ဂါဇာ ကမ်းမြှောင်ဒေသမှာ ဟားမားစ်တွေရဲ့ ဒုတိယ စစ်ဦးစီးချုပ်ကို ရှင်းလင်းပစ်နိုင်ခဲ့ကြောင်း သတင်းတွေကို အတည်ပြုနိုင်ဖို့ အစ္စရေး စစ်တပ်က ကြိုးစားနေပါတယ်။
အစ္စရေးရဲ့ လေကြောင်း တိုက်ခိုက်မှု တစ်ခုအတွင်း ဟားမားစ်ရဲ့ လက်နက်ကိုင် ယူနစ်ဖြစ်တဲ့ အစ်ဇ်အယ်လ်ဒင်း အယ်လ်ကာဆမ် တပ်ဖွဲ့ ဒုတိယ ခေါင်းဆောင် မာဝမ် အစ်ဆမ် သေဆုံးသွားကြောင်း သတင်းတွေကို အတည်ပြုဖို့ ကြိုးစားနေတယ်လို့ အစ္စရေး စစ်တပ်နဲ့ ဆက်နွှယ်တဲ့ ရင်းမြစ်တွေက မတ်လ ၁၁ ရက်နေ့မှာ ပြောပါတယ်။
ထောက်လှမ်းရေး သတင်းတွေအရ အစ္စရေး လေတပ်ဟာ ပြီးခဲ့တဲ့ သီတင်းပတ်ကုန်က ဂါဇာ အလယ်ပိုင်း၊ အယ်လ်ညူဆိုင်ရက် စစ်ရှောင်စခန်းထဲက အစ်ဆာ ပုန်းခိုနေတယ်လို့ သဘောပေါက်ထားတဲ့ နေရာကို တိုက်ခိုက်ခဲ့တာ ဖြစ်တယ်လို့ အစ္စရေး စစ်တပ် ရေဒီယိုက ထုတ်ပြန် ဖော်ပြသွားပါတယ်။ အဲဒီ တိုက်ခိုက်မှုအတွင်း အစ်ဆာ အပါအဝင် လူ ၅ ဦး သေဆုံးခဲ့ကြောင်း သတင်းတွေ ထွက်ပေါ်နေပါတယ်။
အစ္စရေး သတင်းဌာန တစ်ခုဖြစ်တဲ့ Haaretzကလည်း အစ်ဆာ အပါအဝင် သေဆုံးမှု အခြေအနေတွေကို အတည်ပြုနိုင်အောင် အစ္စရေး စစ်တပ်က အပူတပြင်း စုံစမ်းနေတယ်လို့ ဖော်ပြသွားပါတယ်။
ဒါပေမဲ့ အစ္စရေး စစ်တပ်ရော၊ ပါလက်စတိုင်း ပြောက်ကျားအဖွဲ့ ဟားမားစ်ကပါ အစ်ဆာ သေဆုံးမှု သတင်းတွေနဲ့ ပတ်သက်ရင် ဘာမှတ်ချက်မှ မပေးသေးဘဲ နှုတ်ဆိတ်နေပါတယ်။
Public Service Announcement
အစ္စရေး စစ်တပ်က ပြီးခဲ့တဲ့ သီတင်းပတ်ကုန်၊ ဂါဇာ အလယ်ပိုင်းမှာ စစ်ဆင်ရေးတစ်ခု လုပ်ဆောင်ခဲ့တာကို အတည်ပြုထားပေမယ့်လည်း အယ်လ်ညူဆိုင်ရက် စစ်ရှောင်စခန်းနဲ့ အစ်ဆာကို ပစ်မှတ်ထားခဲ့တယ် ဆိုတာတွေကိုတော့ ထည့်မပြောခဲ့ပါဘူး။
အစ်ဆာဟာ အစ္စရေးရဲ့ အလိုအရှိဆုံး ရန်သူတော်တွေ စာရင်းထဲမှာ ပါဝင်နေပြီး အောက်တိုဘာ ၇ ရက်နေ့က အစ္စရေး မြို့ရွာတွေကို ဟားမားစ်တွေက ကျူးကျော်ခဲ့တဲ့ အလစ်အငိုက် စီးနင်းမှုတွေမှာ ဟားမားစ်ရဲ့ စစ်ခေါင်းဆောင် မိုဟာမက် ဒီဖ်၊ ဟားမားစ်ရဲ့ ဂါဇာဆိုင်ရာခေါင်းဆောင် ယာဟရာ ဆင်ဝါတို့နဲ့အတူ အဓိက ဦးဆောင်ခဲ့တယ်လို့ သတ်မှတ် ခံထားရပါတယ်။
မွတ်ဆလင် ဥပုသ်ကာလဖြစ်တဲ့ ရာမာဒန် လအတွင်း ဂါဇာမှာ အပစ်အခတ် ရပ်စဲထားနိုင်ရေး နိုင်ငံတကာ ကြားဝင် ညှိနှိုင်းမှုတွေ ရှိနေပေမယ့်လည်း လက်တွေ့ သဘောတူညီမှုတွေ မရသေးဘဲ ဖြစ်နေပါတယ်။ တကယ်လို့ ဟားမားစ်ရဲ့ ထိပ်သီး ခေါင်းဆောင် တစ်ဦးဖြစ်တဲ့ အစ်ဆာသာ အစ္စရေး လက်ချက်နဲ့ သေဆုံးခဲ့တဲ့ သတင်း မှန်ကန်ခဲ့ရင်တော့ အပစ်ရပ် စေ့စပ် ဆွေးနွေးမှုတွေဟာ ပိုမိုရှုပ်ထွေး ခက်ခဲလာမယ့် အဓိပ္ပါယ်လို့လည်း ယူဆနိုင်ပါတယ်။
ကိုးကား: Reuters
