close
close
Асосий мавзулар
17 феврал 2020

Мирзиёевнинг Кремлга ташрифи нега кечиктирилди?

close

Ўзбекистон президенти Шавкат Мирзиёевнинг Россияга февраль ойи бошида бўлиши режалаштирилган, анча овоза қилинган давлат ташрифи жорий йил июнь ойининг иккинчи ярмига қолдирилди.

Бу ҳақда Ўзбекистон ташқи ишлар вазирининг биринчи ўринбосари Илҳом Неъматов маълум қилди.

Мазкур ташриф жорий йил февралда бўлиши овозаси тарқаганига бир неча ой бўлган ва расмий доиралар томонидан тасдиқланган эди.

Хусусан, ўтган йил октябрда Ўзбекистонга келган Россия Федерация кенгаши спикери Валентина Матвиенко биринчилардан бўлиб Мирзиёевнинг Москвага ташрифи ҳақида гапирганди.

“Биз Ўзбекистон президентининг келаси йил февралдаги давлат ташрифига жиддий тайёрланяпмиз. Унинг доирасида давлатлараро ва ҳукуматлараро 12 та ҳужжат имзоланиши режалаштириляпти”, деганди ўшанда Матвиенко.

Шундан сўнг бу хабарни Ўзбекистон Олий Мажлиси Сенати раисининг биринчи ўринбосари Содиқ Сафоев, бугун ташрифнинг янги санасини эълон қилаётган Илҳом Неъматовнинг ўзи ҳам тасдиқлаганди.  

Аммо кейинчалик, 2020 йил январда Россия ташқи ишлар вазири Сергей Лавров билан учрашган Мирзиёев ташриф июлга қолдирилганини айтганди.

Февралга келиб эса Россия президенти матбуот котиби Дмитрий Песков: “5 февралда ҳеч қандай ташриф режалаштирилмаган. Шунинг учун ҳеч қандай қолдириш тўғрисида гап бўлиши мумкин эмас. Бу нотўғри ахборот”, деганди.

Шунча расмийлар тасдиқлаган давлат ташрифининг вақт ўтиб рад этилгани, энди дастлабки белгиланган муддатдан қарийб беш ой кечиктирилаётганига сабаб нима?

“Ўзбекистоннинг Евроосиё иқтисодий иттифоқи (ЕОИИ)га қўшилиши масаласида ўзбек жамиятининг фикри иккига бўлиниб қолди, – дейди “Элтуз”нинг масъул идоралардаги манбаларидан бири. – Шу боис президентимиз Олий Мажлисга мурожаатномасида ҳам бу масала халқ фикри асосида ҳал этилишини билдирди. 

Давлат ташрифи доирасида ЕОИИга аъзолик бўйича муҳим келишувлар белгиланганди. Ҳозир ҳукуматда бу масалада якдиллик йўқ ва келишувлар ниҳоясига етмай қолди.

Жиззахда АЭС қуриш лойиҳаси бўйича иккиланишлар кўп. Яна баъзи бир мавзуларда, масалан, меҳнат мигрантлари бўйича ҳали ечими юзасидан якуний қарорга келинмаган масалалар бор.

Менимча, давлат ташрифининг кечиктирилиши шу каби омиллар билан боғлиқ. Бунда халқнинг фикри, кайфияти ҳам ўзига хос роль ўйнаган бўлиши табиий”.

Албатта, аввалдан эълон қилинган ташрифнинг кейинчалик қолдирилишига ҳар икки давлат раҳбарининг иш жадваллари тўғри келмай қолгани ҳам сабаб бўлиши мумкин.

Ҳар ҳолда ҳақиқатан ҳам ўзбек халқи манфаатларини ҳимоя қилиш бўйича  Россия билан қандайдир масалада келишмаганлик оқибатида Мирзиёевнинг Москвага ташрифи қолдирилган бўлса, бундан фақат қувониш керакка ўхшайди.

Eltuz.com

Тағин ўқинг
10 январ 2018
14 январь куни деновликлар ўтган йили Гиннесга кирган мега палов рекордини янгилашмоқчи. Рассом Туз эса рекорд концептини янада улканроқ ...
17 август 2017
Матлуба Азаматова 1965 йил Андижон шаҳрида туғилган. Максим Горький номли Адабиёт институтида таҳсил олган. Британиянинг IWPR институти ва Би ...
26 ноябр 2018
“Элтуз” нашри ўз суриштирув гуруҳи томонидан йиғилган маълумотлар асосида тайёрланган фильмнинг иккинчи қисмини эътиборингизга тақдим қилади. Фильмнинг дастлабки қисмида ...
20 декабр 2017
Ўзбекистондаги ҳуқуқ-тартибот ходимларига даромад ва мол-мулкларини декларациялаш мажбурияти юклатилиши ҳақида қонун лойиҳаси тайëрланмоқда. “Қонун лойиҳасида мансабдор шахслар, шу жумладан, ...
Блоглар
4 март 2020
Миллийлик билан ассоциация уйғотадиган яна бир атрибут — пахта гули туширилган чойнак-пиёла. Бу чойнак-пиёла дизайни ...
2 март 2020
Бугун мен учун ва мен мансуб бўлган миллат учун азиз инсон – Совет Иттифоқининг илк ...
17 феврал 2020
Ўзбекистонда тобора оммавийлик касб этаётган, “президент ташаббуси” билан ташкил этилаётган кластерлар пахтани қўшиб ёзишнинг олдинги ...