ဘက်မလိုက်သည့် တရားစီရင်ရေး ဖြစ်စေလိုကြောင်း သမ္မတ ပြောကြား
ကိုနေကို၊ သြဂုတ် ၂၊
တရားရင်ဆိုင်နေရသည့် အချုပ်သားများကို တရားခွင်သို့ ပို့ဆောင်ရာတွင် အချုပ်ကားတစ်မျိုးတည်း အသုံးပြုခြင်းမရှိဘဲ အဆင့်အတန်းခွဲခြား၍ တသီးတခြား ပို့ဆောင်ပေးမှုများ ရှိနေသည်မှာ ဘက်လိုက်ခြင်း၊ မျက်နှာလိုက်ခြင်းဖြစ်ကြောင်း နိုင်ငံတော် သမ္မတ ဦးဝင်းမြင့်က ဝေဖန်သည်။
“တစ်ချိန်က ဘာကြီးပဲဖြစ်ပါစေ၊ တရားခွင်ထဲ ရောက်လာရင် အမှုသည်က အမှုသည်၊ တရားခံက တရားခံပဲ။ တချို့က မဟုတ်ပါဘူး။ တွေ့နေရပါတယ်။ မရှိတဲ့ သူကျတော့ မရှိသလို အချုပ်ကားထဲ ပြွတ်သိပ် ကျပ်ညပ်၊ အထည်ကြီးပျက်တွေကျတော့ ကိုယ့်ကားလေးနဲ့ကိုယ်၊ ဒါမှမဟုတ်ရင်လည်း အရာရှိကားလေးနဲ့ ပို့ပေးတယ်။ ဒါဟာ လူမြင်၊ သူမြင်လို့ မကောင်းဘူး။ အဲဒါက တရားဥပဒေ စိုးမိုးရေး မဟုတ်ဘူး။ ဒါကိုက မျက်နှာကြီးငယ် လိုက်တာ။ အဲဒါမျိုးတော့ မဖြစ်ဘူး” သမ္မတဦးဝင်မြင့်က ပြောသည်။
ယနေ့ (သြဂုတ်၂ရက်) နံနက်ပိုင်းက မန္တလေးမြို့ ကွန်ဗင်ရှင်းစင်တာ(MCC)တွင် ကျင်းပခဲ့သော နိုင်ငံတော်သမ္မတနှင့် မန္တလေးတိုုင်းဒေသကြီး အတွင်းရှိ အုပ်ချုပ်ရေး၊ တရားစီရင်ရေး၊ ဥပဒေပြုရေးဆိုင်ရာ ပုဂ္ဂိုလ်များ၊ ဌာနဆိုင်ရာ ဝန်ထမ်းများ တွေ့ဆုံပွဲတွင် သမ္မတဦးဝင်းမြင့်က အထက်ပါအတိုင်း ပြောကြားသည်။
တရားစီရင်ရေး မဏ္ဍိုင်ကို ဘက်မလိုက်သည့် တရားစီရင်မူ ဖြစ်စေလိုပြီး နိုင်ငံသူ၊နိုင်ငံသား အားလုံးအပေါ် ဥပဒေနှင့်အညီ တန်းတူ၊ညီတူ ဆက်ဆံစေလိုသည်ဟုလည်း သမ္မတက ဆိုသည်။
“ဘက်မလိုက်တဲ့ တရားစီရင်ရေးမှာ အခြေခံမူက သုံးချက်ပါ။ နိုင်ငံသူ၊ နိုင်ငံသားတိုင်း အားလုံး ဥပဒေနဲ့ အညီပဲ ဖြစ်ရမယ်။ ရာထူး၊ ဌာန မခွဲခြားဘူး။ ဆူကြုံ၊ နိမ့်မြင့် မခွဲခြားဘူး။ ငွေကြေး၊ ဓနဥစ္စာ၊ ဆင်းရဲချမ်းသာ မခွဲခြားဘူး။ တရားခွင်ထဲ ရောက်လာရင် ဥပဒေရှေ့မှောက်မှာ အားလုံး အညီအမျှပဲ ဖြစ်ရမယ်။ ဒီသုံးခုကို သေသေချာချာ လိုက်နာမယ်ဆိုရင် တရားဥပဒေ စိုးမိုးရေး မအောင်မြင်စရာ မရှိဘူး” ဟု သမ္မတဦးဝင်းမြင့်က ပြောသည်။
တရားစီရင်ရေးမဏ္ဍိုင် အနေဖြင့် အုပ်ချုပ်ရေးမဏ္ဍိုင်နှင့် ဥပဒေပြုရေးမဏ္ဍိုင်တို့၏ လွှမ်းမိုးမူမခံဘဲ ဥပဒေပြဌာန်းများအတိုင်းသာ တရားစီရင်ရမည်ဖြစ်ကြောင်း သမ္မတက ပြောသည်။
