ကျောင်းသားများ အပါအဝင် မီးဘေးသင့်သူ (၉၀)ကျော်အတွက် အကူအညီများ လိုအပ်နေ
မောင်သိန်း(မလှိုင်)၊ ဇန်နဝါရီ-၂၂
မန္တလေးတိုင်းဒေသကြီး ပျော်ဘွယ်မြို့တွင် ဇန်နဝါရီ(၂၁)ရက် ညပိုင်းက မီးလောင်မှုဖြစ်ပွားခဲ့ရာ နေအိမ်(၁၉)လုံး မီးလောင်ဆုံးရှုံးခဲ့ပြီး မီးဘေးသင့်သူ (၉၀)ကျော်ကို ယာယီကယ်ဆယ်ရေးစခန်း ဖွင့်ကာ စောင့်ရှောက်ထားရကြောင်း မြို့နယ်မီးသတ်တပ်ဖွဲ့ တာဝန်ရှိသူတစ်ဦးက ပြောသည်။
ဇန်နဝါရီ(၂၁)ရက် ည(၇)နာရီကျော်အချိန်က ပျော်ဘွယ်မြို့ မန္တလေးတန်းရပ်ကွက်ရှိ အသက်(၅၀)ကျော်အရွယ် အမျိုးသမီးကြီးတစ်ဦး၏ နေအိမ်၌ ဘုရားစင်ပေါ်တွင် မီးပူဇော်ထားသော လျှပ်စစ်မီးပန်းကုံး အပူလွန်ကဲရာမှတဆင့် မီးစတင်လောင်ကျွမ်းခဲ့ပြီး နေအိမ်(၁၉)လုံး မီးလောင်ဆုံးရှုံးခဲ့ကြောင်း၊ မီးလောင်မှုကြောင့် အသက်(၅၀)ကျော်အရွယ် အမျိုးသားကြီးတစ်ဦး ထိခိုက်ဒဏ်ရာရကာ မိတ္ထီလာဆေးရုံသို့ တင်ပို့ထားရကြောင်း မြို့နယ် မီးသတ်တပ်ဖွဲ့က သတင်းထုတ်ပြန်သည်။
အဆိုပါ မီးလောင်မှုကြောင့် မီးဘေးသင့်သူ (၉၅)ဦး ရှိပြီး ၎င်းတို့ကို ရပ်ကွက်ဓမ္မာရုံ၌ ခေတ္တကယ်ဆယ်ရေးစခန်း ဖွင့်လှစ်ထားရှိကာ စောင့်ရှောက်ထားကြောင်း ပျော်ဘွယ်မြို့နယ် မီးသတ်ဦးစီးမှူး ဦးအောင်သက်လှိုင်က ပြောသည်။
မီးဘေးသင့်သူများတွင် ကျောင်းသားကျောင်းသူ (၁၅)ဦး ပါဝင်ပြီး ဌာနဆိုင်ရာများနှင့် ဒေသခံများမှ ငွေကြေးနှင့် အစားအသောက်များ ကူညီထောက်ပံ့ ပေးနေသော်လည်း အကူအညီများစွာ လိုအပ်နေသည်ဟု ၎င်းက ပြောသည်။
ဇန်နဝါရီ(၂၁)ရက် ည(၇)နာရီကျော်အချိန်တွင် စတင်လောင်ကျွမ်းခဲ့သည့် ပျော်ဘွယ်မြို့ မန္တလေးတန်းရပ် မီးအား ငြှိမ်းသတ်နိုင်ရန် ပျော်ဘွယ်မြို့နယ်အတွင်းရှိ မီးသတ်ယာဉ်များအပြင် ရမည်းသင်းခရိုင်နှင့် ပေပင်လေးအမြန်လမ်း ရဲတပ်ဖွဲ့မှ မီးသတ်ယာဉ်များဖြင့်ပါ ငြှိမ်းသတ်ခဲ့ရပြီး မီးလောင်ချိန် (၁)နာရီကျော် ကြာမြင့်ခဲ့သည်။
အဆိုပါ မီးလောင်မှုကြောင့် ပျက်စီးဆုံးရှုံးမှုတန်ဘိုး ကျပ်သိန်း(၁၂၀)ကျော် ရှိခဲ့ပြီး မီးစတင်လောင်ကျွမ်းခဲ့သည့် အိမ်ရှင် အသက်(၅၀)ကျော်အရွယ် အမျိုးသမီးကြီးကို ပျော်ဘွယ် မြို့မရဲစခန်းတွင် ရာဇသတ်ကြီးပုဒ်မ ၂၈၅ (မီးပေါ့ဆမှု) ဖြင့် အမှုဖွင့်ထားကြောင်း မြို့နယ်မီးသတ်ဦးစီးဌာနမှ သတင်းရရှိသည်။
ပျော်ဘွယ်မြို့ မန္တလေးတန်းရပ် မီးလောင်ပြင် အပျက်အစီးများနှင့် မီးဘေးသင့် ပြည်သူများ/ Photo – မောင်သိန်း(မလှိုင်).
#Mandalay_Indepth_News
.