ဝူဟန်ရောဂါ စစ်ဆေးတွေ့ရှိသည့် ကျောင်းသားကို ပြန်မခေါ်ဘဲ ဝူဟန်တွင်ပင် ထားခဲ့မည်ဟု မြို့တော်ဝန်ဆို
Mandalay In-depth News၊ ဖေဖေါ်ဝါရီ-၁
တရုတ်နိုင်ငံ ဝူဟန်မြို့သို့ ရောက်ရှိနေသည့် မြန်မာကျောင်းသားကျောင်းသူ (၆၀)ကျော်သည် ယနေ့ညနက်ပိုင်းတွင် မန္တလေးမြို့သို့ ပြန်လည်ရောက်ရှိမည် ဖြစ်ကြောင်း တရုတ်နိုင်ငံ ဘေဂျင်းမြို့ရှိ မြန်မာသံရုံးက သတင်းထုတ်ပြန်သည်။
မြန်မာကျောင်းသားများကို အထူးလေယာဉ်ဖြင့် ပြန်လည်ခေါ်ဆောင်ရန် တရုတ်အစိုးရနှင့် ညှိနှိုင်းခဲ့ရာ လေယာဉ်ဆင်းသက်ခွင့် ရရှိပြီဖြစ်၍ ယနေ့ညနက် (၁၁)နာရီကျော် အချိန်တွင် ဝူဟန်မြို့မှ ထွက်ခွာကာ မနက်ဖန် နံနက်စောစော(၁)နာရီကျော်တွင် မန္တလေးလေဆိပ်သို့ ဆိုက်ရောက်မည်ဖြစ်သည်ဟု ဘေဂျင်းမြို့ မြန်မာသံရုံး၏ သတင်းထုတ်ပြန်ချက်တွင် ဖော်ပြထားသည်။
ကျောင်းသားကျောင်းသူများကို ဝူဟန်မြို့တွင်း ဘတ်စ်ကားနှစ်စီးဖြင့် လိုက်လံကြိုဆိုမည်ဟု ဆိုသည်။ မြန်မာကျောင်းသား၊ ကျောင်းသူများကို လေယာဉ်အမှုထမ်းကိုးဦး၊ လုံခြုံရေး နှစ်ဦးနှင့် ကျန်းမာရေးဝန်ထမ်းတစ်ဦး လိုက်ပါမည့် မြန်မာအမျိုးသားလေကြောင်းလိုင်း (MNA B-737-800) အထူးလေယာဉ် ခေါ်ဆောင်လာပြီး မန္တလေးမြို့၌ ထားရှိမည် ဖြစ်သည်။
မြန်မာနိုင်ငံသား ကျောင်းသား၊ကျောင်းသူ (၆၃)ဦးသည် တရုတ်နိုင်ငံ ဝူဟန်မြို့သို့ ပညာသင်အနေဖြင့် ရောက်ရှိနေပြီး ကိုရိုနာဗိုင်းရပ်စ် ပြင်းထန်အဆုတ်ရောင်ရောဂါ ဖြစ်ပွားမှုကြောင့် မြန်မာနိုင်ငံသို့ ပြန်လာရန် ကြိုးစားနေခြင်း ဖြစ်သည်။
အဆိုပါ ကျောင်းသား ကျောင်းသူများ မန္တလေးမြို့သို့ ပြန်လည်ရောက်ရှိလာပါက မန္တလေးမြို့ ၆၂လမ်းပေါ်ရှိ ကန်တော်နဒီ ဆေးရုံတွင် (၁၄)ရက်ကြာ သီးသန့်ထားရှိကာ စစ်ကြည့်စစ်ဆေးမည်ဖြစ်ကြောင်း အဆုတ်ရောင်ရောဂါ မန္တလေးတိုင်းအတွင်း ဝူဟန်ရောဂါ (2019-nCoV) ကူးစက်မှု မရှိစေရေး စောင့်ကြည့်စစ်ဆေး ကုသရေး ကြီးကြပ်မှုကော်မတီ (Surveillance and Respond Team-SRT) ဥက္ကဋ္ဌ၊ မန္တလေးမြို့တော်ဝန် ဒေါက်တာရဲလွင်က သူ၏ ဖေ့စ်ဘွတ်ခ် စာမျက်နှာတွင် ဖော်ပြသည်။
“အရေးကြီးဆုံးက အခုပြန်လာမယ့် ကျောင်းသားတွေကို ဝူဟန်မြို့လေဆိပ်မှာ မြန်မာဆရာဝန်တွေက စစ်ဆေးပြီး သံသယရှိသူတွေ့ရင် ဝူဟန်မှာပဲ ထားခဲ့မှာပါ” ဟု မန္တလေးမြို့တော်ဝန် ဒေါက်တာရဲလွင်က ဆိုသည်။
