မောင်မင်းမော်၊ ဇူလိုင်-၂၆
နှစ်စဉ်ကျင်းပမြဲ တောင်ပြုံးပွဲတော်သည် သြဂုတ်(၈)ရက်တွင် စတင်တော့မည်ဖြစ်ရာ ပွဲတော်ကာလအတွင်း ဇာတ်၊သဘင်များ ကပြဖျော်ဖြေခွင့်အတွက် တိုင်းအစိုးရအဖွဲ့မှ ခွင့်ပြုမိန့်ချပေးလိုက်ပြီဟု တောင်ပြုံးဘုရား ဂေါပကဥက္ကဌ ဦးကျော်ကျော်က ပြောသည်။
တောင်ပြုံးပွဲသည် နှစ်စဉ်ကျင်းပသည့် ပွဲတော်ဖြစ်သည့်အတွက် ပွဲမိန့်တောင်ခံစရာမလိုဘဲ ဇာတ်သဘင် ကပြခွင့်အမိန့်ကိုသာ တင်ပြတောင်းခံရပြီး ဇူလိုင်(၂၅)ရက်တွင် မန္တလေးတိုင်းဒေသကြီးအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီးမှ တောင်ပြုံးပွဲတော်တွင် ဇတ်၊သဘင်များ ကပြဖျော်ဖြေရန် ခွင့်ပြုမိန့်ပေးလိုက်ခြင်းဖြစ်သည်ဟု ၎င်းက ဆိုသည်။
မန္တလေးမြို့အနီး မတ္တရာမြို့နယ် တောင်ပြုံးရွာတွင်ကျင်းပသည့် တောင်ပြုံးပွဲတော်ကို နှစ်စဉ် ဝါခေါင်လဆန်း (၈)ရက်မှ (၁၅)ရက်အထိ (ယခုနှစ် သြဂုတ် ၈ရက်မှ ၁၅ရက်အတွင်း) ကျင်းပသည်။
လက်ရှိတွင် ရာသီတုပ်ကွေး(H1N1)ရောဂါ ဖြစ်ပွားမူများကြောင့် ရန်ကုန်တိုင်းဒေသကြီးအပါအဝင် မြန်မာနိုင်ငံအတွင်းရှိ တိုင်းဒေသကြီးနှင့် ပြည်နယ်အချို့တွင် လူသေဆုံးမူများ ရှိနေသည်။ သို့သော် မန္တလေးတိုင်းဒေသကြီးအတွင်း အဆိုပါရောဂါကြောင့် သေဆုံးသူ မရှိဘဲ လူ(၄)ဦးတွင်သာ ရောဂါကူးစက်ခံရပြီး စိုးရိမ်စရာမရှိကြောင်း ကျန်းမာရေးနင့် အားကစားဝန်ကြီးဌာနမှ သတင်းထုတ်ပြန်ထားသည်။
ပြီးခဲ့သည့် ၂၀၁၇ကမူ အဆိုပါ ရောဂါကူးစက်ပျံ့နှံ့မည်ကို စိုးရိမ်သည့်အတွက်ဟုဆိုကာ တိုင်းပွဲတော်ကျင်းပကာနီး ရက်ပိုင်းအလိုတွင် တိုင်းအစိုးရအဖွဲ့မှ ပွဲကျင်းပခွင့် ရပ်ဆိုင်းခဲ့ရာ တောင်ပြုံးပွဲတော်တွင် ဈေးရောင်းချရန် ပြင်ဆင်ထားသည့် ဈေးသည်အများအပြား အရင်းအနှီးငွေ ဆုံးရှုံးကာ အထိနာခဲ့ရသည်။
“စိုးရိမ်စရာမရှိပါဘူး။ H1N1 ရောဂါကလည်း ဘာမှမဆိုင်တဲ့ကိစ္စတွေ လျှောက်ပြောနေကြတာပါ။ ဒီပွဲက နှစ်ပေါင်းထောင်ချီပြီးတော့ ဖြစ်နေတဲ့ပွဲပါ။ ဖြစ်ဖို့ပြဿနာအားလုံးကိုလည်း ကျွန်တော်တို့ ဂေါပကအဖွဲ့က ဖြေရှင်းပေးမယ်လို့ တာဝန်ယူပြီးသားပါ”ဟု တောင်ပြုံးဂေါပကဥက္ကဌ ဦးကျော်ကျော်က ပြောသည်။
ယခုနှစ် တောင်ပြုံးပွဲတော်တွင် ဈေးဆိုင်ခန်းနေရာ (၉၀၀)သတ်မှတ်ထားပြီး ဆိုင်ခန်း ငှားရမ်းခများကို ယခင်နှစ်ကနှုန်းအတိုင်း ဈေးမတက်ဘဲ ချထားပေးကြောင်း ဂေါပက တာဝန်ရှီသူများက ပြောသည်။
ထို့အပြင် ပွဲတော်ကာလ ဈေးဆိုင်ခန်းနရာများ၊ ဇာတ်ရုံ၊ သန့်စင်ခန်း၊ လျှပ်စစ်မီး စသည့် သတ်မှတ်ထားသည့် လေလံ(၆)မျိုး ရောင်းချလျှက်ရှိရာ ဇူလိုင်၂၅ရက်အထိ စုစုပေါင်း ကျပ်သိန်း တစ်ထောင်ခန့် ရရှိထားသည်ဟု ဦးကျော်ကျော်က ဆိုသည်။
ယခုနှစ် တောင်ပြုံးပွဲတော်တွင် ပွဲတော်လာ ပြည်သူများအတွက် ရာသီတုပ်ကွေးရောဂါ (H1N1)အကြောင်း အသိပညာပေး လက်ကမ်းစာစောင်များ ဝေငှခြင်း၊ နှာခေါင်းစည်း(Mask)များ ဝေခြင်း၊ Hand Gel (လက်ဆေးပ်ပြာအဆီ)များ ဝေခြင်းနှင့် အဖျားရောဂါရှိသူများကို စောင့်ကြည့်စစ်ဆေး ကုသပေးခြင်းများ လုပ်ဆောင်မည်ဖြစ်ကြောင်း မန္တလေးတိုင်းဒေသကြီး ပြည်သူ့ကျန်းမာရေးဦးစီးဌာနမှ တာဝန်ရှိသူများက ပြောသည်။
တောင်ပြုံးပွဲတော် ကျင်းပနေစဉ်။ ဓါတ်ပုံ – Si Thu Lin.
.