ကိုနေကို၊ သြဂုတ်-၁၆
ပုဂံရှေးဟောင်းယဉ်ကျေးမူနယ်မြေ မင်းနန်သူကျေးရွာအနီး လေးမျက်နှာဘုရားဝင်းအတွင်းရှိ လေးမျက်နှာအုတ်ကျောင်းပေါ်၌ ကိုရီးယားနိုင်ငံသား တစ်ဦး သေဆုံးနေသည်ကို တွေ့ရှိခဲ့ကြောင်း ရှေးဟောင်းသုတေသန နှင့် အမျိုးသားပြတိုက်ဦးစီးဌာန(ပုဂံဌာနခွဲ)မှ သတင်းရရှိသည်။
ညောင်ဦးမြို့နယ် ပုဂံရှေးဟောင်းယဉ်ကျေးမူနယ်မြေ ရှေးဟောင်း အဆောက်အအုံအမှတ်(၄၄၈)၊ လေးမျက်နှာ အုတ်ကျောင်းပေါ်၌ နိုင်ငံခြားသား အမျိုးသားတစ်ဦး လဲကျနေကြောင်း ယနေ့ (သြဂုတ်၁၆) နံနက်(၁၁)နာရီကျော်တွင် ဒေသခံတစ်ဦး၏ သတင်းပေးချက်အရ သက်ဆိုင်ရာ အဖွဲ့များနှင့် အတူ သွားရောက်စစ်ဆေးခဲ့ရာ သေဆုံးနေသည် တွေ့ရှိခဲ့ရကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန(ပုဂံဌာနခွဲ) ဒုတိယ ညွှန်ကြားရေးမှုး ဦးမြင့်သန်းက ပြောသည်။
လေးမျက်နှာအုတ်ကျောင်း အနောက်တောင်ထောင့် အမြင့်(၁၅)ပေခန့်ရှိ ကြောင်လိမ်လှေကား ပထမထပ်နေရာ၌ သေဆုံးနေခြင်းဖြစ်ပြီး အလောင်းတွင် ဒဏ်ရာနှင့် သွေးစများ မတွေ့ရှိရကြောင်း ၎င်းက ရှင်းပြသည်။
သေဆုံးသူမှာ အသက်(၂၉)နှစ်အရွယ် ကိုရီးယားနိုင်ငံသား JIHO ဆိုသူ ဖြစ်ပြီး ဘေးလွယ်အိတ်အတွင်းမှ ပါတ်စ်ပို့ကိုလည်း တွေ့ရသည်ဟု ၎င်းက ဆိုသည်။
“ဘယ်ပုံ၊ ဘယ်နည်းနဲ့ သေတယ်ဆိုတာတော့ မသိရဘူူး” ဟု ဦးမြင့်သန်းက ဆိုသည်။
အဆိုပါ ကိုရီးယားနိုင်ငံသား သေဆုံးမှုနှင့်ပတ်သက်၍ အကြောင်းအရင်း စစ်ဆေးနိုင်ရန် ရုပ်အလောင်းကို ဂရုဏာရှင်နာရေးကူညီမှု ကားဖြင့် ညောင်ဦးဆေးရုံသို့ ပို့ဆောင်ခဲ့သည်။
ပုဂံဒေသတွင် လွန်ခဲ့သည့် နှစ်နှစ်ကျော်အတွင်း ဘုရားများပေါ်မှ ပြုတ်ကျခဲ့သည့် နိုင်ငံခြားသားခရီးသွား ခြောက်ဦးရှိခဲ့ကာ အမေရိကန်နိုင်ငံသူ တစ်ဦးသေဆုံးပြီး ငါးဦး ပြင်းထန်စွာ ဒဏ်ရာရရှိခဲ့ကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန(ပုဂံဌာနခွဲ) မှတ်တမ်းများအရ သိရသည်။
လက်ရှိတွင် ပုဂံဒေသရှိ ဘုရားစေတီ၊ပုထိုးများ အားလုံးအပေါ်သို့ တက်ရောက်ခြင်းမပြုရန် ရှေးဟောင်းဌာနမှ သတိပေးထားမြစ်ထားသည်။ ထိုသို့ ဘုရားများပေါ်သို့ တက်ရောက်ခြင်းမပြုရန် သတိပေးနှိုးဆော်ချက် ဆိုင်းဘုတ်များကို ပြည်တွင်း၊ပြည်ပ ခရီးသွားဧည့်သည်များ လာရောက်လည်ပတ်မူများသည့် နေရာများတွင် မြန်မာ၊ အင်္ဂလိပ် နှစ်ဘာသာဖြင့် စိုက်ထူထားပြီး ရှေးဟောင်းအဆောက်အအုံများပေါ်သို့ တက်ရောက်ရန် လှေကားရှိသည့် အဆောက်အအုံများတွင် သံတံခါး တပ်ဆင် သော့ခတ်ထားကြောင်း အထက်ပါဌာနမှ သတင်းရရှိသည်။
ဓါတ်ပုံ – ကိုဝဏ္ဍခေါ် ဗလကြီး FB.