နေကို၊ ဇူလိုင်-၁၈
အဂတိလိုက်စားမှုဖြင့် တရားစွဲဆိုခံထားရသည့် မန္တလေးမြို့ ချမ်းအေးသာစံမြို့နယ် ရဲတပ်ဖွဲ့မှူး ရဲမှူးသိန်းနိုင်နှင့် ဒုရဲအုပ် ထွန်းထွန်းလင်းတို့ကို မန္တလေးတိုင်းဒေသကြီး တရားလွှတ်တော်တွင် ယနေ့(ဇူလိုင်၁၈)တွင် သုံးကြိမ်မြောက် ရုံးထုတ်စစ်ဆေးခဲ့သည်။
အဆိုပါ အမူနှင့်ပတ်သက်၍ တရားလိုပြသက်သေ (၉)ဦးတင်သွင်းထားပြီး ယနေ့ရုံးချိန်းတွင် အဓိကတရားလိုဖြစ်သည့် မြန်မာနိုင်ငံ အဂတိလိုက်စားမှု တိုက်ဖျက်ရေးကော်မရှင် စစ်ဆေးရေးမှူး ဦးအောင်မြင့်ဇော်ကို စစ်ဆေးခဲ့သည်ဟု စွပ်စွဲခံရသူ ရဲတပ်ဖွဲဝင်များဘက်မှ လိုက်ပါဆောင်ရွက်နေသည့် တရားလွှတ်တော်ရှေ့နေ ဦးမြင့်ဌေးက ပြောသည်။
“အမှုအကြောင်းတော့ ပြောလို့မရသေးဘူး။ ဒီနေ့ စစ်တာက မပြီးသေးဘူး။ နောက်ရုံချိန်းမှာလည်း တရားလို ဦးအောင်မြင့်ဇော်ကို ဆက်လက်စစ်ဆေးမှာပါ” ဟု ၎င်းက ပြောသည်။
မန္တလေးမြို့ ချမ်းအေးသာစံမြို့နယ် အမှတ်(၃)နယ်မြေရဲစခန်းမှ မြို့နယ်ရဲတပ်ဖွဲ့မှူး ရဲမှူးသိန်းနိုင်၊ ရဲအုပ်ကျော်သူနှင့် ဒု-ရဲအုပ်ထွန်းထွန်းလင်းတို့သည် ရာထူးတာဝန်ကို အလွဲသုံးစားပြုကာ အဂတိလိုက်စားခဲ့ပြီး ၂၀၁၈အတွင်းက အဆိုပါ ရဲစခန်းတွင် အမူဖွင့်ဖမ်းဆီးခံရသူတစ်ဦး၏ ဖခင်ထံမှ အမူသက်သာစေရေး ငွေကြေးတောင်းခံခဲ့သည်ဟု စွပ်စွဲခံထားရသည်။
၎င်းတို့(၃)ဦးကို အဂတိလိုက်စားမူ တိုက်ဖျက်ရေးဥပဒေ ပုဒ်မ(၅၆)ဖြင့် အရေးယူပေးရန် မြန်မာနိုင်ငံ အဂတိလိုက်စားမှု တိုက်ဖျက်ရေးကော်မရှင် စစ်ဆေးရေးမှူး ဦးအောင်မြင့်ဇော်မှ ဇွန်(၁၄)ရက်တွင် ချမ်းအေးသာစံမြို့နယ်၊ အမှတ်(၃)ရဲစခန်းတွင် ဇွန်(၁၄)ရက်၌ အမူဖွင့်ခဲ့သည်။
ထို့နောက် ဇူလိုင်(၅)ရက်တွင် တိုင်းတရားလွှတ်တော်၌ ပထမအကြိမ် ရုံးတင်စစ်ဆေးခဲ့ကာ ယင်းအမူအား ဇူလိုင်(၂၅)ရက်တွင် ထပ်မံရုံးချိန်းစစ်ဆေးမည်ဖြစ်သည်။
၎င်းအမှုတွဲတွင် ပါဝင်သည့် ရဲအုပ်ကျော်သူမှာ အဂတိလိုက်စားမူ အခြားအမူတစ်မူဖြင့်လည်း အမူဖွင့်ခံထားရပြီး လက်ရှိတွင် ၎င်းမှာ ထွက်ပြေးတိမ်းရှောင်နေသည်။
