Covid-19 ကြောင့် သေဆုံးခြင်း ဟုတ်၊မဟုတ် အတည်မပြုနိုင်သေးဘဲ အဆိုပါ လူနာအမျိုးသမီးမှာ ဆီးချိုရောဂါအခံရှိသူဖြစ်ဟုဆို
Mandalay In-depth News၊ မတ်-၆
မန္တလေး၌ Covid-19 ရောဂါ စောင့်ကြည့်လူနာအဖြစ် သတ်မှတ်ကာ သီးခြားထားရှိ ကုသပေးလျက်ရှိသည့် အသက်(၆၀)ကျော်အရွယ် ဆီးချိုရောဂါအခံရှိသူ အမျိုးသမီးကြီး သေဆုံးကြောင်း သတင်းရရှိသည်။
အဆိုပါ စောင့်ကြည့်လူနာ အမျိုးသမီး သေဆုံးသည်မှာ မှန်ကန်သော်လည်း မူလရောဂါအခံရှိသူဖြစ်ပြီး Covid-19 ရောဂါကြောင့် သေဆုံးခြင်း ဟုတ်၊ မဟုတ် အတည်မပြုနိုင်သေးကြောင်း မန္တလေးတိုင်းဒေသကြီး ကိုရိုနာဗိုင်းရပ်စ်ရောဂါ စောင့်ကြည့်စစ်ဆေး ကုသရေး ကြီးကြပ်မှုကော်မတီ (SRT) ဥက္ကဌ မန္တလေးမြို့တော်ဝန် ဒေါက်တာရဲလွင်က Mandalay In-depth News အား ပြောသည်။
“Check Infection မှန်သမျှ အကုန်လုံး ဆေးရုံကို တင်တယ်။ သူက အဆုတ်ကရောင်ပြီး ခဲနေတာ။ ဆုံးတာက ကျောက်ကပ်တွေ၊ ဘာတွေ အလုပ်မလုပ်တော့ဘူး။ အဲ့တာကြောင့် ဆုံးတာ။ Result (အဖြေ)က မရသေးဘူး။ ဒီနေ့ ညနေပိုင်းမှ ရမှာ။ ကျွန်တော်က လောထားတယ်။ ရန်ကုန်က ထွက်မပေးသေးတာ”ဟု ဒေါက်တာရဲလွင်က ပြောသည်။
၎င်း စောင့်ကြည့်အမျိုးသမီးတွင် Covid-19 ရောဂါ ကူးစက်ခံရခြင်း ရှိ၊မရှိ စစ်ဆေးရန် ဓါတ်ခွဲနမူနာရယူ၍ အမျိုးသားကျန်းမာရေး ဓာတ်ခွဲမှုဆိုင်ရာဌာန (ရန်ကုန်)သို့ ပေးပို့စစ်ဆေးနေသည်မှာ အဖြေမထွက်သေးကြောင်း သတင်းရရှိသည်။
အဆိုပါ စောင့်ကြည့်လူနာ သေဆုံးသည့်သတင်းနှင့်ပတ်သက်၍ မန္တလေးဆေးရုံအုပ် ဒေါက်တာခင်ကျော် နှင့် ပြည်သူ့ကျန်းမာရေးနှင့် ကုသရေးဦးစီးဌာန မန္တလေးတိုင်း ဦးစီးမှူး ဒေါက်တာသန်းသန်းမြင့်တို့ထံ ဆက်သွယ်မေးမြန်းသော်လည်း ပြန်လည်ဖြေကြားခြင်း မရှိသေးပါ။
မန္တလေးမြို့ မဟာအောင်မြေမြို့နယ်တွင် နေထိုင်သည့် အသက် (၆၈) နှစ်အရွယ် ဆီးချိုရောဂါအခံရှိသူ အမျိုးသမီးကြီးတစ်ဦးသည် ဖေဖော်ဝါရီ (၂၇) ရက်မှစတင်၍ ချောင်းဆိုးခြင်း၊ အသက်ရှူကြပ်ခြင်း ရောဂါ လက္ခဏာများ ခံစားခဲ့ရပြီး သတိကောင်းစွာမရသဖြင့် မတ်(၄)ရက်တွင် မန္တလေးအထွေထွေရောဂါကု ဆေးရုံကြီးသို့ လာရောက်ပြသခဲ့ကြောင်း၊ အဆိုပါလူနာအား စမ်းသပ်စစ်ဆေးရာ လွန်ခဲ့သော (၁၄) ရက်အတွင်း ရောဂါကူးစက်ဖြစ်ပွားသည့် ဒေသများသို့ ခရီးသွားရာဇဝင် မရှိသော်လည်း COVID-19 ရောဂါ သံသယလက္ခဏာများ တွေ့ရှိရသဖြင့် ၎င်းအား စောင့်ကြည့်လူနာ (Person Under Investigation – PUI) အဖြစ် သတ်မှတ်ကာ သီးခြားထားရှိ ကုသမှုပေးလျက်ရှိကြောင်းနှင့် ဓါတ်ခွဲနမူနာရယူ၍ အမျိုးသားကျန်းမာရေး ဓာတ်ခွဲမှုဆိုင်ရာဌာန (ရန်ကုန်)သို့ ပေးပို့ စစ်ဆေးရန် စီစဉ်ဆောင်ရွက်လျက်ရှိကြောင်း ကျန်းမာရေးနှင့် အားကစားဝန်ကြီး ဌာနက မတ်လ(၄)ရက် ညပိုင်းတွင် သတင်းထုတ်ပြန်သည်။
#Mandalay_Indepth_News
#Mandalay_News
.