မောင်မင်းမော်၊ ဇူလိုင်-၂၄
မန္တလေးတိုင်းဒေသကြီးအတွင်း သီတင်းသုံးနေထိုင်လျှက်ရှိသည့် နိုင်ငံရေးအကျဉ်းသားဟောင်း ဆရာတော်၊ သံဃာတော်(၄၁)ပါးအား နိုင်ငံရေးအကျဉ်းသားဟောင်းများမှ စုပေါင်း၍ ဝါဆိုသင်္ကန်း ဆက်ကပ်လှူဒါန်းခဲ့သည်။
အဆိုပါ ဝါဆိုသင်္ကန်းဆက်ကပ်လှူဒါန်းပွဲကို ယနေ့(ဇူလိုင်၂၄) နံနက်ပိုင်းက မန္တလေးမြို့ ချမ်းအေးသာစံမြို့နယ် အိမ်တော်ရာဘုရားအနီးရှိ မိုးကောင်းကျောင်းတိုက်တွင် ကျင်းပခဲ့ပြီး ဆရာတော်၊သံဃာတော်(၄၁)ပါးနှင့် မန္တလေးတိုင်းဒေသကြီး ဝန်ကြီးချုပ်အပါအဝင် နိုင်ငံရေးအကျဉ်းသားဟောင်း (၂၀၀)ခန့် တက်ရောက်ခဲ့သည်။
မန္တလေးတိုင်းဒေသကြီးမှ နိုင်ငံရေးအကျဉ်းသားဟောင်းများ၊ နိုင်ငံရေး အကျဉ်းသားဟောင်းများ ပါဝင်ဖွဲ့စည်းထားသည့် 5J-CLUBအဖွဲ့နှင့် အမျိုးသားဒီမိုကရေစီအဖွဲ့ချုပ်ပါတီ အဖွဲ့ဝင်များ ပူးပေါင်းကာ အဆိုပါ ဝါဆိုသင်္ကန်းကပ်ပွဲကို ကျင်းပခြင်းဖြစ်ကြောင်း ပွဲဖြစ်မြောက်ရေး ဝေရာဝစ္စတာဝန်ယူထားသည့် နိုင်ငံရေးအကျဉ်းသားဟောင်း ဦးတင်ကိုဦးက ပြောသည်။
“နိုင်ငံရေး အကျဉ်းသားဟောင်းတွေ စုစည်းမယ်ဆိုတဲ့ ရည်ရွယ်ချက်နဲ့ ဒါကို ကျင်းပတာ ဖြစ်ပါတယ်”ဟု ၎င်းက ဆိုသည်။
မန္တလေးတိုင်းဒေသကြီးအတွင်း ထောင်ဒဏ်ချမှတ် ခံခဲ့ရဖူးသည့် နိုင်ငံရေးအကျဉ်းသားဟောင်း ဆရာတော်၊သံဃာတော် (၄၆)ပါး ရှိကြောင်း စာရင်းရရှိထားသော်လည်း ကျန်းမာရေးနှင့် သွားလာရေး အခက်အခဲများကြောင့် ဝါဆိုသင်္ကန်းကပ်လှူပွဲသို့ သံဃာတော်(၄၁)ပါးသာ တက်ရောက်နိုင်ခဲ့သည်ဟု ဦးတင်ကိုဦးက ပြောသည်။
နိုင်ငံရေးအကျဉ်းသားဟောင်း ဆရာတော်သံဃာတော်များအနေဖြင့် နှစ်ပေါင်းများစွာ ဒုက္ခခံစားခဲ့ရပြီး တိုင်းပြည်အတွက် ပေးဆပ်ခဲ့ရမှုအတွက် ယခုကဲ့သို့ အသိအမှတ်ပြုမှုအပေါ် စိတ်သက်သာရာ ရသည်ဟု အဆိုပါပွဲသို့ ကြွရောက်ခဲ့သည့် နိုင်ငံရေးအကျဉ်းသားဟောင်း ဆရာတော် မန္တလေးမြို့ တောင်ခွင်မင်းကြီးကျောင်းတိုက်မှ ဦးကေလာသက မိန့်သည်။
ထို့အပြင် နိုင်ငံရေး အကျဉ်သားဟောင်းများကို တစုတဝေးတည်း တွေ့ဆုံရသည့်အတွက်လည်း စည်းလုံးညီညွတ်မှု၊ အပြန်အလှန် နားလည်မှုများဖြင့် နိုင်ငံအတွက် ကောင်းသည့်ရလဒ်များ ထွက်ပေါ်လာစေရန် တိုင်ပင်ညှိနိုင်းမှုများလည်း ပေါ်ပေါက်လာသည်ဟု ဦးကေလာသက မိန့်သည်။
“အသက်ပြန်ငယ်သွားသလို ခံစားရတယ်၊ စိတ်ဒဏ်ရာတွေ အများကြီး သက်သာရာရတယ်၊ မိသားစုအတွေအပေါ်မှာ ခံစားခဲ့ရတဲ့ ဒုက္ခတွေကို အခုလိုမျိုးပွဲတွေ များများကြုံတဲ့အခါကြတော့ စိတ်ချမ်းသာမှုတွေရတယ်၊ ညီညွတ်မှုတွေရတယ်”ဟု ဆရာတော် ဦးကေလာသက မိန့်သည်။
နိုင်ငံရေးအကျဉ်းသားဟောင်းများ စုပေါင်း၍ ယခုကဲ့သို့ ဝါဆိုသင်္ကန်း ဆက်ကပ်လှူဒါန်းပွဲ ပြုလုပ်သည့်အတွက် ထောင်တွင်း၌ အတူနေခဲ့ရသည့် ရဲဘော်ရဲဘက်များနှင့်လည်း ပြန်လည်တွေ့ဆုံရပြီး အချင်းချင်း စည်းလုံးညီညွတ်မှု ရစေသည်ဟု မန္တလေးမြို့ခံ နိုင်ငံရေးအကျဉ်းသားဟောင်း ဒေါ်စိုးစိုးခိုင်က ပြောသည်။
နိုင်ငံရေးအကျဉ်းသားဟောင်း ဆရာတော်၊ သံဃာတော်များအား ဝါဆိုသင်္ကန်း ဆက်ကပ်လှူဒါန်းခြင်းကို မန္တလေးတိုင်းတွင် ဒုတိယအကြိမ်မြောက် ကျင်းပခြင်းဖြစ်သည်။ ယခုကဲ့သို့ ဝါဆိုသင်္ကန်း ဆက်ကပ်လှူဒါန်းပွဲများကို ရန်ကုန်တိုင်းတွင် (၃)ကြိမ် ပြုလုပ်ခဲ့ပြီးဖြစ်ကာ စစ်ကိုင်းတိုင်းတွင်လည်း ကျင်းပရန် ရည်ရွယ်ထားသည်ဟု ပွဲဖြစ်မြောက်ရေး ဝေရာဝစ္စတာဝန်ယူထားသည့် နိုင်ငံရေးအကျဉ်းသားဟောင်း ဦးတင်ကိုဦးက ပြောသည်။
ဝါဆိုသင်္ကန်းဆက်ကပ်လှူဒါန်းပွဲ ကျင်းပနေစဉ်။ ဓါတ်ပုံ – Tun Min Oo FB.