Milli Şuranın Koordinasiya Mərkəzinin üzvü Gültəkin Hacıbəyli
Bir neçə gün öncə Rusiyada bir yol müfəttişi içkili vəziyyətdə (ağırlaşdırıcı haldır) 19 yaşlı soydaşımız Vəkil Abdullayevi öldürüb.
Hadisənin video görüntüləri var idi, yol müfəttişi Aleksandr Qusev həbs olundu və barəsində iki aylıq həbs qətimkan tədbiri seçildi.
Dünən Rusiyanın siyasi rəhbərliyinə yaxın çevrələrdən olunan müdaxilə nəticəsində qatil azad edilib. Niyə?! Niyə Rusiya hakimiyyəti 19 yaşlı azərbaycanlı gəncin qətlinə münasibətdə belə nümayişkarcasına sayğısızlığı özünə rəva bildi?!
Həmin hadisə ilə təxminən eyni vaxtda Tovuz Rayon Polis İdarəsində Yaşar Ramazanov adlı bir vətəndaşımızı işgəncə altında qətlə yetirmişdilər. Daxili İşlər Nazirliyinin Mətbuat Xidməti gülünc açıqlama yayaraq Yaşar Ramazanovun polis idarəsində olarkən qəfil halının pisləşməsi nəticəsində vəfat etdiyini bildirsə də, Azərbaycan polisinin təcrübəsinə bələd olan heç kimi bu nağıla inandırmaq mümkün olmadı. Üstəlik sosial şəbəkələrdə mərhumun özündə dəhşətli işgəncə izlərini əks etdirən fotoşəkilləri paylaşılıb və gerçək bütün çılpaqlığı ilə ortadadır.
Aleksandr Qusev həbs olunanda bir status yazıb Azərbaycan hakimiyyətini qınamaq istədim ki, siz öz vətəndaşlarınıza münasibətdə Putin rejimindən də qəddarsınız, vicdansızsınız.
Ancaq içimdə bir səs dedi ki, yazma, ruslar Azərbaycanda azərbaycanlıların qarışqa qədər dəyəri olmadığını görüb geri addım atarlar… və atdılar da!
Azərbaycan polisi azərbaycanlıları polis idarələrində işgəncə altında öldürürsə, bu hallar kütləvi xarakter alırsa və nə hakimiyyət və cəmiyyət buna etiraz etmirsə, bu dəhşətlə barışırsa, Rusiya dövləti niyə azərbaycanlıları öldürən rus polisini cəzalandırmalıdır ki?!
Ermənistanın dışında (Tərtər hadisələrini nəzərə alsaq bu da mübahisəlidir) dünyanın heç bir dövləti azərbaycanlılara qarşı Azərbaycan hakimiyyəti qədər qəddar və vicdansız davaranmır.