Чустда «Big House» қурувчи ширкати мижозларни «ухлатди»

Наманган вилояти Чуст туманида тадбиркор Эркин Юлдашев қурган кўп қаватли уй 3 йилга бормасдан чўка бошлади. «Big house» компанияси кўтарган бино деворларида катта ёриқлар пайдо бўлган, бинодаги 16 та хонадон эгалари бу уйда яшаш хавфли эканини таъкидлашмоқда. 

Эркин Юлдашев, шунингдек, битта уйни 2-3 мижозга шартнома асосида сотиб пулни ўзлаштириб юборгани ҳақида жиддий айбловлар бор.  Алданган мижозларнинг расмий мурожаатларини ички ишлар органи ҳам, прокуратура ҳам инобатга олмаяпти. 

«Биз 2023 йили Чуст туманида Big House фирмасидан квартира сотиб олганмиз. Қурувчи фирма раҳбари Юлдашев Эркин бу уйни яна бошқа мижозларга ҳам сотган экан. Уйни 2025 йил август ойида нотариусда расмийлаштираётган пайтимиз мулкдорлар бир нечта эканини билиб қолдик. Шундан бери прокуратура ва ички ишларга қайта-қайта ариза ёзганмиз. Лекин жиноят иши очилмаяпти» дейди алданган мижоз.  

Ҳуқуқни муҳофаза қилиш органлари нега фирибгарликка кўз юмиб, Big house компанияси ҳақидаги шикоятларга панжа ортидан қараяпти?  Бу лоқайдлик ва ишни пайсалга солишнинг сабаби нима, нархи қанча? Бироқ шикоят аризалари кўриб чиқилмаяпти. Маҳаллий прокуратура уй бозоридаги фирибгар тадбиркорни қачон қонуний жавобгарликка тортади?