Хабаровскда ўзбек мигранти урушга жўнатиш уриниши қурбони бўлган

12 декабрь куни Россиянинг Хабаровск шаҳрида содир бўлган ҳодиса юзасидан Элтузга қўшимча маълумотлар етиб келди. Манбаларга кўра, воқеадан сўнг жабрланган йигитнинг бўйнига жиноят илишга уринишлар бўлган.

Айтилишича, бундай ҳолат аввал ҳам кузатилган. Жумладан, жорий йил октябрь ойида 18–20 ёшлар атрофидаги йигитларни тун бўйи уриб-сўкиб, азоблаб, турли босимлар қилиб урушга боришга мажбурлаш ҳолатлари қайд этилган.

Мурожаатчиларнинг билдиришича, ушбу ҳолатларда Ўзбекистоннинг консуллик идоралари томонидан амалий ёрдам сезилмаяпти. Телефон орқали боғланишганда эса “келиб, шахсан мурожаат қилинг” деган жавоблар берилмоқда. 

Бироқ жабрланган шахслар учун 900 километр йўл босиб бориб арз қилиш амалда деярли имконсиз. Кўпчилик “омон чиқдим” деб, шикоят қилмасдан кетишга мажбур бўляпти.

Мурожаатчилар таъкидлашича, бундай ҳолатлар оммавий ахборот воситалари ва блогерлар томонидан кўтарилмаса, ваколатли идоралар томонидан очиқ муҳокамага олинмай қолмоқда. Шу сабабли жамоатчилик эътиборини ушбу муаммога қаратиш муҳимлиги таъкидланмоқда.