မောင်မင်းမော်၊ ဇူလိုင်-၁၈
မန္တလေးခရိုင် ပုသိမ်ကြီးမြို့နယ် အောင်သပြေကျေးရွာမှ ဒေသခံ ကိုကျော်ဇေယျကို တရားမဝင် လူစုလူဝေးပြုလုပ်မူအတွက် ငြိမ်းစုစီ ဥပဒေ ပုဒ်မ(၁၉)အရ ထောင်ဒဏ် (၃)လ ပြစ်ဒဏ်ကျခံစေရန် ပုသိမ်ကြီးမြို့နယ် တရားရုံးမှ ဇူလိုင်(၁၈)ရက်တွင် အမိန့်ချမှတ်ခဲ့သည်။
“အမြင့်ဆုံးပြစ်ဒဏ် ချမှတ်လိုက်တာပါ”ဟု တရားခံဘက်မှ လိုက်ပါဆောင်ရွက်ခဲ့သည့် တရားလွှတ်တော်ရှေ့နေ ဒေါ်မြင့်သူဇာသိန်းက ပြောသည်။
ကိုကျော်ဇေယျကို ငြိမ်းစုစီဥပဒေ ပုဒ်မ(၁၉)ဖြင့် အမူဖွင့်ထားသည်မှာ တစ်နှစ်ခန့်ကြာပြီဖြစ်ကာ ဇူလိုင်(၁၄)ရက်တွင် ရဲဖမ်းဆီးခံရပြီး ဇူလိုင်(၁၈)ရက်တွင် ထောင်ဒဏ်ချမှတ်ခံရခြင်းဖြစ်သည်။
၎င်းသည် အယ်လ်ဖာဘိလပ်မြေစက်ရုံစီမံကိန်း ကန့်ကွက်ဆန္ဒပြမူများနှင့် ဆက်စပ်၍ မီးရှို့ဖျက်ဆီးမူ၊ တာဝန်ဝတ္တရားနှောက်ယှက်မူ စသည့် အခြားပုဒ်မ (၇)ခုခန့်ဖြင့်လည်း တရားစွဲဆိုခံထားရပြီး ဆက်လက်ရင်ဆိုင်ရဦးမည်ဖြစ်ကြောင်း ဒေါ်မြင့်သူဇာသိန်းက ဆိုသည်။
တရားခံကိုကျော်ဇေယျကမူ ယခုပြစ်ဒဏ်သည် တရားမျှတမူမရှိဘဲ ၎င်းအနေဖြင့် ထိုအမှုတွင် ပါဝင်ပတ်သက်ခဲ့ခြင်းမရှိဟု တရားရုံးမှအထွက်တွင် ပြောသည်။
“သက်သေခံနဲ့ ကျွန်တော်တို့ရဲ့ ပုံတွေကို လုံးဝတင်ပြနိုင်ခြင်းမရှိခဲ့ဘူး။ တရားလိုတွေရဲ့ ပြောဆိုချက်အရနဲ့ပဲ အမှုကို တဖက်သတ် ဆောင်ရွက်သွားတယ်”ဟု ကိုကျော်ဇေယျက ပြောသည်။
ပုသိမ်ကြီးမြို့နယ် အောင်သပြေကျေးရွာအနီး တည်ဆောက်နေသည့် အယ်လ်ဖာဘိလပ်မြေစက်ရုံစီမံကိန်းအား ဒေသခံများက ကန့်ကွက်ဆန္ဒပြလျှက်ရှိပြီး ၂၀၁၈ ဇူလိုင်က အောင်သပြေကျေးရွာထိပ်ရှိ ဇရပ်ပေါ်တွင် ခွင့်ပြုချက်မရှိဘဲ လူစုလူဝေးပြုလုပ်သည်ဟုဆိုကာ ကိုကျော်ဇေယျ အပါအဝင် အဆိုပါကျေးရွာမှ ဦးတင်လင်း၊ ဦးသောင်းညွန့်နှင့် ကိုထွန်းနိုင်တို့ (၄)ဦးကို ငြိမ်းစုစီဥပဒေ ပုဒ်မ၁၉အရ အရေးယူပေးရန် ပုသိမ်ကြီးမြို့နယ် ရဲတပ်ဖွဲ့မှူး ရဲမှူးမျိုးညွန့်သန်း (ယခုကွယ်လွန်)မှ တရားလိုလုပ် အမှုဖွင့်ခဲ့ခြင်းဖြစ်သည်။ ၎င်းတို့ထဲမှ ကိုကျော်ဇေယျကို ထောင်ဒဏ်ချမှတ်ခဲ့ပြီးနောက် ကျန်ရှိသူများကို ဖမ်းဝရမ်းထုတ်ခဲ့သည်။
လက်ရှိတွင် အယ်လ်ဖာဘိလပ်မြေ စက်ရုံစီမံကိန်း ကန့်ကွက်ဆန္ဒပြမှုနှင့် ဆက်စပ်၍ ဖမ်းဆီး၊ထောင်ချခံရသည့် အောင်သပြေဒေသခံ (၉)ဦးရှိပြီး အခြားဒေသခံ (၇၀)ကျော်ကို ဖမ်းဝရန်းထုတ်ထားကြောင်း အောင်သပြေဒေသခံများဘက်မှ အမူလိုက်ပါဆောင်ရွက်နေသည့် တရားလွှတ်တော်ရှေ့နေ ဦးစည်သူက ပြောသည်။
ထောင်ဒဏ်(၃)လချမှတ်ခံရသည့် အောင်သပြေရွာသား ကိုကျော်ဇေယျ။ ဓါတ်ပုံ – မင်းမော်။