“တရားစီရင်ရေး မဏ္ဍိုင်ကို ဘက်မလိုက်တဲ့ တရားစီရင်ရေး ဖြစ်စေချင်တယ်။ အုပ်ချုပ်ရေး မဏ္ဍိုင်က ဝင်စွက်ဖက် စွက်ဖက်၊ ဥပဒေပြုရေး မဏ္ဍိုင်က ဝင်စွက်ဖက် စွက်ဖက်၊ တရားဥပဒေလမ်းကြောင်းအတိုင်း လုပ်ပေးပါ။ မှန်မှန်ကန်ကန်လုပ်ပေးပါ” ဟု သမ္မတက ပြောသည်။
တရားစီရင်ရေးနှင့် ပတ်သက်လျင် ပြည်ထောင်စု တရားစီရင်ရေး ဥပဒေ၊ တည်ဆဲဥပဒေ၊ ပြစ်မှုဆိုင်ရာ ဥပဒေ၊ ပြစ်မှု ကျင့်ထုံး ဥပဒေ၊ သက်သေခံ ဥပဒေ၊ မြန်မာ့ကျင့်ထုံး ဥပဒေ အစရှိသော ဥပဒေများ ရှိပြီးဖြစ်သလို ယင်းဥပဒေများနှင့်အညီ ဖြစ်စေလိုကြောင်း သမ္မတက ဆက်လက်ပြောကြားသည်။
“ဥပဒေက မမှန်ဘူး။ ဥပဒေက မှားနေတယ် ဆိုရင် ဥပဒေ ကို ရအောင် ပြင်ပါ။ ဒါက တရား ဥပဒေစိုးမိုးရေးပါ။ ကျွန်တော်တို့ ကိုယ်တိုင် ကြိုက်ခြင်း၊ မကြိုက်ခြင်းကို ဘေးဖယ်ထား။ လက်ရှိတော့ တည်ဆဲဥပဒေအတိုင်း လုပ်ရမှာပါ။ ပြောချင်တာက ဘက်မလိုက်တဲ့ တရားစီရင်ရေး ဖြစ်စေချင်တယ်” ဟု ၎င်းက ပြောသည်။
နိုင်ငံတော်သမ္မတ ဦးဝင်းမြင့်သည် သမ္မတ သက်တမ်း(၁၆)လအတွင်း ပထမဆုံးအကြိမ်အဖြစ် မန္တလေးမြို့သို့ လာရောက်ခဲ့ပြီး မဏ္ဍိုင်သုံးရပ်တွေ့ဆုံပွဲသို့ တက်ရောက်ခဲ့ခြင်းဖြစ်သည်။
သမ္မတ ဦးဝင်းမြင့်သည် မန္တလေးသို့ မလာရောက်မီ အခြားတိုင်းဒေသကြီးနှင့် ပြည်နယ် (၁၁)ခုသို့ သွားရောက်ခဲ့ကာ ယခုကဲ့သို့ မဏ္ဍိုင်သုံးရပ်တွေ့ဆုံပွဲများ တက်ရောက်ခဲ့ပြီးဖြစ်သည်။ အဆိုပါ တွေ့ဆုံပွဲများတွင် အုပ်ချုပ်ရေး၊ ဥပဒေပြုရေးနှင့် တရားစီရင်ရေးဆိုင်ရာ တာဝန်ရှိသူများအပေါ် သမ္မတက ပြင်းပြင်းထန်ထန် ဝေဖန်ပြောကြားလေ့ရှိသည်။
မန္တလေးတွင် ကျင်းပသည့် နိုင်ငံတော်သမ္မတနှင့် မဏ္ဍိုင်သုံးရပ်တွေ့ဆုံပွဲတွင်မူ သတင်းမီဒီယာများအား သတင်းရယူခွင့်မပြုခဲ့ပေ။
အဆိုပါတွေ့ဆုံပွဲသို့ ပြည်ထောင်စုအစိုးရအဖွဲ့ဝင်များ၊ ဥပဒေပြုရေး၊ အုပ်ချုပ်ရေးနှင့် တရားရေးဆိုင်ရာ တာဝန်ရှိသူများ၊ အဂတိလိုက်စားမူ တိုက်ဖျက်ရေးကော်မရှင်၊ တိုင်းစစ်ဌာနချုပ် တာဝန်ရှိသူများ၊ မန္တလေးမြို့တော်စည်ပင် တာဝန်ရှိသူများ အပါအဝင် ဌာနဆိုင်ရာ တာဝန်ရှိသူ (၇၀၀)ကျော် တက်ရောက်ခဲ့သည်။
မန္တလေးတွင် ကျင်းပခဲ့သည့် နိုင်ငံတော်သမ္မတနှင့် ဌာနဆိုင်ရာ တာဝန်ရှိသူများ တွေ့ဆုံပွဲ။ ဓါတ်ပုံ – Mandalay In-depth News။