ပုဂ္ဂလိက စီးပွားရေးလုပ်ငန်းများ၏ လိုအပ်ချက်ကို တင်ပြသည့် Business Agenda 2022 စာအုပ်ငယ်ကို MRCCI မှ ပထမဆုံးအကြိမ် ရေးဆွဲ၍ တိုင်းအစိုးရထံ ပေးအပ်
ကိုနေကို၊ ဇူလိုင်-၂၅
မြေနေရာ ငှားရမ်းခများ လျော့နည်းကျဆင်းစေရေး လုပ်ဆောင်ပေးရန်အပါအဝင် မန္တလေးတိုင်းအတွင်းရှိ ပုဂ္ဂလိက စီးပွားရေးလုပ်ငန်းများ ပိုမိုဖွံဖြိုးတိုးတက်ရန်အတွက် အစိုးရအဖွဲ့မှ အချက်(၂၂)ချက် လုပ်ဆောင်ပေးရန် လိုအပ်မည်ဖြစ်ကြောင်း မန္တလေးတိုင်းဒေသကြီး ကုန်သည်နှင့် စက်မူလုပ်ငန်းရှင်များအသင်း (MRCCI) မှ ပထမဆုံးအကြိမ် ရေးဆွဲထုတ်ဝေသည့် Business Agenda 2022 စာအုပ်ငယ်တွင် ဖော်ပြထားသည်။
Business Agenda (စီးပွားရေးအစီအစဉ်) ဆိုသည်မှာ စီးပွားရေး မူဝါဒဆိုင်ရာ စာတမ်းတစ်စောင်ဖြစ်ပြီး အစိုးရနှင့် ပုဂ္ဂလိက ပိုမိုပူးပေါင်း ဆောင်ရွက်နိုင်ရေး ပုဂ္ဂလိက ကဏ္ဍ လိုအပ်ချက်များကို အစိုးရဌာနများ၊ မူဝါဒရေးဆွဲသူများထံ တင်ပြသည့် အစီအစဉ် ဖြစ်ကြောင်း MRCCI အတွင်းရေးမှုး ဦးဥက္ကာကျော်က ရှင်းပြသည်။
ယင်းစာအုပ်ငယ်တွင် မန္တလေးတိုင်းအတွင်းရှိ စီးပွားရေးလုပ်ငန်းများ၏ မြေပြင်တွင် ဖြစ်ပေါ်နေသော ကိစ္စရပ်များကို အခြေခံ၍ ပုဂ္ဂလိက လုပ်ငန်းများ ပိုမိုတိုးတက် ကောင်းမွန်ရေး ၂၀၁၉မှ ၂၀၂၂အထိ (၄)နှစ်တာအတွင်း လုပ်ဆောင်ရန်လိုအပ်သော ကဏ္ဍ(၈)ခုနှင့် ယင်းကဏ္ဍများအောက်မှ လုပ်ဆောင်သင့်သည့် အစီအစဉ်(၂၂)ချက်ကို ဖော်ပြထားသည်။
“ဒီ စီးပွားရေး အစီအစဉ်မှာ ပါတာတွေက လုပ်ငန်းရှင်တွေအတွက် လမ်းပြမြေပုံဖြစ်သလို၊ လုပ်ငန်းရှင်များအတွက် များစွာအရေးပါတဲ့ မူဝါဒပိုင်းဆိုင်ရာ အခြေအနေများဖြစ်တယ်” ဟု ၎င်းက ဆိုသည်။
ပုဂ္ဂလိက စီးပွားရေးလုပ်ငန်းများ ဖွံ့ဖြိုးတိုးတက်ရေးအတွက် မြေနေရာ ငှားရမ်းခများ လျှော့နည်းကျဆင်းစေရေး လုပ်ဆောင်ပေးရန်၊ မြေဈေးကစားသူများ လက်ဝယ်တွင်ရှိနေသည့် မြေကွက်လပ်များကို စီးပွားရေးလုပ်ငန်းများတွင် အသုံးပြုစေရေး အစိုးရမှ ကြပ်မတ်လုပ်ဆောင်ပေးရန်နှင့် မြေပိုင်ဆိုင်မူ လွယ်ကူအောင် လုပ်ဆောင်ပေးရန် စသည့်အချက်များကို ပထမဦးစားပေးအနေဖြင့် ဖော်ပြထားထားသည်။
