“Dövlətlərarası sənədlər kim tərəfindən imzalanmasından asılı olmayaraq, tərəflərin qarşılıqlı öhdəliklərini ehtiva edir. Bu, Ermənistan üçün mühüm mesajdır. Əgər Ermənistanda siyasi hakimiyyət dəyişsə belə, razılaşmanın əsassız şəkildə pozulması hüquqi president yaradar”.
Bu fikirləri Gununsesi.info-ya açıqlamasında Milli Məclisin deputatı Elçin Mirzəbəyli deyib:
“Düşünmürəm ki, Ermənistanda hansısa siyasətçi ABŞ-a qarşı getmək gücündə olsun. Eyni zamanda, beynəlxalq hüququ və mövcud reallıqları nəzərə alaraq, Azərbaycanın əleyhinə əsassız iddia irəli sürmək də onların cəsarətində deyil. Razılaşmanın pozulması halında Ermənistan yalnız Azərbaycanla deyil, Birləşmiş Ştatlarla da münasibətlərinə ciddi zərər vuracaq. Bu isə İrəvan üçün həm siyasi təcrid, həm də iqtisadi çöküş deməkdir”.
Deputatın sözlərinə görə, Vaşinqton razılaşması Ermənistan üçün uzun illər işğalçılıq siyasəti səbəbindən düşdüyü təcriddən çıxaraq tranzit ölkəyə çevrilmək üçün nadir şansdır:
“Zəngəzur dəhlizi regionun geoiqtisadi xəritəsini yenidən formalaşdırmaq gücündədir. Bu dəhliz yalnız yük və sərnişin daşımaları üçün deyil, həm də enerji resurslarının nəqli üçün alternativ yol yaradacaq. Dəhlizin açılması Çindən Avropaya uzanan Orta Dəhlizin mühüm qolu kimi çıxış edəcək.
Nəticədə, bu layihə İrana, Rusiyaya, Gürcüstana, Ermənistana və ən əsası Azərbaycana yeni imkanlar təqdim edir. Orta Dəhliz və Şimal–Cənub dəhlizinin daha intensiv fəaliyyəti yüklərin həcmini artıracaq, iqtisadi əlaqələri genişləndirəcək”.
Elçin Mirəzəbəyli onu da əlavə edib ki, Zəngəzur dəhlizi həm rentabelli, həm də prinsipial baxımdan bölgənin bütün dövlətlərinə Avropaya daha qısa və daha təhlükəsiz çıxış imkanı verəcək.
Şəbnəm Rəhimova
