öz vəsaitləri ilə müalicə olunmaq zorunda qaldılar. Pul tapan müalicə olundu, tapmayan həyatını itirdi(((
-ağır diabet xəstələrinə dövlət proqramı çərçivəsində pulsuz verilən 5 ədəd insulinin 2-ni kəsiblər ki, büdcəyə qənaət etməliyik(((.
- Pandemiya zamanı maska möhtəkirliyi xalqa ikiqat zərbə vurdu. Bir yandan 8 qəpiklik maskaların qiymətini qaldırıb 30 qəpik etməklə milyonlar qazandılar, digər tərəfdən vətəndaşlara kütləvi şəkildə maska cərimələri yazmaqla on milyonlar qazandılar və bu cərimələrdən Prezident Administrasiyasında çalışanların onsuz da yüksək, 6-8 min manatdan az olmayan əmək haqlarına əlavələr ödədilər. Sümürücülüyün, yırtıcılığın, görməmişliyin bundan artıq sübutu ola bilərmi?!
- ölkə insanının durumu bəlli, banklara borcu olanlar, dövlətin üzərinə saxta, qurama borc yükləyib borclandırdıqları insanların çiləsi azmış kimi, bir də mütləq qaydada Ədliyyə Nazirliyinin İcra Məmurlarının əmək haqqı fonduna bütün borcun 7 faizi qədər əlavə pul da ödəməlidir. Tək bu fakt, borcunu ödəmək iqtidarında olmayan adamdan bir də Ədliyyə Nazirliyinin əməkdaşlarının əmək haqlarına əlavə üçün pul tutmaq bu dövlətin antimilli, antiinsani və qəsbkar xarakterini isbatlamağa yetər.
Bu hələ Azərbaycan hakimiyyətinin Azərbaycan xalqının başına açdığı zülmün az bir hissəsidir.
Dövlət hakimiyyəti sanki öz vətəndaşına düşmən kəsilərək gecə-gündüz ondan pul tələb edir, nəfəsini kəsir, qanını içir, iliyini sorur.
Oliqarxlardan qazandıqları milyardları geri aldıqları kimi, sadə xalqa süfrələrinin qırıntılarından verdiklərini də geri istəyirlər. Artıq Qarabağda yüz minlərlə insanın qanuni mülkiyyətinə- torpaqlarına, evlərinə əl qoyublar.
Müqavimət olmasa, həmin praktikanı bütün ölkəyə tətbiq edəcəklər, çünki pul lazımdır, pul…
Sadə vətəndaşın boğazından kəsilən o pul isə nəyə lazımdır?! Polis, prokurorluq, məhkəmə və ədliyyə işçilərinin, yəni, hakimiyyətin güc aparatının maaşlarını ikiqat artırmağa. Onlar rejimin dəyənəyidir, onlara bu xalqın boğazından kəsilən, Qarabağ qazisindən, şəhid ailəsindən, diabet xəstəsindən, pensiyaçıdan, ürək qüsurlu uşaqdan, COVİD-19 xəstəsindən çırpışdırılan pullarla yaxşı maaş, pensiya və müavinət vermək lazımdır ki, o dəyənək daha ağır, güclü və inamlı şəkildə xalqın başına endirilsin.