၂၀၁၄နောက်ပိုင်း မန္တလေးအိမ်ခြံမြေဈေးကွက် ပျက်နေသော်လည်း မြေဈေးနှင့် မြေငှားရမ်းခများ ကြီးမြင့်နေဆဲဖြစ်ရာ ဒေသတွင်း စီးပွားရေးလုပ်ငန်းများအတွက် ဝန်ထမ်းဝန်ပိုးအဖြစ် ရှိနေဆဲဟု ဆိုသည်။ မန္တလေးတိုင်းဒေသကြီးအတွင်း မြေဧရိယာစုစုပေါင်း၏ (၃၃)ရာခိုင်နှုန်းကျော်သည် အသုံးပြုခြင်းမရှိသည့် ပလပ်မြေ၊ တောရိုင်းမြေနှင့် မစိုက်ပျိုးနိုင်သော မြေယာများဖြစ်ရာ အဆိုပါမြေယာများထဲမှ အချို့အဝက်ကို အသေးစား၊ အလတ်စား စီးပွားရေးဇုန်များ ဖော်ထုတ်ပေးမည်ဆိုလျှင် ဒေသတွင်း စီးပွားရေးလုပ်ငန်းများအတွက် များစွာအထောက်အကူ ဖြစ်စေနိုင်သည်ဟု ဆိုသည်။
“တိုင်းအစိုးရအနေဖြင့် အသေးစား၊ အလတ်စား စီးပွားရေးဇုန်များကို တိကျသော စည်းမျဉ်း၊ စည်းကမ်းများ သတ်မှတ် ဖော်ထုတ်ပေးရန်နှင့် အဆိုပါ ဇုန်များအတွင်း မြေ သို့မဟုတ် အဆောက်အဦ ပိုင်ဆိုင်မှုအတွက် သင့်လျော်သည့် နှုန်းထားဖြင့် (၁၀) နှစ်အထိ အရစ်ကျစနစ်ဖြင့် ပေးဆောင်စေရမည်”ဟု Business Agenda 2022 တွင် ဖော်ပြထားသည်။
ထို့အပြင် အခြားကဏ္ဍ(၇)ခုဖြစ်သည့် ချေးငွေရယူရန် အဟန့်အတားဖြစ်စေသည့် အရာများကို ဖြေရှင်းခြင်း၊ အသေးစား အလတ်စား လုပ်ငန်းများ ဖွံ့ဖြိုးမှုကို မြှင့်တင်ခြင်း၊ အရည်အသွေးနှင့် စွန့်ဦးတီထွင် စိတ်ဓါက်ကို မြှင့်တင်ခြင်း၊ အုပ်ချုပ်ရေးစနစ်ကို ပိုမို အားကောင်းစေခြင်း ၊ နည်းပညာ ကွာဟမှုကို လျော့ချခြင်း၊ သင့်တင့်သော မျှတသော အကောက်အခွန် နှင့် ပြည်ပခရီးသည်များ ပိုမို ဝင်ရောက်လာစေရေး စသည်တို့ကိုလည်း အလေးထားလုပ်ဆောင်သင့်ကြောင်း အကြံပြုထားသည်။
ချေးငွေကဏ္ဍတွင် မြေယာများသာမဟုတ်ဘဲ ရွှေ့ပြောင်းနိုင်သော ပစ္စည်းများကို အပေါင်အဖြစ် လက်ခံပေးရန်၊ လုပ်ငန်းအပေါ် အကဲဖြတ်၍ ချေးငွေပေးရန်၊ အတိုးနှုန်းလျှော့ချပေးရန် စသည်အချက်များ တင်ပြထားသည်။ အသေးစားအလတ်စား လုပ်ငန်းများကို ဥပဒေအရ ပိုမိုပကာကွယ်ပေးရန်နှင့် နည်းပညာနှင့် အရင်းအနှီး ပိုမိုရရှိနိုင်ရေး စီစဉ်ဆောင်ရွက်ပေးရန် လိုမည်ဟု ဆိုသည်။
ထို့အပြင် စွန့်ဦးတီထွင်လုပ်ငန်းရှင်များ ပိုမိုမွေးထုတ်ပေးနိုင်ရေးနှင့် အစိုးရ၏ အုပ်ချုပ်ရေးစနစ်အတွက် ရာထူးတာဝန်များ ခန့်ထားရာတွင် ပညာအရည်အချင်းတစ်ခုတည်းမကြည့်ဘဲ သက်ဆိုင်ရာနယ်ပယ်အလိုက် အတွေ့အကြုံ၊ စွမ်းဆောင်ရည် ပြည့်မီသူများကို ခန့်အပ်ရန် လိုအပ်မည်ဟုလည်း အကြံပြုထားသည်။
Business Agenda 2022 (စီးပွားရေးအစီအစဉ်) စာအုပ်ငယ်ကို ILO ၏ ပံ့ပိုးမှုဖြင့် MRCCI အမှုဆောင်အဖွဲ့ဝင်များ စုပေါင်း၍ ၂၀၁၈ တွင် စတင်ရေးဆွဲခဲ့ခြင်းဖြစ်ပြီး ဇူလိုင်(၂၁)ရက်တွင် တိုင်းအစိုးရထံ အခမ်းအနားဖြင့် ပေးအပ်ခဲ့သည်။
MRCCI မှ ရေးဆွဲခဲ့သည့် Businesss Agenda 2022 ကို တိုင်းအစိုးရထံ ပေးအပ်စဉ်။ ဓါတ်ပုံ – နေကို။