ဝူဟန်မြို့မှ ပြန်လည်ရောက်ရှိလာမည့် ကျောင်းသားများကို ပြင်းထန်အဆုတ်ရောင်ရောဂါ ကူးစက်ခံရခြင်း ရှိ၊မရှိ မန္တလေးမြို့ ကန်တော်နဒီ ဆေးရုံတွင် (၁၄)ရက်ကြာ ထားရှိကာ စောင့်ကြပ်စစ်ဆေးပေးမည် ဖြစ်ပြီး ထိုသို့ စောင့်ကြည့်စစ်ဆေးချိန် ရက်နှစ်ပတ်ခန့်အတွင်း ကျောင်းသားများအနေဖြင့် ပြင်ပပုဂ္ဂိုလ်များနှင့် ထိတွေ့ဆက်ဆံနိုင်မည် မဟုတ်ဘဲ သီးခြားနေထိုင်ရမည် ဖြစ်သည်။
ပြန်တော်ပြန် ကျောင်းသားများကို သီးခြားထားရှိရန်အတွက် ကန်တော်နဒီ ဆေးရုံအတွင်းပိုင်း သန့်ရှင်းခြင်း၊ ခုတင်နှင့် ပရိဘောဂများ ဆေးကြောသန့်စင်ခြင်း၊ ဆေးရုံဝင်းအတွင်း ပေါင်းမြက်များရှင်းလင်းခြင်း၊ ရေရရှိရေး မိလ္လာစွန့်ပစ်မှု အဆင်ပြေရေးများ စီစဉ်ခြင်းကို မန္တလေးမြို့တော် စည်ပင်သာယာရေးကော်မတီက ဆောင်ရွက်ပေးထားပြီး လျှပ်စစ်မီးများ အဆင်ပြေစေရန် မြို့နယ်လျှပ်စစ်ရုံးနှင့် ရေချိုးခန်း၊ အိမ်သာများ ပြုပြင်ပေးခြင်းကို မန္တလေးတိုင်း အစိုးရအဖွဲ့က ပူးပေါင်းဆောင်ရွက်ပေးထားသည်ဟု ၎င်းက ဆိုသည်။
ကန်တော်နဒီဆေးရုံတွင် ရေချိုးခန်းအိမ်သာ တွဲလျက် နှစ်ဦးစာ သီးသန့်ခန်း ၄၅ ခန်းနှင့် ခန်းမကြီးနှစ်ခန်းကို အဆင်သင့်ပြင်ဆင် စီစဉ်ထားပြီး ကျောင်းသားများကို ကျန်းမာရေး စောင့်ရှောက်ပေးမည့် ဆရာဝန်၊ ဆရာမများ၊ အစားအသောက် စီမံပေးမည့်ဝန်ထမ်းများ၊ လုံခြုံရေး စောင့်ရှောက်ပေးမည့် ရဲတပ်ဖွဲ့ဝင်များ တည်းခိုနေထိုင်မည့် အခန်းများလည်းစီစဉ်ထားရှိပြီးဖြစ်သည်ဟု ဆိုသည်။
“လေယာဉ်စီးစဉ် ကာလနဲ့ ဆေးရုံကိုကားနဲ့ လာတဲ့ အချိန်တွေမှာ N95 masks တွေ တောက်လျှောက်တပ်ခိုင်းထားပြီး အစာစားတာ ခွင့်ပြုမှာမဟုတ်ပါဘူး။ ကန်တော်နဒီ ရောက်လာရင်လည်း မိမိအတွက်ချထားပေးတဲ့ အခန်းထဲမှာပဲ နေရမှာဖြစ်ပြီး ကော်ရီဒါမှာထွက်ပြီး အချင်းချင်း စကားပြောတာကအစ ခွင့်ပြုမှာမဟုတ်ပါဘူး။ အထူးသဖြင့် မိဘဆွေမျိုးတွေနဲ့ လုံးဝတွေ့ခွင့်ပြုမှာ မဟုတ်သလို ဖျားနာမှု ရှိမရှိ နေ့စဉ်စစ်ဆေးမယ့် ဆရာမတစ်ဦးသာ အထဲကိုဝင်ခွင့်ပြုမှာပါ”ဟု မြို့တော်ဝန်က ဆိုသည်။
လက်ရှိအချိန်တွင် ပြန်ရောက်လာမည့် ကျောင်းသားများအတွက် ပြင်ပအလှူရှင်များက အစားအသေက်နှင့် ဆေးဝါးများ လှူဒါန်းမှုရှိကြောင်း မြို့တော်ဝန်က ထုတ်ပြန်ထားသည်။
ပြည်တော်ပြန် ကျောင်းသားများကို သီးသန့်ထားရှိမည့် ကန်တော်နဒီ ဆေးရုံ ပြင်ဆင်ထားစဉ်/ Photo – Ye Lwin FB.
#Mandalay_Indepth_News
#Mandalay_News #WuhanVirus #Coronavirus
.