ҚЎҚОНДА МФЙ РАИСИНИ САЙЛАШ ЖАРАЁНИНИ ЁРИТМОҚЧИ БЎЛГАН ЖУРНАЛИСТЛАР ҲАЙДАБ ЧИҚАРИЛДИ

28 май куни Қўқон шаҳридаги 16-Маҳалла фуқаролар йиғинида раисликка номзодларни сайлаш жараёни бўлиб ўтди. Жараённи ёритиш мақсадида ҳудудга ташриф буюрган журналистлар сайлов ҳудудидан чиқариб юборилгани ҳақида Элтузга хабар етиб келди.

Журналистларнинг маълум қилишларича, улар сайлов жараёнини кузатиш, аҳолига ҳолис ахборот етказиш ва жараённинг ошкоралигини таъминлаш мақсадида мактаб ҳудудига борганлар.

Бироқ, айрим фуқаролар, жумладан, собиқ маҳалла раислари Мадаминов Нозим ва Мўйдинов Азиз журналистларнинг фаолиятига тўсқинлик қилганлар. Улар ОАВ вакилларини мактаб ҳудудидан ҳайдаб чиқаргани таъкидланмоқда.

Маълумотларга кўра, мазкур маҳаллада рўйхатдан ўтган сайловчилар сони 264 нафарни ташкил этади. Амалдаги талабларга биноан, сайлов бўлиб ўтган ҳисобланиши учун овоз беришда камида 60 фоиз, яъни 157 нафар сайловчи иштирок этиши шарт. Кузатувчиларнинг айтишича, сайловда атиги 70 нафар фуқаро иштирок этган ва уларнинг 10 нафари бошқа маҳаллаларда истиқомат қилувчи ва номзодга қариндош бўлган шахслар экани ошкор бўлган.

Ҳозирда мазкур ҳолат бўйича маҳаллий давлат органлари томонидан расмий муносабат билдирилмаган.