မန္တလေးတိုင်းဒေသကြီး၊ ချမ်းအေးသာစံမြို့နယ်၊ အမှတ်(၃)နယ်မြေရဲခန်မှ ရဲမှူးသိန်းနိုင် (အဂတိလိုက်စားမူဖြင့် အမူဖွင့်ခံရချိန်တွင် ဒုတိယခရိုင် ရဲတပ်ဖွဲ့မှူး ဥတ္တရခရိုင် ရဲတပ်ဖွဲ့မှူးရုံး)၊ ရဲအုပ် ကျော်သူ (ကမ္ဘာလှည့် ခရီးသွား လုံခြုံရေးရဲတပ်ဖွဲ့)နှင့် ဒုတိယရဲအုပ် ထွန်းထွန်းလင်းတို့သည် ရာထူးတာဝန်ကို အလွဲသုံးစားပြု၍ အဂတိလိုက်စားမူ ကျူးလွန်ခဲ့ပြီး အမူကိစ္စအဆင်ပြေစေရန်၊ အမူသက်သာစေရန်၊ မညှဉ်းပန်းမနှိပ်စက်ခံရစေရန်၊ အိုးဘိုထောင်မပို့စေရန်နှင့် ဖမ်းဆီးထားသောဆိုင်ကယ် ပြန်လည်ရရှိစေရန်အတွက်ဟုဆိုကာ စုစုပေါင်း ငွေကျပ်(၁၀)သိန်းကို အဆိုပါရဲစခန်းတွင် အမူဖွင့်ဖမ်းဆီးခံရသူတစ်ဦး၏ ဖခင်ထံမှ လက်ခံရယူခဲ့ကြောင်း စစ်ဆေးပေါ်ပေါက်ခဲ့သည်ဟု မြန်မာနိုင်ငံ အဂတိလိုက်စားမူ တိုက်ဖျက်ရေးကော်မရှင်မှ သတင်းထုတ်ပြန်ထားသည်။
ထို့အပြင် ရဲအုပ်ကျော်သူနှင့် ဒုရဲအုပ် ကျော်နိုင်ဦးတို့သည်လည်း ရာထူးတာဝန်ကို အလွဲသုံးစားပြု၍ အဂတိလိုက်စားခဲ့ပြီး အဆိုပါရဲစခန်းတွင် ပုဒ်မ ၄၂၀(ခိုးမူ)နှင့် ဆက်သွယ်ရေးဥပဒေ ပုဒ်မ ၆၆(ဃ)ဖြင့် အမူဖွင့်ခံရသူတစ်ဦးထံမှ ရဲစခန်းအားမခံ ရရှိစေရန်နှင့် အမူအာမခံရရှိစေရန်အတွက် ငွေကျပ်(၂၆)သိန်းကျော် လက်ခံရယူခဲ့သလို အမူပိတ်သိမ်းနိုင်ရန်အတွက် ငွေကျပ်သိန်း(၁၀၀) တောင်းခံရယူရန် အားထုတ်ခဲ့ကြောင်း စစ်ဆေးပေါ်ပေါက်သဖြင့် အဂတိလိုက်စားမူ တိုက်ဖျက်ရေးဥပဒေ ပုဒ်မ ၅၆ဖြင့် အရေးယူရန် ချမ်းအေးသာစံမြို့နယ် အမှတ်(၃)ရဲစခန်းတွင် အမူဖွင့်ခဲ့သည်ဟု အဂတိလိုက်စားမှု တိုက်ဖျက်ရေး ကော်မရှင်မှ သတင်းထုတ်ပြန်ထားသည်။
သို့သော် ရဲအုပ်ကျော်သူနှင့် ဒုရဲအုပ် ကျော်နိုင်ဦးတို့ နှစ်ဦးလုံးမှာ လက်ရှိအချိန်အထိ ထွက်ပြေးတိမ်ရှောင်နေဆဲဖြစ်သည်။
အဂတိလိုက်စားမူဖြင့် တရားစွဲခံထားရသူ နှစ်ဦးကို ရုံးထုတ်စစ်ဆေးစဉ်။ ဓါတ်ပုံ – နေကို။